¹ Poing Yesus kekengte ho , Ke kalengte teba narang-rang teba japa taimbe tupate fue taimbe ruto. ² Kera kekalengte pebaung peba ro japaka pewefa ruto taimbe tembaga kang hingtung ³ Yesus lengte, ''Niwe leng-lengle ewe bamuang pepe peba ro we janawo pefu te ana eba nawo eba japa. ⁴ Pea , ewe jana eleleng motu wa jana jong-jong e e, peba rowe jana pefu ing wa jalelepa pepe kanya, jalelepa pepeing pejupa pangko po pemotu.'' ⁵ Kaimpa teba narang-rang temepa pitee Ai Paake pepotejeko pepa wung-wung ing ju pa jana pepe- jana pepe, Yesus lengte, ⁶ ''Wakotu bang pepe, jaing pewe efo ing peketa kukule. ja ana wung na aling ungra wung eti fei wung pe ke taku fata-tale.'' ⁷ Pea, tebafa teangku-Keke, tejeng te-Ke, ''Koru banghaung jaing lewang-wangtu? Pa janoha jari-jari peing lewang-wangtu? ⁸ Yesus pi kele, e engta momo ung ewe terehi pepeka teba nawo tete bati Nine pa pitete e, Niwe Kea, pa bang pepe pete watu,' Tewe elalaka. ⁹ Anaing-angra, le elate ping tete ete pa tewetaki ete, ewe eefufuka peing jaing-jaing pe lewang-wangtu pe wawato, pepape pepeing petete rakawo.'' ¹⁰ Wakotehe Yesus lengte tewe ''Bapaung temeko tepute bapaung pipo tela-telate tera pipotela-la jeng tafa. ¹¹ Pe lewang-wangtu fitong tetetu hangfeng,neba hukikitu pa nolelepa-nolelepa toto jeng lolo. tukoung ja nati ung petete tu uangfata pa jari-jari pepe fengwo pa tafawo wa petang hepate. ¹² Peapa, jaweing lewang kapa,teba-teba me tekekete pa me tekepa jano lelepa. Mewe teketute sinagoge-sinagoge tewe pa me tekefa kengti a paa-a paa. Tewera me teketu japa tebafa raja pa gubernur teho peing bati-Nine. ¹³ Pea, jaweing peana long memejaung mepepe. ¹⁴ Peanya, pung meme kotakoko wakotu jaung hu me engko pime pepe anane meme, ¹⁵ Niwe pitiung niweleng-leng me ko tebaung pira tetekate pa baungra teba-teba feng-feng me tetapepe te. ¹⁶ Mewe tena jijite teba huhu meme, johangme tebaleng-tebaleng, pa lengtume meme,pa teara metejako mewung-wung teba narang-rang ung waebafa ing. ¹⁷ Mewe tena jijite teba nawo bati-Nine ¹⁸ Anaing-angra, ta motu rube meme kohetiti kale. ¹⁹ Wala mewo humape tata, mewe jeng memuko-kope pemepe.' Teniwefa hetu Yerusalem Petaku ²⁰ ''Anaing-angra, po ewe kalengte kota Yerusalem teba taba-taba riha pake, ewe lulu jataku-kutu pete watupa. ²¹ Bang ing, teba-teba temete jeng ing Yudea tewe nete-te tetu mejata- tete pefu, teba-teba temete kota ing temejata na peng kota ing pa teba-teba temete bame-bame ewe kota Yerusalem ekeng-kengka ²² Peing bang-bang ari keloki-kile jalele paing pepo tumotu wakotupa. ²³ Feng tafa teume-teume kopa pa no teniete poing jalewang-wangtu peing fengtafa bame ing, pa jafeng bapalewo kewe fefe bapa wea. ²⁴ Tewe anabepa tejifata ta tebing pa bapa-bapa tewe a tepe. Kota Yerusalem bapa hing- hing teba japengtu tewe wakotu bapaing-bapaing tupe aing.'' Keba Ko Kekala ifu Tewenakapa ²⁵ Peing motu jari-jari wa rang,ke, pa ha-ha. Fitongwe, bapa-pafa tewe tefefe te ana jatealolue jafu tio ketakufeng pa oka tafafa ei. ²⁶ Teba-teba kufutepa tewe tefe pa temepa jeng e ja lewang-wang fitong kewe lelepafu ma motu petang keleko letefa-fa. ²⁷ Keing pewe, tewe karengte Keba Ko kete kela atu ma pa pinapa bapalewo. ²⁸ Anara wakotu ja-jawe lewang etu, ehaleng-leng pa rube meme mebe eti bang nene petu watu.'' Ahakelai ana Ritu Ara ²⁹ Kaimpa Yesus hoho kele ahakele te tewe: ''Eka kaleng ara tufu pa ritu hing-hing. ³⁰ Anara ri-ri ing ha lewang-ha lewang ewe hue-engte papa pa elele rangtang eti tewatupa. ³¹ Anaing-angra wakotu ewe ekalengte jaing lewang, ewe lele Ai Jeng Teteke petu watu. ³² Bamuangnya Niwe lengtete ewe, tebamo we tewe bing-bing kate wakotu jawe lewang-wang tu. ³³ Petang pa fitong pe lengtete tu, piti-Nine we pewewe rakawo.'' Metupi Memumu Bang Tete tu ³⁴ ''Me engtata ung pung meme japa lelepa ana ko jatete ete, patejung tangha tuetu, pa memumu petaku etu. Pa, bang ing petete me ana ja nehenete. ³⁵ Pea, bang ing petete tu peete fefe lelepa motu fitong tupa pepawo. ³⁶ Ehu amumu bang-bang pate pa lupompong fanewa nene ung newe nafeng newewe ung newe kekofafa wa ne nene te ja lewang-wangtu pa neruru to ho Keba Ko.'' ³⁷ Petu febang, Yesus jakenalung teba nawo Ai Paake , kaungpa wana rapang Ke kota ing kewe lite pa ketipa i Heng Zaitun. ³⁸ Pa, fetang-tangfa, teba nawo tete e-Ke ifu Ai Paake tuwo ko letelae-Ke.