( Petrus Ro Mbai Oro Nimainye koke kiyaere Onomi Ikeunge ) ¹ Ya mbai neke wate, hu oke namene ebeli boi-boi hee mo, Petrus le Yohanesle oro moloiboke ewote Allah le ei momon imare. ² Nebeinye, ro mbai nimanyekoke nenake honokera nekeumeke nayanebaei kaei boyate eimewate Allah le eimon-mon imae romaeunge mate haiboyanye nebei romau naro Buhi Wahi ro miyae Allah le eimom-mom imaere mate yore a ririse riyemile naeise. ³ Nebeisa ere wolemo Petrus le Yohanes nebei Allahle, ei mom-mom imae eise eneyem bondere nebeinye nameremo nekeunge hokolo beere rambunde nyenyelere riyeumi. ⁴ Nebeinye, Petrusle, Yohanesle, hebeiboke nare ere nyelemo a weinyele, ''Maere ereime.'' ⁵ Nebei ro oro nimanyekoke kiyae Petrusle Yohanesle, re na ijoko ereumi narabo halele rare erambum nafaisele kiyaere inyeselere. ⁶ Nebei be, Petrus yae weunge, ''Reyae roi ban hele raei, mena roukale male rambun nda neyae. Kristus Yesus Nazaret ro, naei ro yae wawale ainyu oroye!'' ⁷ Nebeisa, Petrus nebei ro namera ikeleuboke aungunuke. nebei hee nauwga nahibi ele rouke. ⁸ Honosi-honosi kowole, ndire-ndare nebei oroyae orowole ele mele kowole. nahibi, Allahle eimom-mom imae eise Petrusle Yohanesle, eyeuboke moisa, nanggele eweufike eke ele mele einye kowole honsi-honsi, kowole Allah re buma kolowounge. ⁹ Romiyae nemene ijoko erewainye ele mele kowole Allah, re nahibi-nahibi buma koloungene ¹⁰ Nanewanem nebei romiyae rainyeboke wa elate ndi ro nane romau Buhi Wahi Allahle ei mom-mom imae romau enene nekele kiyae mbaija. aritise riyele mbaija fayae bowate late rahebe yeuboke.( Petrus Nebei Romiyere A Uwgoumile ) ¹¹ Nda ro Petrusle Yohanesle mene ikeleuboke waeli-waeli hele beyele ate, romiyae nemene nebei-nebei name ate eraimine hakaikoke namoisa habelate obere yae nebei obe naro Salomo le Obe, ekate eraimile le bae fayae baite. ¹² Petrus, Nebei romiyae helem sele ereumilene, nebei romiyae helem matere neyae a weumi, ''Ae Israel ro miyae rahene maere eraumele fayae baube, nda ma yeuboke re mai ubeneru nekayembe elaube meyae bee na yolo-yolo hele, nenemerau one bele henggobele yo nebeijae mokoneboke nda ro afae angguke orole? ¹³ Borombo Allah aei yobe Abrahambe, Isakle, Yakoble, nanewanem Allah yae nenda a ukeunge waei orona mena walora romiyae onomi enaiyaronde nebei kiyae neyae wali ondofolo Yesus, royae mayae kinyauboke ahiyae elewaube Pilatus hayennekondere elewole be. ¹⁴ Nebeibe mayae na omoni hele, nehesele, yolo-yolo kiyaere ahiyae elewaube ro miyare boweke howeke weitasi koweke robe ondofolo Pilataus re riwuunge hayenekondere, ¹⁵ Nahibi mayae Wali Ondofolore Wali yemele kiyaere hauboke, nebeibe Allah yae nare waleungeboke here yo naei unolo ukaisa, nendae a elale meyae nda neyea maei ijokoyae erewande yo. ¹⁶ Nebei mae hila rabo naei ro eisa, naro neyae Yesus, nenda ro nauwga nore onomi lea rouke, mana mayae ijokore eraunge. nanemerau hila rabo emekai bele randa nare halaendene neyae emekai sele ya mokoungeboke nda rore aei ijoko einye. ¹⁷ Akanaei baeke naei, mana reyae isaeyeubokale mayae, mai be yunde naiboke yo nemene onaeukoke hele nebei meu moka waube. ¹⁸ Nebei, Allah yae namemae naei yenjo kaya yo naei euwara a nuleungekoke wali ondofolo beko huban, nenggonde naei nahului yeuboke. ¹⁹ Nebeinye nulu kembombe, bembombe mai beko bako mokaweke kena buhae henenggombe nemefainyenembombe. ²⁰ Nane merau Wali reimai Naei be mendansinde einye nanwanem Kristus oroumau herewengeboke hiyae neyae wali ondofolo Yesus, ²¹ Neyae surgane nekende mende Allah naei hu ya menne bende ya a naei yenjo ka yoyo yo lai boke yo yae a faeu nulainyekoke. ²² Musa yae a leukoke,'Yesusle naeise Allah yendo kayaro mbai raeinya wanem ro hi mai nolora ranenjende nabei yendo kayaro a menelende nemene now hembe. ²³ Nda yendo kayaro, yae menelende a oboroibo kiyae, Allah le homone mate yo naei nolora hukenainye hinde.' ²⁴ Nebei yenjo kaya yo are elewate yo, Samuel le hera benen namoisa yakaiboke yo nemene mekande nda hee nekande ne ayen akaya kolate yo. ²⁵ Mayae neyae nebei yenjo kayayo naei orona menayo nanemerauw Allah yae a heteungekoke yobe Abraham de, 'Ukeunge afaeu waei orona, mena nemene hurende nalende nda kani kela kuikui mae-mae ensononde.' ²⁶ Allah, na yebaei bubaei Yesus wali ondofolo waleu ngebokera mai unolo ukaise ukeunge meke naberei se naere hole molo wombe ro miyae helem nawali beko helera foise baei meke.''