¹ Petrusre Yohanesre ro miyae arilewoye ane weubaimile, Imam-imam, Allahre yo imae ralo imae kayaare hebate yo namekai Saduki ro, mekate, ² a nebam hele mekate Petrusre Yohanisre a yaraimile, mekanebam, ro miyaere Yesus waleuboke a huwaimilene. ³ Petrusre Yohanesre kilaikoke, be bahewoyene kawa einye hilaimikoke hebewote. ⁴ Ro miyae hokolo bee kelewoimile are hila rabo halewate yo nemene 5000 hangga yeuboke. ⁵ Ya heubokemo, falem-falem, Tauratre itayaeiboke yo Yerusalem yone arilewoye, ⁶ Imam Hanasre Kayafas yae, Yohanes yae, Alexander yae namekai imam kabam na aka baeke nemene arilewoye. ⁷ Hokolo bee, Petrusre Yohanesre nolone haimikoke, a hinewaimile, "Hinyerena elae wake yae, namekai hinyere ro yae meyae bele hambum-hambum mokoube?" ⁸ Petrus, Allahrena Roh Kudus yae aungeboke, a weumi, "Meyae Yahudi falem-falem mekaube, ⁹ Mana yaa meyae bee rake ro onomi ikennnele aerene yawaumiboke mekende, bele are hinemmihindere? ¹⁰ Israel ro miyae arilewoye meyae itayembombe, Kristus Yesus Nazaret kanina Ro, meyae ohaline habaeukoke, Allahyae nuluyo-maheyora waleungeboke bele ro yae rake ro onomi ikennele, mana maei bene nare hebeunguke hebeye. ¹¹ Rake Yesus mbai, 'Meyae imaere mokoijaube yo, Ruka nebam woyaube kaye, Allah roke ferei rukare mokoungeboke yeuboke.' ¹² Rake, kani kela mokowoye, ro miyae ehiyae wali nibire ehameikoi hangga, Yesus Ro yae ro miyae wali henare enaiyaronde." ¹³ Yahudi falem-falem Petrusre Yohanesre erewaimile be rabuleiboke namekai ro itaeibam haba bam ro yaere, rake a mekai ro miyaere huweimile, na ubenera elate, hokolo bee Yesus Naei nembainye ohowate. ¹⁴ Onomire ikeimile, ro hokolo bee nembainye hebatene, mekayae rake Yahudi falem-falem elenaikonde. ¹⁵ Petrusre Yohanesre ukaimile Sanhedrin riyaera nekeiboke eubote, Yahudi falem-falem arilasike a mbainye elewate, mekayae hokonaikonde bam. ¹⁶ Elate, ''Mekayae hokolo beere mokomamibondere?Hokolo bee emeha hele yae mokoiboke, Yerusalemna nekate yo nataeimo yaeiboke. eyae ahum eraisi hangga. ¹⁷ Rake a ro miyae ehuwei nekenate maei, eyae a elaeyae umamile nemekai rake Ro yae ro miyae ehire-ehire ehuweijaemo nekembe.'' ¹⁸ Petrusre Yohanesre kaeneimikoke mekete, a elaeyae waimile, Yesusre Ro benem ro miyae ehire ehuweijae, namekai ekeleijaemo nekebe. ¹⁹ Bele yaere, hokolo bee Yahudi falem-falemre weimiie, "Menaei jae hokonggo, mai u benere nakayembe mekai nehale boromayembombe re, Allah Rena a hele foi jae boromabondere? ²⁰ Meyae bee menaei jae eleikoi ohokoi hangga, mekanebam bele mekai maei ijoko yae namekai maei anggaei jae menai borandeboke." ²¹ Hokolo beere Yahudi falem-falem nahibimo nibi baewate eheere inyaimilere, beleyare nibi u erewate, belene hokolo beere hayaeimikoke ewote, ro miyae helem ei molowaimile namekai ijoko erewate rake rore onomi ikainyele. ²² Rake ro onomire ikainyele kaye na ro hu ro yaa, ro u bee moi hayeukoke. (Petrusre Yohanesre Beiboke Hila Rabo Mbainye Halewate Yo Bokore Ewote) ²³ Hokolo bee hayaeimikoke, hila rabo mbainye halewate yo bokore ekete, imam-imam, Yahudi falem-falem weubaimile a afaeu nemene ninae huwewaimile. ²⁴ Hokolo bee na kahiliwa borowate, Tuhanre buma kolowainyele, wanyele, "Tuhan, Weyae yaku buma, bu kela nemene fomene mokowoyae, ²⁵ Roh Kudus yae meke aungeboke, Wa yebaei bubaei Daud, maei yendo kayaaro, 'Mekane rake kani kelana ro miyae aku hoijate, namekai habuhire eyeiboi kayere umfo wamfo beijate? ²⁶ Rake kani kelana ondofolo yoni-yoni felare relenainyelere mokoisa-mokoisa nekate, ondofolo-ondofolo kani mbainyemo arilate nekate, Wali Ondofolore kerenainyekonde nibine baeite.' ²⁷ Rake yona, ondofolo riya arilewoye, Ware kerenayeukondere merau kolainyele, Herodesre Pilatusre nembainye Yahudibam ro miyae yaele, namekai Israel ro miyae yaele. ²⁸ Waei are heteungekokae wanem yembonde yakalambonde ane hamainyele. ²⁹ Mana wenaeija ijoko erame, Wa yebai bubaeite elae yeumele, Waei ako faeuko re humamilere, be kaleimehande, elae yeumele, ³⁰ weyae me nonyonde, ro miyaere onomi mokoimile, namekai hambum mehi-mehi Wa yaebaei bubaeija mokomale yakalanate." ³¹ Ebeli Tuhanre bainyehike mo, nekawate anuwau onyeu isineuboke, Roh Kudusyae mae-mae koumikoke, nahibi Yesusre ako faeuko ro miyaere huwaimile. (Hila Rabo Halaete Ro Miyae Na Wali Mekai) ³² Hila rabo halewainyele yo na riyane, na kena mbai nekewate. Ro mbai naei hambum bae elekoi nekewate, hambum-hambum, kere nale neme maei mo nekewate. ³³ Elae wake, kabam hele abu akore keteumiboke, Yesus waleuboke a faeu elewate huwewate. Tuhan Yesus kena buhae kabam hele bele yore heuboumi. ³⁴ Ro miyae na wali eite kalo emoloiboi nekayeke, nemene heke yaelemo, imae yaele, kani yaele naite haeyeke, roi mo rowate mate, ³⁵ Yesus na abu ako bene raisiyate, ro miyae kalo molounge kayere naei hangga- hangga wahaeimile. ³⁶ Bele mekai mbai Yusuf, Lewire orona mena, Siprus yokobane nekeye, Barnabas yae kaenainyele', ³⁷ Barnabas naei kani hekere mokowoye roi naite heuboke, na roi rouke meke Yesus na abu ako bene raufike.