¹ Ro mbai naro Ananias, na miyae naro Safira, na kani roi naite heibokete. ² Na miyaere na bee mo a nembainye eleikoke, kanina heiboke roi bohi heraweiboke naei u mbaite, bohimo rouke meke abu akore ikeumi. ³ Petrusyae hineunge, "Ananias, mekane walobo wa kena einye aruleufike, karebai Roh Kudusre wabane, kanina heubokae roi bohi raufikae eke honoye? ⁴ Bele kani roi naite eheboi jae, bele kani waei, beleyaere roi naite heubokaera bele kani waei me einya bam? Mekane rake u bene wa kenane aubokae nekeye, weyae ame karebai ro miyaere wabama bam beleyaere Allahre wabanae." ⁵ Ananias bele a mo boroke, ruke na no u yeuboke, hereke. Ro miyae bele anggaei borowate fe hele koubate. ⁶ Hokolo fafa mekate na no kaeiboke, ekate molaisake. ⁷ Hu ijoko name hangga nekaikoke mo, Ananias na miyae Safira meke, neyae itiyam na molo hereke. ⁸ Petrusyae weunge, "Rare a weite, bele kani naite heuboke, bele roi hangga mo?" Safira yae weunge, "Nehale, bele hangga mo." ⁹ Benem Petrus hineunge, "Mekane wa molore a nembainye eleukoke, ame karebai Roh Tuhanre wabaeungele? Wa ijoko ereibo, wamolo ekate molaisake oronou namam ro mau bene honate, ware benem kaeneyeubonde enatere." ¹⁰ Na heki bam Safira Petrusre orowene ruke, no yobouboke, hereke. Hokolo fafa mekate, Safirare erainyele bae, hereke, namekai kaeiboke ekate na molore kelaunge molaisake. ¹¹ Ro miyae ijokore erewate namekai jemaat hokoumeke bele ijoko erewate femako yae faeubate. (Allah Rena Igwau Mehi-mehi) ¹² Igwau mehi-mehi ijoko erewate, Yesus re abu ako mokowate, bele ro miyae na kena mbai Serambi Salomone arilewoye. ¹³ Ro miyae ehiyo rake riyare arulenaibondere, buhae yae hokowoumi, bele yaere ro miyae rake riyare ei molowaimile. ¹⁴ Ro miyae helem, ro ne miyaene rake riyare helem barawate. ¹⁵ Ro miyae ehana bulone kate yo helem yarowaimile nibi enene relewaimile, na u bene nekaimile Petrus mende mo, na unulu yae mo hubanayende, ehana bulone kate yo onomi yaronate. ¹⁶ Namekai, Yerusalem enena nekeijate yo, ro miyae ehana bulona kate yo helem yarowaimile meubate, walobo na u einye aruleisiyeye yo, nemene onomi yae yarowate. (Yesus Naei Abu Ako Kilewate) ¹⁷ Imam-imam yaele namoita ohowate yo yaele, Saduki holona yo, kena hensem mae-mae hele koumikoke. ¹⁸ Yesus Naei abu akore kilewate kawa einyemo hilewaimile hebewate. ¹⁹ Reniyai mo, Tuhan malaikat mbai ukeunge meke, ro mau kawa einya raweukoke, Yesus Naei abu akore yaweumiboke aibaleke, weumi, ²⁰ "Embe, hebembombe, Raei yo imae ralo imaene hebembombe, wali nibi ro miyaere wemmile." ²¹ Ro miyae helem anggaei borowaimile, rene hele Allah Na yo imae ralo imaere arulaiboke belene kelewaimile. Imam-imam, Saduki holona yo mekate Sanhedrin arilaimihike namekai falem-falem riyae, Yesus Na abu ako yawaimiboke na bokore mekate. ²² Bele kayaaro kawa eite mekete bae, Yesus Na abu ako ehubayeikoi. Kayaaro baeiboke ekate