¹ Ya mbai nekewate hu oke hu ijoko name, Petrusre Yohanesre Allah Na yo imae ralo imaere mekete. ² Ro mbai nenake honggera na oro nimanyekoke nekeweke, kaeibiyate mate. Na yane baei kaeibiyate mate, Allahre yo imae ralo imae mau Gerbang Indah bene neyaeinyele ro miyaere a ritite riyemmilere Allahre yo imae ralo imaere mate yore itiyeumi. ³ Petrusre Yohanesre erewoumi Allah Na imae eite aruleibokene hokolo beere haubihire inyenyelere riyeumi. ⁴ Petrusre, Yohanesre ijoko erewoinyele weinyele, "Ijoko maere ereime." ⁵ Ro oro nimainyekoke kiyae hokolo beere ereumi, na ubene nekeunge hambum mbaite inyenyelere. ⁶ Beleyaere Petrusyae weunge, "Reyae roi ninggi ramena u, beleyaere mekaha ramena rokale mekale, ware iteitere. Kristus Yesus Nazaret kanina Ro, yae ware wawale, anyu, aloinyeko!" ⁷ Petrus bele ro meube mera kelukeunge afae angunuke. Naroko mbai bele ro na oro i elae yaeiboke aloungekoke. ⁸ Belera honoungehike, afe hebeukoke Allahre yo imae ralo imaere hokolo bee yaele nembainye arulaiboke, honsonsi koweke Allahre buma koloungeke. ⁹ Ro miyae nemene ijoko erewainyele Allahre ei molowainyele, ¹⁰ bele ro, ro rainyeboke nayanebaei Gerbang Indah bene nuweibiyoye a ritinye riyeweke. Ei sele molowanyele. (Petrus Ro Miyaere Helem Sele a Weuboumi) ¹¹ Bele ro Petrsure Yohanesre me ehayeikoi, ro miyae helem hakaeikoke na rei mai sele koubate Serambi Salomore mekate. ¹² Petrus bele, ro miyae helemre erewoumi, a weumi, "Israel ro miyae yoni-yoni, mekane maere eraimile fa yae baube, meyae elaube maei elaeya namekai maei hila raboyae nenaeijae, rake ro oro aunguke ohoye? ¹³ Aei yobe-yobe Abraham, Ishak namekai Yakub, oroumauke heraweuboke Kaye, Yesus meyae Pilatus bene kinyauboke, me nokaungele honaibondere. ¹⁴ Bele yaere meyae Ro Nehaele kinyauboke, rore howeke kaye yae meyae hayeungekoke, ¹⁵ Walire yeume Kiyae meyae nemene hauboke, beleyaere ijoko erwaube, nulu yo mahe yora Allah waleungeboke. Meyae na yebaei bubaeijo nekande. ¹⁶ Mai hila rabo Yesusre haleungele yae, rake ro elae rouke, mana ijoko eraungele namekai ro raungele. Hila rabo Yesusre eita meke ma benne rake rore onomi ikeunge. ¹⁷ Aka naei baeke naei, mana reyae itayeubokale, meyae na kobu-kobu hele mai falem-falemre hakaumikoke hombombere mokowaungele. ¹⁸ Allah Na yendo kayaaro ayeng nabena kolowainyele, Yesus nebam relennekonde namekai honaibonde. ¹⁹ Beleneyae ma u osaembombe, moi bulembombe, ma nebam mokowaube hobenembe, ²⁰ Yesus Naei mende yaa mokoungehake, Kristus yae mende ayeng kolowoye, ²¹ Allah Naei yendo kayaaro nabeme hele ayeng kolowaimile. ²² Musayae weumi, "Tuhan Allah mai nolo-u kaikaita ro mbai raeinya wanem walennebonde, neyae a ungembere meyae boronebombe. ²³ Ro miyae bele yende kayaaro elende a faeu e boroi nekenda na, bele ro honaibonde rake kani kelara, rake yoho yonggo ra.' ²⁴ Allah Naei yendo kayaaro bele afaeu mo yae elewate, Semuelre heera meke rake hee. ²⁵ Meyae Allahre yendo kayaaro re orona-menayo yae nekaube, Allah yae meke aei yobe-yobe Abraham re a kolowoumi ukeumi, 'Maei hi ra, orona menara ro miyae rake Allah Na kani kelana yo onomi enaiyaronde.' ²⁶ Allah Na kelu Yesus waleungebokera nabeme hele mai bokore ukeunge meke, mare onomi yeite, mai nolona ro miyae nebam mokoijatera benaibonde."