( Nubuatan Dan Bahasa Lidah ) ¹ Romiyea kena buhea uw buhea hemmiyembe bamekai Allahre Roh yea meli mekai yeijeumi relennele yaronggombe-Allah wembe are huwembe meli mekai na be ereite yea erennele. ² Haubihene bang, Hinye a feau mehi mehi elendena-pele kiyea romiyeare pele a weumi bang, Peleyeare Allahre weunge-hiyea ha yea w eleyere onenate haubihine bang Allahre Roh nakena uwne eleye hului jea nunna honayeke hambung huweye. ³ peleyeare Allah neare weunge are huweumi ro pele a rake earene ro miyeare huwoumi, Boronate ro miyea nahila raboelea barambonde neaite kena uw hara rou wemmile neaite, Nawaneng kena foi mokommile neaite. ⁴ a feau mehi mehi eleye romiyea neai hila rabo mo annununde. peleyeare Allahyea weunge are huweumi romiyea jemaat na romiyea neai hila rabore amminunde. ⁵ Reyea kena kale meyea Allah wembe are huwemmile jemaat na romiyea neai hila rabo amminunde neaite Allah weumi are huwngate ro miyea hambung nafoi sele mokate-afeau mehi mehi elate yo mokatera-afeau mehi mehi elende a romiyea mbai na mekai jeale wemmilena-pele a feau feauke elende nafoi sului mbai. ⁶ Aka neai beake neai, Reyea mai bukore melere mo, Maiteai bang efeau mehi mehi yea ukembena, Haubihi bang yembonde-peleyeare reyea mare Allah yea keleuke hambung eme yakalarembombena/ Iteai hebean ehi kelerembena-Allahyea ukeuke are huwkembena-a uwteai waiteai ehi kelerembena, mare na hului hakorembombe. ⁷ Koite beare kate hambung seruling yeale kecapi wali bang. Holona peleyeare kulung yeale-pele hambung bee na mekai bang a koneikondena, Ro miyea pele koi beare ehakoiboi. ⁸ Na waneng filayo amingde raneye kiyea mokonayehande neia are foi eweinya-felayo uw mokoisa mokoisa heere iteaiboi hului. ⁹ Pele mekai mbai meyea ro miyea ehire neaite bang afeau bea wemmilena weainya a haraungebokea neyea iteaiboi sului. Pele a yoni yoni alu bo yere mo wennele. ¹⁰ Rake kani kelana a feau yoni yoni buhi wali kekai sekai, Namekai romiyea na foi iteaibonde yo yeale. ¹¹ Reai neaite pele a feau na mekai waneng haraungeboke eleye-reyea iteayeiboinya, Pele kiyeare yo mei meinya ro reyea eranale, Niyea rare yo hi yang sina ro yea ereuke. ¹² Meyea Allahre Roh yea yeumi meli mekai mai uw ne kitenembomberevreleaungene, Neai foi sele pele meli mekai jemaat na romiyea neai hila rabo amminumbe neaite beambe. ¹³ Pele earene a feau mehi mehire elendere meli mekai ikeunge kiyea pele a feau eleye waneng iteaiyembonde neai meli mekai Allahre ebeline riyennehinde. ¹⁴ Haubihine bang reateai a feau bea ebeli bounge-peleyeare reai uw bene wa bene pele ebeii balire neateai bang hele. ¹⁵ Pelene reyea meahea mekai jea mokorebonde bang ? Neai foi sele na beene beene mokorembondere. Allahre Roh reai kena uw ne eleye yea yeale reai uw bene wabene nekeneitele yea waneneg beene beene Allahre ebeli borende namekai Allahre koibea korenele. ¹⁶ Allahre Roh weai kena uw ne eleye huluinye Allhre bumane keanelena jemaat nolona romiyea ehi pele a feau neaiteai bang iteayeiboi yo ehakaboi sului " amin " elenate hee iteayeiboi. ¹⁷ Meahea mekai horo weai ebeline hleng foi Tuhande banea foi hele-horo , Peleyeare mbainye arilaufike nekaube yo neai hola rabo re eyanyui. ¹⁸ Reyea Allahre heleng foi sele wanale, Hubihi ne bang reyea rembaijra a feau mehi mehi ne heleng eyeleyale, Meyea elaubera. ¹⁹ Peleyeare jemaat nolone, Reai kena kale ro mmiyea ehi yeale yea a ueteai keleremile nahului iteaibonde a meahea mbai jea elerekonde a heleng sele mehi a feaunge mare ehakoiboi sului elerelena. ²⁰ Akaneai beakenai nemene, Fafa felefele neia uw bene nekaimi waneng enekei jea-uw mekai