na waimile, ²³ "Ekande, kawa ro mau hilaikoke hebate, kayaayo ro mau bene hebate, bele yaere ro mau rawandekoke arulandeboke, ro mbai sambai einye ehubayeikoi." ²⁴ Allah yo imae ralo imae kayare hebeye ro bele a mekai borowatene, onewate, na ubenera elate, mehae mekai jae yeuboke bam? ²⁵ Ro mbai meke mo weumi, Ijoko erembo, Yesus Na abu ako kawa einye hilaumikoke, mana Allahre yo imae ralo imaena nare ro miyaere ekai kelaeimile." ²⁶ Allah yo imae ralo imae falem eke na kayaa yo yaele hokolo bee yaweumiboke na maleu bae mekate, mekanebam feyae faeubate ro miyae helem ruka yae hanyaimikonde yaelene. ²⁷ Hokolo bee yawaimiboke Sanhedrin bere mekete, betamo imam-imam hokolo beere hinaimile, ²⁸ waimile, "Meyae a elakaei sele ukanyembe, Yesusre Ro ro miyaere ekeleijae, beleyaere meyae Yerusalem yo, ro miyae nemene hele kelaeumile, mai kena kaube bele ro bee maei oki meyae kaembombere." ²⁹ Hokolo bee weimile, "Meyae Allahre mo boromande, mare eboroi hangga. ³⁰ Aei yobe Allah Yesure waleungeboke, bele Yesus mbai jae meyae ohaline habaeukoke hauboke. ³¹ Allah rouke na bumane hele, Naei meube refine nuweungeboke, Ondofolo kabamre yeuboke, namekai Wali Ondofolo Israel yoho yonggore yaeuboke, wali nibire yemmilere. ³² Meyae na yebaei bubaeite yaendeboke, Roh Kudus ikeume namekai ro miyae hila rabore halaejate yo." ³³ Bele a mekai hokolo bee elewotene, na kena nebam hele yaeiboke, u bene roukate hokolo beere honaikondere haraeinyeboke. ³⁴ Beleyaere Farisi holona ro mbai naro Gamaliel, Tauratre itayeuboke, ro yaele ro miyae bene nekeweke, aunguke Sanhedrin riyare riyeumihike, hokoo bee moite yawaimibo eibale ba. ³⁵ Gamaliel Sanhedrin riyare weumi, "Israel yoni-yoni, ijoko foi jae erenneko, mekae yae hokolo beere mokommibombere. ³⁶ Nabere hele Teudas aunguke meke, na u maenggeuyae meke kauboke, ro 400 hangga nare hakainyekoke. Bele yaere Teudas haiboke, na moita ohowate riya, here ware uke, olo halo yeuboke. ³⁷ Teudas rera, Yudas Galilea kanira aunguke, ro miyae mere baenete hee meke, ro miyae helem hakainyekoke. Teudas namekai haiboke, na moita ohowate riyae, here ware uke. ³⁸ Bele mekai jaelene, mare utaei itembere, Hokolo bee rokommiko. Rake merau raungehike ro miyae maei u benena, nahinggi bam yembonde. ³⁹ Bele yaere Allah Neyae be isineubokena, mai merau kolaungele he eraisi hangga. Namekai mai merau hokolo bee honggombere raungehike, Allahre yokoijo yembombe. ⁴⁰ Sanhedrin riyae Gamaliel utaei ukeumilere boraiboke, hokolo bee kanaeimikoke, haube remo haikoke, benem a elae hele ukaimili Yesus waleuboke a eleijae nekeneyende, beta hayaeimikoke. ⁴¹ Hoko bee Sanhedrin riyara rei mai sele koubote, mekanebam, Yesusre Ro aerene naei mekai ro miyae mokonaimiyende. ⁴² Na yane baei Allahre yo imae ralo imaene, Yesure holona yo maei imae ehira-imae ehire ohayeke, nobam hebam Yesus a foi faeu foi kelaeimiyeke.