Pasal 8
1
Ku ganemot nogo, Woy Wali Iram go nebut ganemot kalik, don iram Yehuda go, don woy woy go, don taitisopuitgo, nabi-nabi go don, gano sikabung Yerusalem so suing go don mu ba sik sogo blo sono mea idok go ta.
2
Woy go nemu no mea iti, banu go nemu no gano ple sedue ut blo sogo banim no mot lo klum go nemu ku no, mot lo duk go, mot lo mlak go, usi go gano susubu unuik go nemotnang no. Naklay ngga mea kua yaluim gano nan mu ba nogo mea kua tui; nemotnang usu no PUPUK so mea lemoi .
3
No sikabung naklay maning suing go ngge sikabung tasam piam go so pluok go nemotnang lo kebong sogo-a mea duing, Genam lo nemotnag yet go sip nogo. Woy Wali Iram go nebut ganemot kalik.
KONKEBAMLING GANO IDEKEBA TALING GO
4
Mot lo nemot nang no se pen-sing: “walinebut Wali Aya sik sogo gekalik: sikabung mo kenong, tendali go mea kua bong go ip? sikabung mo pai-sing go tendali go mea kua iwot?
5
Sogo kalik go sikso saula ngge pai-sing, senang so pai-sing go? Nemotnang mea kua iwot.
6
Genam mo ikum gano mo tup: nemotnang go nebut seni so kua pen! Tasam piam go sik sogo teguot glung kua, gano pe-pen: genam lo sogo pluok tu! kekap go nogo nemotnang pai-sing, KUDA ple bano degut go kalik.
7
Wi ranggung blo lo klong go naklay mo senong nemot go ku, wi tekukur, wi layang-layang, gano bupalo, nemot ku iwot nang sogo no mo mlak,no-esang Genam go blung Woy Wali Iram go demu kua senong.
8
Sgokalik so nebut don eygo ya pu: genamnang kunala kalong ey, gano genamnang Woy Wali Iram go demu gabe? Seni so, sam so klik go wamoi mlue so sam wamoi sogo mo klik.
9
Sikabung kunala kalong eygo suongsut mea, blo nogo ey mea pling gano mlak. Seni so, nemotnang walinebut Woy Wali Iram sik sogo mo tenget, ganemot sgoso kunala kalong sogo kalik go nemotnang ba sogo?
10
Ganemot kalik go sikso nemotnang go senun nang sedue meno sono mea iti, nemotnang go usu PENJAJAH sono. Seni so, seguey go sikso iti go babu go no pung, kukenan go seni senguong-a uwet; nabi gano taitisopuitgo naklay wamoi mlue nemot-a pupluok.
11
Nemotnang lo Genam go blung go kaguit go kuo tasemu suey genang sogo suey so kua semu, nemotnang lo pu: teguop yakay! Teguop yakay! No teguop yakay-a kua.
12
No nemotnang suongsut ey se, tasam kua seni go pluok go sik sogo; no nemotnang suongsut kua gano kon kua senong. Ganemot kalik go sikso nemotnang mea kenong sikabung kenong go bano nemotnang di no dak go kalik so mea ku nemotnang idekeba taling go nogo, walinebut Woy Wali Iram sik sogo ganemot kalik.
13
Genam nemotnang go seni idok so, gakalik walinebut Woy Wali Iram sik sogo, no anggul seni kua anggul nuik ba sogo, ara seni kua ara nuik ba sogo, dop yamso mo bluong; ganemot sgoso Genam lo sikabung mea taling-sing nemotnang kenok genang sogo.
14
Sgokalik go sik so imot nemot-a susuing? Yaluim-a gano imot ya klong go KOTA don eygo no gano piam genang! Woy Wali Iram imot no piam go mea taling, imot no ip kua seni go mea iti go drop, imot konkebamling Woy Wali Iram No mo pluok go sikso.
15
Imot teguop yakay so bubung, no teguop go kua pung, suey go ku so bubung go, no kua seni go-a gemang!
16
Yaluim-a gano imot ya klong go KOTA don eygo no gano piam genang! Woy Wali Iram imot no piam go mea taling, imot no ip kua seni go mea iti go drop, imot konkebamling Woy Wali Iram No mo pluok go sikso.
17
Imot teguop yakay so bubung, no teguop go kua pung, suey go ku so bubung go, no kua seni go-a gemang!
YAWI YEHUDA BLONO GANO YERUSALEM
18
Mea kua suey gunuing mot no lemoi go, genam go dabui iseng ey.
19
Tup-a! kaguit Genam go saula go ngga usi go tebok sogoso kukenan kuet dega go sikso: Woy Wali Iram Sion sogo kua? Ganemot ba sogo iram kua? Sgokalik go sikso nemotnang lo Genam dabui iseng nang sogo-a tetaling, nemotnang go sana-sana sik so, demat demat suk meno seni kua go?
20
Seni buo genang sogo ku mo pung, woydalu mo yam, no imot maning kua sesuoy!
21
Genam go saula go kaguit kuo sikso genam go dabui kuo ey; genam sung usene, genam piam go lo mlak go.
22
Balsam kua Gilead sogo? TABID kua ngga sogo? Sgokalik go sikso genam saula go kaguit go kuo kua suey?