¹ Neangkhaije Yesus neang yowa Nukeuboke poke Yudea ya mo Yordan wii rang pasi te poke. Domyea tereng mekhaje ere yea sirenyebokhaje. Neangkene bea a useai kerweumi. ² Farisi domyea mewauje, Yesus te u te tuwananyembonte mewaije, mekhaje Yesus te sinanye, "Mana Weyeae Ereiko, mee u poi, do embai nea miyea neisiyeunge?" ³ Yesus yea weumi, "Musa mate injeama wekempe?" ⁴ Farisi domyea yea Wainye, "Musa yea wekeumi do embai miyea neisinyeai tomongpea mokombonde mo angkai neang miyea nengnensinde." ⁵ Neandebe Yesus yea weumi, "Makena erea ne, Musa yea neanta mongkhoke. ⁶ Neandebe, nenda bu khani nea beeme pomo yea, Allah do bere miyea bere Mokhouboke. ⁷ Neangkene, do embai neakho re nenangke re nukengmibonde, ⁸ angkai nea bene oke embai se yeneibonde. Neangkene, neyea doukeje mereng embai se yeibokeje, bee bang. ⁹ Allah yea ikerengmikhonde, domyea yea neate kaye emoroijea." ¹⁰ Neagkhaijea, imea einye, Yesus re u na tomo na yo beneng neang a be singwai-Nye. ¹¹ Neangkene Weumi, "Sinde sande nea miyea te nengnesinde angkhai miyea si dowende, neyea u pekho nea miyea te mokhongeboke. ¹² Miyea embai nea moro te nengnesinde, do site ende, neyea neaima nea moro te u pekho mokhonyeboke. ¹³ Domyea nea pa-pa yaugaimi mewaije, Yesus mee te ikerengminte, neande be Yesus re u na tomona yo yea a khowaimi. ¹⁴ Yesus neang umangkhai khowaije etekheumi mo bea, Nea u na tomona yo te ne a tere khoweumi, weumi, "neang pa-pa asengminde, Deai se neantong maai, sinde neakena nenda pa-pa neai kena maneng wa Allah re yoo waku neai se yembonde. ¹⁵ Deyea mate a tere be Wamare, "sinde sande Alllah re yo waku nenda pa-pa neai kena maneng edowei, neyea neang yo waku eise eyeisiy." ¹⁶ Neangkhaije, Yesus neang pa-pa Keaukoke mo, Nea mee yundang ne Khorweumi mo onomi yeweumi. ¹⁷ Yesus nea nibi a etamung ne Mokhowere mo bea, do embai Neai buko te takhaimeke, meke ototereng dea isenyekhoke angkhai Yesus te sineunge, "Guru Do poi, deye injeama yea mokhotebonde mo wari tena etedowende?" ¹⁸ Yesus yea neang do te weunge, "taikene weyea Deate poi jea wakate? Nenda bu khani na domyea poi aukang ya, Allah nembai tambai u poy Do. ¹⁹ Meyea wari a tuwa meseai ja, domyea e toijea, u pekho emokhoijea, yokho ebeaijea, a neantong pantong ereijea, sinimbu emeseijea, aye ana te buma khorongmimpe." ²⁰ Neando yea Yesus te weunge, "Guru, neang etamung Doikoke nembase nea tokhoro yea mokhoimiyare ya." ²¹ Neande be, Yesus Eiweke neang do te eteunge mo kenabusea khounge angkhai a Weunge, "etamung embai keng weuga na aukang. Nendakhaijea ere, wetamung nembase naise seikore mo neang doi arona papa, miyeanare mengkepa te yeimikhore, neangkhaije Surga na doidera weai se yenaibonde. Neangkhaijea mere mo Deate takhoisebore." ²² Neande be, nea doi - dera neikainye bea, Yesus neang a wekeunge ne kena a te woke, neuga tuwaweungang. ²³ Yesus eiweke pasi - pasei te etere mo Nea u na tomo na yo te weumi, "doi - dera dang ne nekenaije domyea, Allah re yoo waku eyeisiy se khabenaijende." ²⁴ Nea u na tomo na yo kuru-kuru yeibokhaje neang a Wekeumi ne. Neande be Yesus yea beneng weumi, "De pa-pa nakhauge, Allah re yo waku eise neantong bang! ²⁵ Unta embai jarum buru yea neasinoi enensinde, neande be doi - dera bere yo Allah re yoo waku eise neasinoibang eyeisiy." ²⁶ Nea u na tomona yo kuru - kuru bewaije, pa wewe yea khowaijea nea u te - u te erwaije, "Angkhai sinde yea onomi neasinoi dowende?" ²⁷ Yesus eiweke eteumi mo weumi, "domyea te neang etamung neasinoibang, neandebe Allah te bea nembase neasinoimo. ²⁸ Petrus yea Yesus te weunge, "Wejokho meiwe, me yea metamung nembase nukewande mekhande Weate takhoibokhayeuge!" ²⁹ Yesus yea weunge, "Deyea a neatere be wamare, Deai eatene, Allah re akhopeuko kena ne domyea embai tambai nea imea obe neasinoibang enukeiboi, ne