¹ Poing, Yesus kengti pa kele kota Yerikho. ² Kefu kebaung kebaleng-kebaleng bati keke Zakheus, keba rube taimbe mu leile pa keba japa tafa. ³ Kewe keena Yesus kefufule, keletape kewe tekepe e; kewe ne rilele. ⁴ Pea,Zakheus kewe wekatato tihe teba nawo pa kepee ara tu ung Yesus kefufu Kewe kelele lengma keing. ⁵ Kaimpa Yesus kakoti ju jeng Zakheus mu, Ke kekung ete pa kelengte kewe, ''Zakheus, mekokofa rapu ung-angwe Ni rere e e paa meme.'' ⁶ Poingra, Zakheus kerapu pa Yesus kekela hupalang efeng. ⁷ Kaimpa, poing teba nawo jaing petefo, tewe ana piwowo pa teni pate, ''Kewe ana keba kapengtu keti ile keba neleng.'' ⁸ Kaimpa, Zakheus kekaleng pa kelengte Tata, ''Tata, meka kapeng, jalelepa nine mowe riung nilelenf taba jaka, pa ana niwe baung jahenglong keke nileleng, ni are fufu wa la nopong.'' ⁹ Peapa, Yesus lengte Zakheus, ''Ung-ang bang wea, efengwe pewa kotu peetefe paa wea keba wera Abraham keangkuke. ¹⁰ Peana, Keba Ko kete h pa efeng kekate teba lengte.'' Bapo Efeng pa Bapo Feng ¹¹ Poteing tewe teri lele paing, Yesus kera lengteja hoho kelei ahakela ana Ke kepate tejakote watu Yerusalem pa tewe hueng Ai jeng Teteke pekokofa tetetu. ¹² Petewe ing, Ke ra lengte, ''Keba netipa kekakoti bame hambawo ko keteke etike bari, pa kafapa ke rame. ¹³ Kaimpa, keba rube ing teba jano reete te kelufata pa taimbe keleleng tete te nahipang pa pang hingtung mina. Kelengte tea, 'Eare eapa ja jata ele ko nimekora nilele le.' ¹⁴ Anaing-angra, teba-teba netipa ke tenaji pa teka tereni teba teja tete tenini, 'Newe pungtuka kebaing keeti mumu bari nene.' ¹⁵ Wakote keteeti bari, keba netipa kemupute pa kelengko bapo-bapo taimbe keleleng tete te ke ung ke te kekeng-kengle taimbe nawo narang-rang mepepa janapepe. ¹⁶ Bapo lopana kete pa keleng, 'Meba rube, taimbe aling mina meme pe jana nile 10 mina nilela.' ¹⁷ Bari keleng te ke efengwo, he meba efeng. mejano hapa mepe efeng tafa, mewe 10 kota wea mepe koko ¹⁸ Bapo hingtung kera te pa keleng, Meba rube, taimbe aling mina meme ing niare nilela.' ¹⁹ Bari keleng te bapo ing, 'Mepe koko kota 5 wea.' ²⁰ Kaimpa, bapo ke aling ungra te pa keleng, 'Meba rube, taimbe meme aling ing niware wefahete e paporo. ²¹ Nifu meang me meba nafeng. Mewe ja mepe wa jaung mepepengka pa ja mewa mepe pera jaung me waka.' ²² Kaimpa, bari ing ke lengte ke, 'Niwe me nikarere tefifi petehe ana piti mepanya, he me bapo feng Nya, mepe niwe niba nafeng janiwe waja niwe leng eka pa janiwu waja niwo waka? ²³ Noingpa, jatuko me taimbe nine mame peie teba taimbe lengma kotu wakotu ni mele, niwe taimbe ni lele wala hepang pepe. ²⁴ bari ing keleng te teba-teba terete kein-ang, 'Keba ing ke mina kele pa keleleng keba mina 