( Yesusle Abu Ako Bele Yahudi Naei Agama Yun Bele ) ¹ Petrusle nebeinye romiyae helemde ane uwgoimile yae, imam-imam, nebeise mekate naei bokore nebei hului mbai Allale, yoimaere kayare hebate naei yun Saduki, ro miyae nanggele mekate. ² Nebeijore ham fela hele kaimi era buhineban, hokokobee mekete Yesus le einye herenate yo benen emiwalende here yo naei unolo ukaisa. ³ Nebeinye, Petrus le Yohanes le re ikelaikoke yawamiboke ekate ruka bulune romiyae haeimile anuaus ekate ahae mikoke erabuhibam reniai youbokene. ⁴ Nebeibe, romiyae nebei a faeufe boro wate yo helem hele hila rabo bele bewate, na helem hului kolowainye bae roremo nemene 5000 hele. ⁵ Ya heubokemo nebei, Yun-yun, hebewate yo rorelo uwga hweiboke yo, Allah yae wali here foloukoke hubara heaise yanewainye le yobele nemene mewarile fike Yerusalem ne, ⁶ Nebeinye Kayafas, iman kaban Hanas, Yohanes, Aleksander, nanwanem imam Kabam naei yohona naaka baeke nemene. ⁷ Neyae Petrus le Yohanes lere nebei nolone, haimiboke a hinewaimile, ''Nde elae yae nanewanem dele royae mayae bee nda meure mokoube?'' ⁸ Nebeibe, Petrus, Roh Kudus, yae mae-mae, ''Koungekokene nahibi hele nebei yore a uwgoumi, mayae nda yun-yun yo nebe hului mbai mayae nda rorele uwga hera mauboke yobele. ⁹ Manaya maere mekaube hinaume baeume nda meu aerebammae waume nebei meu mokondebokere, mekaube bae maere hinanume bekobe meyae omokoiboi foi be mo kondeboke nda ro male yambi neke wolera mana onomi elae be rouke nebei be hinaube? ¹⁰ Nebeinyana mana mayae nda Israel romiyae ne mene isaeyembombe nebei Kristus Yesus, Nazaret, na ro mayae ofalene baukoke kiyae, nebeibe Allah yae here yo naei unolo-ukaisa waleungeboke kiyae le ro yae, mana nda ro mai bene hebele eraunge neyae onomi rouke. ¹¹ Yesus mana neyae: 'Nane ruka kinyauboke wokaube, imaere obere hembombere mokaube yo yae, neyae mana kusei mahei ban rukare yeuboke.' ¹² Nebei, hului mbai wali hena nibi honole mbai hambai uhele nenda kani kela nekande einye nembai hele ro rouwgoboke oroumau herawengeboke wali ondofolo yae ro roungeboke naei eisa wali hena emayaronde.'' ¹³ Nebei holona yo erewaimile Petrus le Yohanes le berabuleiboke fe efaei nebei are elaekeisele yae elewotene, nemene isayaeiboke elate eraumile.Nda, ro bee makaisa isaeyeikoke be isaijae eumi meleke elete nda robee wali ondofolore elete kiyae naei nanembainye orowate. ¹⁴ Nane wanem, erewainye onomire rouke ro Petrusle Yohanes le bokone hebeunge hebewole erewainyene nebei holona yo abam faeubam yaei boke ¹⁵ Nebeinye nda holona yo aremo riyane arileufike elaikoke mo Petrus le Yohanes le ukaimile sanhedri eibalekemo, ¹⁶ Elate nda robee re nendae wanemae mokomami bonde? rabuhinebam, nabei nabuhi wahihele baete yakate nanewanem emekaibeleyae name umokote Yerusalem nekate romiyae, eyae nekande yo nebei ame-ame yae elemakondere nahului bam. ¹⁷ Nebeinye, nanenda a faeu elete meukeleiboke be hurende kaewende neebu be henggonde bele nende na romiyae nolone eyae aloekei jae umamile hee nemamile benen nebei ro ndene ro miyae hire-hire ehuweijae hele.'' ¹⁸ Nebei samo, Petrus le Yohanes le, re kaenaimikoke mekete nahibi hele yae a eleakeisele uwgaimile nebei wali