(Wali Hameiko-Hameiko A ) ¹ Aka naei baeke naei, Galatia yone nekaube, meyae onaeube? Yesus Walilo henalo mai ijoko bene ohaline habaeikoke. ² Reyea mare a mbai hinerensimbere, meyae hila rabo Taurat walora halaeungele, Allah Naei Roh mare ikembere halaeungele? ³ Makane meyae onaeube? Meyea Allahre Roh walora wali neme henggelem raungehike, mekane mana mai u elaeyae wali himalonnobombere kaube? ⁴ Mehae mekai meyae a foi faeu foi te ehakoinya, bele yoni-yoni hubawaugele, nemene ikainyemo inyaibonde. ⁵ Maehea mekai, meyae Taurat re, itayaeubokene ha eme mai u nolone mokaubene-mai hila rabo haleugele wanembae bele eha eme mokowaube? ⁶ Abraham rena mekai, Allahre nehale yae eleukokene wali himaloungeboke, me beaungeboke. ⁷ Meyae itaea yembombe, Allah na eleyere hilarabo haleijabe ro miyea yae Abraham re orona mena yo yae me baemmobonde. ⁸ Allah re homofeane keleume, Yahudi ro miyea bam na eleyere hila rabo halaeinyelene me baeumiboke, bele yaere Abrahamre na yoboloyae a ukeunge, "Waei eita, rake kanina kelana ro miyea onomi fokha hubanayende." ⁹ Ro miyae, hila rabo halaeinyele yo yaele Abraham yaele, nembainye onomi fokha enaijaronde. ¹⁰ Taurat re hakainyeboke mokate yo Allah yae olomo nemmibonde, haubinebam Allah re homofae ne rake mekai jae moloukoke, "Taurat re mokaite a nemene na nibi-nibi ehakoiboi kiyea re, Allah yea olomo nemmibonde." ¹¹ Mana nayakala hele yaeuboke, Tauratre mokaungelo yo mare Allahre bene nehalere eleikoi sangga, "Ro miyae nahalere nekate yo na rabo halaeitanne wali nekate." ¹² Bele yaere me u mokande, hila rabo halaende yaele Taurat yaele bannele am. "Ro miyae Tauratre mokainyele yo na wali bele einye nekeijate." ¹³ Tauratne moloukoke, "Ohaline hereye ro olomo nainyeboke, bele yaere Kristus aei aerene oki rileuboke, Tauratre horouboke. ¹⁴ Yesus Kristus rake eha mokouboke, Yahudi bam ro miyae nemene hila rabo Naeinya wali hena, kole-kole maemae emahubayende. (Allah Na Ahuwe Rorowounge Yaele Taurat Yaele) ¹⁵ Aka naei baeke naei, yaya walina nekeijannde a mekai jae haberebondere: Ro mbai a nuleibiyoyera, ro ehi yae ohoroiboi hangga, na wanem ebaraiboi hangga. ¹⁶ Mana Allah yae Abraham re orona mena a nuleumiboke, naei oro na mena helem hurende maei a yae eleukoke. Allah rake mekai eleikoi, "...waei orona mena yo yae. " ....waei orona mena ra," Yesusre a yae eleukoke. ¹⁷ Rake niyea me yea itea yembombe, Allah na bemere hele Abraham re rake are heteungokoke, ro miyae ehi yae ehobeiboi hangga, bele nuleungeboke a ro miyae ehiyae ehobeikoi hangga hangga ¹⁸ Haubihi nebam, Allah neai wali himalainyeboke yo yea me baemmilena wali nibire eyei, bele yaere Allah na hila rabo rannda Abraham re rake a heteungokoke. ¹⁹ Mekane Tauratne moloukoke? Tauratne rake aerene moloukoke, Abraham re nuleungeboke a eyae asasi kandekokene. Allah Na u mokoi jae Taurat ekaimokate. ²⁰ Walore bennehande ro, ro mbaitemo bam, na nahale hele Allah nembai. ²¹ Bele mekainya, Taurat yaele Allah are nuleuboke yaele kikine bonoikoke? Bele mekaibam! Taurat wali nibi yae weume, a hele faeu hele yae keleume. ²² Allah re homo fae yae aere ele neumeboke, rake kani kela na ro miyae nemene himire nebamre kelene nekate, Allah Na are nuleuboke a belene wali hena Kristus Yesusre eita ema yaronde. ²³ Aei hila rabo ehubayeikoi he, eyae Taurat eleye mekainye nekandeke, belene Yesus meke aei hila rabo ikeume. ²⁴ Belene, Taurat yae meke ele neumoboke, Yesus meke aei hila rabo Naere halaennele ne hale yeuboke. ²⁵ Mana aei u rabo halei jaele yaendeboke, belene yae Taurat eleyere moi bulennebombe. ²⁶ Yesus Kristus naei a eleyere hila rabo haleungena meyea Allah re kelu omi me baenebombe. ²⁷ Meyae Yesus Kristus re hakaungelene bu kolaeinggokombe. ²⁸ Bele wanemna, meyae Yahudi ro miyae, Yunani ro miyae kaye emoijae, Yesus Kristus mekene meyae mbaite yembombe. ²⁹ Meyea nahele Kristus re holona yona, meyae Abrahamre orona mena ro miyaena, are nuleuboke meyae ensubayembe.