10.' ²⁵ Kaimpa, tewe tenite barike, 'Meba rube, bapo ing 10 mina keke.' ²⁶ Bari ing keleng, 'Nileng-leng ewe,kebaung ba ke jakeke, fang-fangra kewe-wele, anara wa keba ja kekeka, lelepa keke motufu pe tere fatata. ²⁷ Anaing-angra, an a teba-teba niwe tehefeng motu nite bari tete nileleka, te ealewe pa ejifata ho nine.''' Yesus Kewe Teke Ana Bari ²⁸ Poing Yesus jaing-jaing keleng, Ke leng keka tofa ketiti Yerusalem. ²⁹ Kaimpa Ke kakoti watu bame Betfage pa Betania, watupa heng ti pepe Heng Zaitun, Ke teba hingtung teangku-Keke kelelengteja. ³⁰ Ke-lengte tewe, ''Ehako erere bame kaetu topu e e ing. Pa, ana ewe ekengre kefua, ewe jakoung keledai efu a tete pa teba teeka. Jako keledai ehofa pa ekalewe. ³¹ Ana tebaka tejeng ewe, 'Jatuko ewe keledai ing ekahale.' elengna wea; Tata pung keke lekole.'' ³² Pa,teangku keke teba hampa Ke leleng teja pa ja lelepa nawo tefie petehe ana Ke lengkotu tewe. ³³ Tewe jako ing tejofa, keba jaba kekeng tea, ''Jatuko ewe jako keledai ehofa? ³⁴ Tewera nite, ''Tata kepung kekele.'' ³⁵ Pa, tewe jako keledai teketujako te Yesus pa kerokeke keweetefe eng-e keledaira ing, kaimpa Yesus ke e. ³⁶ Poing Yesus kelei lengma, teba-teba ro tete terupee lengma. ³⁷ Pa, poing Yesus kekakoti watupa Yerusalem, pewana lengma rapuna petete heng Zaitun, teba lake-Ke tewe Ai piteni pa tewenakae pina letapa. Tewe tewapate Ai jamepemo mukjizat tewo tefo. ³⁸ Tewe tewae, ''Ma kelela Kea ketetele anara Bari ketula Tata batikeke pepe efengwo wa surga pa penawaetu jeng ing pe tetewo.'' Mazmur 118;26 ³⁹ Teba Farisi narang-rang ung teja teba nawo ing tenipate Yesus,''Koru, teangku-teangku-Meme heka mepu.'' ⁴⁰ Anaing-angra, Yesus lengte ''Niwe lengtete ewe, ana tewe lang u temu, wung-wungwe tewae-tewae.'' Yesus Yerusalem Fu kele ⁴¹ Poing Yesus keti watu kota Yerusalem pa kekalengte kefo kota ing, Kera fu kele. ⁴² Kelengte, ''Anateing bangwe ewelu ja tutu tu pepe efeng etefe ewena. Anaing-angra, jaing peteweng wa luto e e. ⁴³ Pekotu bang pepe tetetu teba feng-feng tetekeho tewei i tu meme pa me tepajo-jo tu meme teja lolo meme. ⁴⁴ Tewe me tejapela teangku-teangku meme tete najangkeke keho meme. Pa,tewe wung tefumotu tetakiki kate wung femotu wunghing ipepe ewe bangra efolangka po Ai kelelemenya.'' Yesus Teba-teba Jata te e Ai Paake ⁴⁵ Kaimpa, Yesus kengti Ai Paake pa teba-teba jata te e ke kekaju temekengte peng. ⁴⁶ Keleng tea, ''Pepotumotu. Paa Nine pewe paa lupompong,' peana ewe eleko pewe ana po teba jata tee te.'' ⁴⁷ Kaimpa, Yesus jakenalung i Ai Paake bang-bangfa. Peapa,teba-teba ropo Taurat fojang pa tebafa rube bapaing lengma teju Ke teja-jate. ⁴⁸ Anaing-angra tewe terika tunanene tu teba nawo te piti Yesus tewta.