( Tanda Kekuasaan ) 1 Reai uw mekai wamekai bune wane hamennele, Reyea wali ondofolo re uw mekai wa mekai bune hamanale waneng. ( Tanda Kekuasaan ) 2 Reyea mare buma keamale, Haubihine bang reai neai na hibi hibi bene nekeyayembe wa mekai reainya uw iteai yoni yoni keleamale huluinye nekaube. 3 Rake hee reyea kena kale rake wamale are mare iteaitembombere ro yoni yoni mai yun wali ondofolo, Miyea yoni yoni mai yun molo wa, Namekai wali ondofolo yun Allah. 4 Ro yoni yoni ebeli boi boi hee namekai Allah weunge a huwemmile hee, yun felei yealena, Bele ro neai yunde fee mbea mokounge. 5 Peleyeare miyea yoni yoni ebeli boi boi hee namekai Allah weung a huwemmile hee, Yun felei bangna, Pele miyea naei yunde fee mbea mokounge neai yun hokoli waneng. 6 Miyea mbai pele hee yun feleite ahiyea elendena, Neai foi sele pele miyeare uwmaa rurenainyekonde. Peleyeare miyea uwmaa rurenaikonde yea fee mokonainyebondena, Neai foi sele pele miyea yun felei yeale yea felende. 7 Ro yoyni yoni yun felei yeale yea enede naeite na ijen bang hele. Haubihine bang ro yoni yoni na miyea fafa na yunde yeabokone . Allah na me uw mokoye waneng yea nekate nawaneng Allah kenare koye hului nekate walora Allahre rore ronainyelere omokowainye. Peleyearae miyea mbai na molo neai kenare koye hului nekeye walora namoloro rore ronainyelere imokowounge. 8 Romiyea mbai na isong bang miyea neai uwna yea omokoibo, peleyeare miyea mbai na isong bang kiyea ro neai uw ra mokouboke. 9 Na mekai miyea foi neaite ro mokouboke bang, Peleyeare ro neai foi neaite miyea meangge mokouboke. 10 Pele earene miyea yoni yoni na molowa neai me kelee uw keleene nekate iy bauke yun felei yeale enate, Namekai Malaikat yoni yoni neaijeale Allahre ebeli boijainye earene. 11 Peleyeare Tuhan yeale mbainye nekande waline. Ro na miyeare hskonnele hele namekeai miyea na molore hakonnele hele. 12 Haubihine bang miyea mbai haisong kiyea roi neai uwna yea mokouboke horoyeare pele miyea yeiboke hee ra ro yoni yoni miyea neai kou bulu yahi bihi bulura honate. Peleyeare hambung yoni yoni nanemene allahre ra yeaiboke. 13 Akaneai beake neai miyea yun felei bang mea allahre ebeli boi boite meneai hului kolonneko. 14 Ro miyea na heleng sele na kena uwne hubainye ro uwmaa koko nekende neaite na mekai bang-nare fee mokounge. 15 Peleyeare miyea meangge uwmaa kokona pele neai embei aikore hebeunge. miyea yun feleite uwmaa koko ikeumi. 16 Pele a wamalere romiyea ehi aku honatena, Iteaiyembombe meyea uw mekaite keleammi. Jemaat yoni yoni pele uw mekai keleaumi a huluinye nekate. 17 Mana uw mekai ehi neaite kelerembombere mai jemaat riya yoni yoni arileyaubere ro miyea mbemba foijea isubawainye peleyeare romiyea heleng nebang yea isubawainye. Pele earene mai jemaat riya arileisiyaubere a foi elei sului. 18 Pele riya arileisiyaube einye aku kiteibiyoye naei jeale mai nolone yoho yoho aube naei jeale a boroukokale. Pele boroukokale a ehire reyea nahele yea elale. 19 Yoho yoho kombe walora Allah neai kenare koye holona ro miyea yakalanai bonde neaite mai uw benera nekenayembe waneng. 20 Meyea nana hesele riya mbainye hokoimiyeye hee, Tuhan de bene nekeisi nekeisi neai hamang bulau mbea mokoi biyaube bang? 21 Haubuhine bang, Hamang bulaunge mei anaube hee, Pele hamang maite maite einyuke meiyuke nukaube anaube, Pelene ehiyo namoniye nekate ehi yo yun yambi yambi neumi eikate. 22 Pele uw mekai eimokowaube na mekai bang hele, Meyea imea yeale bambea hamang bu nahului jea anaukoube yea, mai uw mekai mokaibe yea keleaumi Allahre jemaat ane yele kolaumi namekai jemaat nolona hung bang wai bang yo yealere feere mokomibombere kena kaube pele mokaubene mai rabo haleaubere bumane kearembe a mbea alaube ? Mare buma kaiboite na hului bang hele. 23 Rake wamele a Tuhan neneaijea keleuke, Tuhan Yesus kelaite nekate huwea feu mene rouke. 24 Allahre heleng foi ukeungera, Pele feu kayewoye, Na moita ohowate yore iywoumi wa a yeale weumi, Rake feu niyea yarong aneng rake feu reai uw mai earene kinyembokamale iywauke yembonde. 25 Feunge anewatera Yesus koleai mbai rouke mo weumi, " Reai oki Allah are heteungekoke romiyeare waki himalainye boke yo yea me beammile nibi nene eleare mokoungebokale waneng rake koleainya anggur bu niyea na mon ne beai annesimbene," Reai uw bene nekenayembe. 26 Haubihine bang na rokone beai mayea rake feu emanembe namekai rake koleinya bu emanembe mai earene Tuhang hereke yea huwemembe. Neyea beneng bennehonde mende heene. 27 Ro miyae hinye Tuhanre bene nekeisi nekeisi naei hamam bulaunge feu hinye Tuhanre ei ehawaikoijae anengkonde, Bele ro miyae Tuhanre haiboke ro miyae wanem mbai u mekai nebam mokate. 28 Ro miyae naei ure nou hennebondere wa, belera mende belene feu yaele bu yaele yaronde anende. 29 Ro miyae mbai feu yaele anggur bu yaele anende, Tuhan Na u yae aneye eleikoina, na ure nenaei kabei jae mokouboke. 30 Mekane, mai nolona ro miyae helem eha bulo keluweunge koye, helem hereijate. 31 Aei u enaei jae kolannele bae, eyae nebam ehubayeikoi hangga. 32 Bele yaere eyae nebam hubayeikoiyande hee, Tuhan aere keleume, eyae nebam rake kani kela yaele ebei jae. 33 Aka naei-baeke meyae arileisiyaube, hamam nembainye anembere, mate-mate rakembe ba, 34 Ro mbai moni kodena, na foi naei imaera hamam anenggonde mende, mekanebam, u rakei erakei jae. Ehi bum-bum reyae merele hee mo ukembe.