akha beake, nemeang, nenangke, neakho, nea keru omi, nea imei, ³⁰ ne beai se mee u 100 dokhoyea - dokhoyea nenda se neanemang eyei -- imea obhe neai beaise, keru pa-pa neai beaise, meangke pa-pa neai beaise, miyea - miyea neai beaise, pa - pa merea-merea neai beaise, seke - buto neai beaise nenda se u buse wa buse yea derengekhonde, bena ya ne mo wa wari tena bona endowende. ³¹ Neande be, bena torona yo domyea dounaje moinya te benaibonde, moinya yo dounyade bena te benaibonde." ³² Yesus be neuboke Yerusalem te naneijeaje. Yesus nea moi jea takhoinyekhokaije domyea pee neaisere khowaije. Yesus beisoke ne u na tomona yo Yaweumiboke aijemo mo Naei uga neai etamung bende yakhande a weumi, ³³ mana maijokho eteng, eyea Yerusalem na nanenjeande, Domyea Keru Imam - imam yunjung bere Taurat yunjung naise yenaiminde. Neande yo yea pekho Mokhonanyende tonaibonde, neangkhaijea dounaije Yahudi domyea bang te yenaiminde. ³⁴ Neate a pekho yea okhonanyende, eiki yea kenakhongkhong de tonanyende, etasuwea yea seangnaije angkhai tonaibonde. Neande be, ya name neai mo be Angnunde." ³⁵ Neangkhaije mo, Zebedeus nea keru wa bee, Yakobus re Yohanes re, Yesus re te mekeije mo Weinye, "Guru, meai kena khonde Weyea meate mee u meai a te diymayesiuge manendea meate Yeimire." ³⁶ Neangkene Yesus yea sineumi, "Tai etamung be Mokhotembompete mai kena te khouge maa yea?" ³⁷ Neangkene Yesus te weinye, "mana yaa meate Weiming sii Weai meuge ne dunembonde mo sii kiyea Wemeri ne dunembonde, We bumakhabang einye." ³⁸ Neande be Yesus yea weumi, "mee meseaibang tai a be diyeuge. Nenda bu Antesinde mee neasinoi anesipe? Deate tanaisesinde bu mee nesinoi tanayensimpe? ³⁹ Neande bee yea Weinye, "mi neasinoi!" Yesus yea weumi, "Nenda bu antesinde khaye meeyea neasinoi anesipe, Deate tanaisesinde bu khaye meeyea neima tanayensimpe. ⁴⁰ Neande be, Dea meuge ne meri ne dunembonde kiya Deyea ereikoi sinoi ja, neande yowa domyea Allah yea aronyetake kiya re." ⁴¹ Neang a botokhaije ne, Yesus re u na tomona do me pea embai ne a tere ya Yakobus re Yohanes re te khowaimi. ⁴² Neangkene Yesus yea keaneumikoke mo a weumi, "mee meseai nenda bu khani na yundante nakhaije yoo Yahudi domyea bang nea me u mokhaije be ernaije neyea nenda bukhani te ikereibokhaje yo maneng. Nea yunjung dea neate tetawaimi. ⁴³ Neande be mai noro na neante maneng ekhoijea. Sinde mai noroyea khabang te yembontena bea, dowende mai abuakho te yembonde. ⁴⁴ Sinde mai norona bena te yembonte kena khonde bea, dowende nembase neai abuakho te yembonde. ⁴⁵ Domyea Keru nenda bu te khani te meke domyea yea Neate mokhonanyen te bang, Neyea domyea te mee poi - u poi see mokhongminde te meke, Nea noo nyengminde domyea tereng neai tore momboise. ⁴⁶ Neangkhaije pokhaije Yeriko ne. Yesus nea u na tomona yo bere neang domyea tereng bumbung Nea moijea Takhoinyekhokhaije otowaije yo bere Yeriko nukeibokhaije, adiy - diy do embai nea do Bartimeus, Timeus re keru, nibi seainye dumboke nekere. ⁴⁷ Yesus Nasaret na re a botoke ne bea, khari te yeinyeboke keaneunge, weunge, "Yesus, Daud re Keru, kenabusea seisekho!" ⁴⁸ Neang domyea tereng dea a seawainye, sirembonte wewainye. Neande be ne beneng khari erea yea siseaiwere, "Daud re Keru, kenabusea seisekho!" ⁴⁹ Neangkene bea Yesus tenguke mo weumi, "neang do keanengengko!" Angkhaijea neang kumba na do keanenyekhokhaije mo wainye, wea kena erea yea! Anyuh, Neyea wetea keaneuge." ⁵⁰ Nea maro kurauboke mo anyuhke Yesus re bete mere. ⁵¹ Yesus yea weunge, "weai kena taise khoyea Deyea weate mokhoteuboute?" Neangkene neang kumba na do yea Weunge, "Rabi, de ijoko te eteterte ya. " ⁵² Yesus yea weunge, "Dere, wea kena erea, wea dabo tareijea onomi yekeuge." Neang see yea mo nesbi nejoko onomi yeuboke, Yesus te takhoinyeboke neang nibi khokho yea ewaije.