ondofolo Yesus le a eleijae nanewanem isaei hebaem rore miyaere ekeleja hele. ¹⁹ Nebeibe, Petrusle Yohanesle nebei holona yore a uwgoimile, ''Maya hokonggo, makei kiyae naei nahesele Allah, yae elele kayero boro malere? nebei mekainya mayae nabuna hele Allah mai helenaya. ²⁰ Mayae, nahului bam maei ijoko yae erewande nda anggaei jae borowande a faeu be elande.'' ²¹ Hokolo, beere a huku-huku kaimikokemo nebeisa waeimihi ke hokolo bee ewote rabuhine bam hokolo beere ehee bukulure inyaimilere nibibam baekate anne. ²² Rabuhine bam onomire rouka role uwgane naayaka hele yakaubokei nebei ro naralo yakama rorele u bee ( 40 ) Yeuboke. ( Petrusle Yohanesle Beiboke Naei Hilarabo Mbaise Nekate Yo Naei Bokore Ewote ) ²³ Nebeisa hayaem kokera Petrusle Yohanesle oro moloiboke naei holana yonaei bokore ekete nebei imam yun-yun rorele u herawaiboke Yahudi naei agamare kelaeimile yoyae naafaeu uwgaimile be naei holona yore ayaka uwgoimile. ²⁴ Nebei a anggaei boroikokera nebei yo nakenambai jae roukate Allahre ebeli bowainye''Tuhan wembai hele nda kani kela bu yau bu mayaku mokowo yae neiya hawamawe yoni yoni mbai eheisoi nahului huluinye mokowoyae. ²⁵ Roh kudus, maei yobe Daudle euwgrara nda a eleukoke rahene romiyae nakanira - kanira merau kolainye rabuhibe mehinin mewalo koloinye? ²⁶ Ondofolo yoni-yoni mokosa-mokosa, naei be yunde hebate yobele nemene riyanemo ari late, Tuhan nanewanem eleuboke oroumau heraweungeboke kiyare melenaiinya hanelere.' ²⁷ Nahele ya nda yona yo, Herodes, Pontius Pilatus, nanewanem yohi-yohira mekate, Israel ro miyae bele riya mbainye arilaisike. ²⁸ Nebei mere ure mokonaibonelere waei meyae mokoubokae nanemerau weyae merau raungehikae nda wanem yeiboijae. ²⁹ Mana, Tuhan eraemae na ahuku huku maere kaime nebeinye Tuhan meyae waei abu ako alae yeumele be kaleu mehande meyae buhae ahokoi fe afaei waei ako faeuke nahibi mo elemande huwemandere, ³⁰ Weyae ei aumobonde waei me nene wae-wae me noungonde rambun emere-emere nabuhi wahihele benate yakanate erana bulonayo onomi yaronate waei ufoi yolo-yolo Yesus le ro yae.'' ³¹ Nebei, a riwai anyeu wanem mae hine wole nebeiyo nemene Roh Kudus, maemae hele kosumikoke nahibi Allahle ako faeuke huwaimi yeke fer afaei. (Hila Rabo Bele Romiya Nawali) ³² Nebei, hila rabore halaei boke romi yae nakena mbai umbai yaei boke rambun-rambun, eba he romiya bolu aerere ekelei nanewanem naeiyae elenabei nanemene naeiyaei elewate. ³³ Nebei, be Yesusle abu ako one henggobele yaeiboke arefaeufe nebei rande hebeiboboke wali ondofolo Tuhan yesus waleuboke arebae no bam heban hele huwaimile. ³⁴ Romiyae nebei nolona yo hiyae koukalo u lele nekewate rabuhine bam romiyae kani bele kela bele yo nai mae obe ne ka yeke naise heyake nebei me eimokoiboyule kiyae nebei rambun me baeise rowele nahibi hele, ³⁵ Rowele mele nebei, Yesusle abu ako naei orowanemmo mei kolate nebeisa wahaete ro miyae nakoufekalore hubange hukuinye. ³⁶ Nebei hulumbai Yusuf, Lewi yohona ro, Siprus, na nenda abu ako yae kaenainyeoke, Barnabas kena foi ufoi se 'mokoumiyeke romiyae re', ³⁷ Naei kani naise heuboke nabei heuboke na roi nemene rouke meke nda abu ako naei naei oro wene raufike.