nebang neaite fafa uw bene hului jea nekenayembe peleyeare rake wamale are wali ondofolore eita henaubokeyo yea uw bene nekenayembe. ²¹ Musare walora wali heere folaikoke, Homo feane rake waneng molaikoke Tuhan mbea eleye, Yo hi yansina afeau mehi mehire elate ro miyea neai walora-reyea rake ro miyea a ukemile, Peleyeare rake yo raei are nammam oboroiboi jea nekenate. ²² Pelene hila rabo yeale yore bang peleyeare hila rabo bang yore afeau mehi mehi elate iwau wanende yembonde-Allah weunge are huwei huweite hila rabo bang yo neaite bang peleyeare hila rabo yeale neaite. ²³ Pelene jemaat nanembainye meyarileisiye ye-ro miyea nanemene a feau mihi mehi elembena Allahre Roh yeumi meli mekai neaite itiang romiyea hila rabo bang romiyea mendena-pele mekai elembe boronayembene meyea nanemene keu mbea ambokembe kaube yea neai uw benere nekenaimile. ²⁴ Peleyeare meyea nenemene Allah wembe are huwembe hee, Hila rabo bang romiyea Allhre Rohyea yeumi meli mekai nebang mokate yore na hele elenate-pele huwate ro miyea neai nebang. ²⁵ Nawaneng na kena ei uw einya nunne heraweweke honayeke hambung yoni yoni na yakalane menai yakalande-pelene be are nende , Allahre eite molonnele namekai na hele yea enelende Allah mai uw nolo uw ikainye nekeye. ²⁶ Akaineai beake neai, pele mekainya rake hee meyea Allahre eite molonnelere memarilensimbe hee, Ehi yo hobolo mandu yea kelenaimile ehiyo wali ondofolore wali nibi a uw iteate kelenamile-ehiyo Allah yea keleunge hambung neme yakalaimile -ehiyo afeau mehi mehi elenate ehi yo pele afeau na mekai yakalaimile- pele meli mekai nanemene jemaat hila rabore amminunde neaite mo mokonate. ²⁷ Afeau mehi mehire elembere kena na ro bee, Name hubara hubara yea ehi elenggondera ehi amum yembonde, Nawaneng ro ehi yeale yea pele afeau elaubere na mekai yakalambonde hele. ²⁸ Pele afeau elaite namekaite yakalambonde ro u na jemaat arilensinde nolone afeau mehi mehi elato yo a bang mbea nekenate- nakena uw eita mo neai uwre unggainyele nawaneng Allahre ungainyele. ²⁹ Bee name hului jea Allahre weumu are huwngate namekai ehi yo pele a elenere hului foi jea ranainyehinde. ³⁰ Ro ehi Allah weunge are huwete hee Allah yea ro miyea ehire hambung neme keleungena, Eleye kiyea weannehinde na ehi kiyea yea elende. ³¹ Meyea nanemene na hului iteayembe nawaneng kena hara roronembe neaite Allah weumi are uwngamile yo nanemene na huba hubara a elenaikonde. ³² Allah weumi are huwate yo nahinggin na kena uwne borate are herawenayende. ³³ Jemaat nolona wali bulu malure Allah kena okoi peleyeare wali kena mbai uwmbai yealere-Yesus neai eleuboke romiyea jemaat neai riyane arilensimbe hee. ³⁴ Meyea menagge a bang mbea mo nekenate, A elekoite ewaisiyjea Allah na bere hele ukeunge huluinye neai yun de mekelee uw keleene yea nekenate. ³⁵ a hinnenanyehindere , Pele miyea neangge na molo ware imeane eanimihinende -haubihine bang , miyea neangge mbai jemaat arileufike riyane a eleikote namekai bang hele. ³⁶ Allah yea mai walora neai are eyakalaibo, Nawaneng ro miyea ehi heleng Allahre a feau boraikoke. ³⁷ Romiyea mbai neai uwre Allah weung are huwemmile neai meli mekai mokoye Allahre Roh yeumi meli mekai na hului ehi yeale mokoye hubaungena pele romiyea wo konde Allah yeu ekeuke a mbea reyea moloukokale. ³⁸ Pele romiyea Allah rare ekeuke moloukokale are wo okoinya-pele kiyeare are oboroijea. ³⁹ Aka neai beake neai Allah wembe are huwembe neaite kena kabang mea kombe nekembe, Namekai afeau mehi mehi elei eleite a hung okolommi mea. ⁴⁰ Peleyeare nenemene na mekai jea namekai na hiyei yeale yea ranemmile mokombe.