¹ Pung-go kap, ey sikabung Benyamin, Yerusalem sik sogo. Kabui u Tekoa nogo gano koy ndup se klak Bet-Kerem blo nogo senong genang! Kukedik go ngga teguom go dun sik so. Seni kaem ganemot ngga u-weng go. ² Kabung kaguit Sion sogo kerlam, sip suey go duing go kalik. ³ Menai yai so susuing go menai nemot ey mea idok go klong? Nemotnang lo bala mo klik-sing ketang lo. Nemotgo-nemotgo so sogo-sogo mo tegu go ganemot kaiso mea dam go kua. ⁴ “ ple tui so gabe nemot ey; wenga, imot ple srom sogo woy nesip no, imot mea piam woy sut yam no, woy kin susut yam nogo ngga. ⁵ Wenga imot yaklong goku klik gono ple sruom sogogano yai-so suing go sip mea piam. ⁶ Ganemot sgoso Woy Wali Iram go nebut gekalik: di naklai tuo-a gano nan se duk tema so lemoi genang Yerusalem no! Ngga KOTA idekeba iti genang ganemot ba sogo piam senguong-a pupluok. ⁷ Bu min pung go kalik so, ganemot kalik dali so KOTA ngga nemot go piamja sono taling, plesagui, tasam-tasam piam go naklay KOTA ganemot bano gemang tup gano gemang ikum. ⁸ Ey Yerusalem ngunguok go se melak, ganemot sgoso Genam go saisuk mea kua lek mot sik sogo, gano mot kukenan sikabung kua suing goso lemoi genaning. ⁹ Ki Wali Kumam go nebut gekalik: sikabung Israel naklay se buo, anggul seni sikabung lo buo go kalik. Tandali teguey go sikabung anggul so buo go kalik yamso naklai kali ba-nang ey u-wet go se buo. ¹⁰ Nondo no nebut ya pen-silu, nemotnang ikum genang sogo? Seni so, nemotnang go kama saduisuk kua tong, nemotnang wali nebut kua tup, kama dimang ey, wali nebut sogo nemotnang kua duing. ¹¹ No genam naklay damoi go Wali Aya go nat lo, ganemot genam lo duo demening tui gono mea mot tap ketang no, gano sikabung naklay yaluim gono, seni so naklay sedue kabung, sedue seni kabung nalo yamso mea melak-sing. ¹² Nemotnang go yap sikabung meno go yap so mea lemoi, naklay usu gano nemotnang go senun nang ey, seni so Genam go ta gabe leguit sikabung kukenan ngge sogo blo sono, Woy Wali Iram go nebut ganemot kalik. ¹³ Seni so seguei go sik so iti-go babu go no pung nemotnang ba nogo naklay kukenan lo duduing go seni so u-wet, naklay nabi gano taitisopuit go naklay wamoi mlue-a pupluok. ¹⁴ Nemotnang Genam go blung go kuo tasemu suey so kua semu, nemotnang lo pu: ngengam yakai! Ngengam yakai! No-esang ngengam yakai kua. ¹⁵ Nemotnang suongsut ey se, kua seni go pluok go sik sogo; no nemotnang suongsut kua gano nemotnang go kon kua senong. Ganemot sgoso nemotnang mea kenuong Genam lo idekeba iti go sikso , ngga Woy Wali Iram go nebut. ¹⁶ Gekalik Woy Wali Iram go nebut: mot go sip se-ikum tap tap lo, gano tap banim go se usi, tap suey go nagoso ganemot lo se klong, ganemot kalik go sgo-o mot go dabui lap suey so mea. No nemotnang lo pu: genamnang kua pung ganemot logo. ¹⁷ Ganemot no nemotnang yai suing genang so, genam lo mo taling, Genam lo pu: kabui kluim se tup, no nemotnang lo pu: genamnang ikum sogo moiso! ¹⁸ Ganemot sgoso se tup , ey saula-saula gano se snong sikabung, sgokalik go ya lemoi nemotnang blo nogo! ¹⁹ Kukenan se tup! Seni so Genam lo saula ngge blono idekeba mea taling nemotnang lo duing go atuia sik sogo, ganemot sgoso nemotnang Genam go nebut kua ikum gano genam lo ngunguok godabui bano kua king dabui ba nogo. ²⁰ Nemot go seni sogo mot lo kemenyan Syeba sik sogoiti go weng go gano min suey go kukenan kukua go sik so iti go weng go? Genam mot lo taiti koy puit go sogo kua duing gano mot go taiti tong go ngga Genam go dabui nogo kua duing. ²¹ Ganemot sgoso Woy Wali Iram go nebut gekalik: seni so, genam demu masi kling genang sogo saula ngge go nemu ku no mea tui, nemotnang knuong sogo, aya nang ey denok itat ey, yap tenglam gano andua naklay idakoy lo mea kuim. ²² Gekalik Woy Wali Iram go nebut: seni so, saula meno dun sikso mea u-weng, saula tang kangok go mea weng-lak kukenan seding sik so. ²³ Nemotnang suon gano ple ey mea mlak, nemotnang ngga kua seni, klum kua, nemotnang go nebut beap alui iti go kalik, nemotnang KUDA eygo kekaiso mo semu sedue ple srom sogo kalik, ey kabung kaguit Sion, nemotnang mot ple srom sogo!” ²⁴ Genamnang deguo mot up, genamnang go ta mo wakot; genamnang dap go, genamnang iseng ey tra go kabung duo tui sogo kalik. ²⁵ Usu no kua klong, gano tap logo masi-masi sogo kua u-wet. Plesi go tengang kaluang iseng pung go nggasik-nggesik!” ²⁶ Ey Genam go saula go kabung kaguit, amblekeba sron gunuing kok-a gano sung balo tegle-a! gunuing suing-a duo klaya goso u kluo go kalik, idekeba taling genang sogo sedue pung so gemang.

²⁷ Genam lo mot mo taling yatrang iti genang sogo Genam go blung nogo, mot se snong sgokalik so ya u-wet nemot go seni, gano yatrang iti se taling nemotnang go tasam senong genang sogo. ²⁸ Nemotnang naklay ngga mea kua tup go duk nebut wamoi mlue so pen klong go, nemotnang tasam piam go-a pupluok go! ²⁹ Puputan mo pung go, no koy ba sik so pung go tima seguo sogo, tembaga, gano besi, seni kua senang so kua iwot, no sikabung iseng eygo mea kua nega. ³⁰ Nemotnang no pu genang sogo perak tenget go, ganemot sgoso Woy Wali Iram lo nemotnang tenget go.