LO ITI GO KENG GO WOY WALY IRAM NO

¹ Woy Waly Iram go nebut: sedue lo nemot go senun tong go itak go kalik, ganemot no kabung ganemot klong go, sedue meno dali go senun so lemoi, e gano kabung ganemot nemot go kenin banim go ga, ya iwot tendali kabung ganemot iti go nemot go senun so go ya lemoi? Kukenan ga tasam piam go ganemot-a pupluok, tasam piam go ganemot lo yam so mo waluk? Mot kamea kabung, sedue mata sogo ey tasam ganemot mo pluok, ganemot no geasui go gemang pluok tegoi tendali Genam mit sono weng sgo? Woy Waly Iram go nebut ganemot kalik. ² nemu itiya di kwa go medium blo lo, ikum-a! nagono mot kamea kwa pluok? Tap tap ketang logo mot suing go sedue so bubung, sedue Arab kalik kaseglok pay sogo. Mot lo kukenan kamea nemot pupluok go lo yam so mo waluk gano tasam piam go. ³ Ga sgoso, sa kangok go don ey go ktok go gano sa yagui sa yam nogo kwa weng. No mot go suongdon ngga kamea kabung go suongdon, mot suongsut kwa. ⁴ No, ngge dimening seni Genam so usi santo go: ago Aya! Mot nnga at go andua maning nok go nogo! ⁵ Mot go nat nemot maning so ya maning, Mot go dapiam maning so ya gigit? Mot logo nebut Genam sono go ganemot kalik, no, mot tasam piam go maning ne pupluok.” EY YEHUDA EY WOY WALY IRAM NO TUHAN WAWI GO IWOT-DAK

⁶ Woy Waly Iram genam no nebut pen go iram Yosia lo Yehuda no iram so suing go ku no: Mot mo ikum, sikabung Israel lo tasam pupluok go, kabung nat go ganemot, sgokalik so nemot medium di kwa go blono kelak go gano di kangok go balo suing klong go kamea sgoso? ⁷ Genam lo duing: tasam ga nemot pluok go nemot tandali genam mit sono mea weng, no nemot kua weng. Tasam ganemot Yehuda logo mo ikum, kabuisro kekengduk kua go.

⁸ Nemot ikum go, nemot go kamea sik so Israel Genam lo mo tong itak, kabung nat go ganemot, gano sam Genam nemot ey kenin-senun so tong genang sogo gemang iti; no Yehuda, kabuisro kekengduk kua go ganemot suali kua tra, no waiso kamea nemot dali ne pupluok klong. ⁹ Kamea teteba pupluok klong go ganemot lo kukenan yam so waluk gano kamea semu klong, di nogo demu nogo ta kokong klong dali. ¹⁰ Naaklai ganemot sik so Yehuda, kabuisro kekengduk kua go,tandali Genam sono dabui lo kua iwotdak, no wamoi mlue so iwotdak go, Woy Waly Iram go nebut ganemot kalik ¹¹ Gano Woy Waly Iram lo genam no pen go: “ Israel kabung nat go ngga, nemot lo nemot go sasuik-a seni so suey go kalik Yehuda sik sogo, kabung kekengduk kua go ngga. ¹² Klong-a se pepen klong nebutpen ngge nemot dun sono, ngge kalik so se pen-analo: Tandali teguey-a, ey Israel kabung nat go, Woy Waly Iram go nebut ganemot kalik. Genam go nebuemnemu mot sogoso yakua naglong, Genam ngge gigling klum, Woy Waly Iram go nebut ganemot kalik, yakua nat mani so mani. ¹³ Mot tasam piam go-a ibe sono se pen, mot kua kekengduk Woy Waly Iram, mot go Waly Aya nogo, kamea sogoso tetbadali di balo nang lo kamea pupluok klong sikabung meno-meno ey. Ganemot nogo Genam go nebut kua tup. Woy Waly Iram go nebut ganemot kalik. ¹⁴ Teguey-a ey denok itat nat go, Woy Waly Iram go nebut ganemot kalik, ganemot sogoso Genam woy so mo lemoi mot no! Genam mot mea iti, sikabung klaya kota sik so gano sikabung namon yap tenggelam klaya sik so, gano mot sion sono mea wawi go klong. ¹⁵ Genam lo mot nogoso mea kuoy-sing kunala sedue Genam go dabui nogo ey duing go; nemotnang lo mot yai suing genang sogo kunala snong balo gano iguong balo mea suing. ¹⁶ Ku ganemot nogo motnang mataso mo lemoi gano duo mo tui-sing kukenan ngge nogo, Woy Waly Iram go nebut pen, ganemot kalik go sik so sikabung tabut tegadi dok go Woy Waly Iram ey sogo mea kwa pen. Ngga dabui ba nogo yakua pung gano sikabung logo yakua duduing; sikabung ganemot sogo yakua uwet, tandali yakua klik dali. ¹⁷ Ku ganemot nogo Yerusalem iram demu so mea pu,gano saula-saula naklay ganemot no mea yaluim-sing, Woy Waly Iram go sui sogoso Yerusalem no mea klong, gano nemotnang go tasam nemot nang go dabui piam so pupluok gono yakua duk. ¹⁸ Ku ganemot nogo sikabung Yehuda sikabung Israel mit nogo mea klong, gano nemotnang kerlam-kerlam so mea weng kukenan dun sik so, kukenan motnang go babuasi no nemot tite sogo nogoso wasey go ganemot sono. ¹⁹ Genam lo duing go: Seni so, Genam lo mot At go duo nesip basono itak genang sogo gano kukenan nemublup go iti genang sogo mot nogosogo naklai teguop seni go saula-saula sik sogo. Genam lo duing: mot lo Genam so usi go: at go Aya, gano yakua teguey Genam no duk go sik sogo. ²⁰ No seniso, senun kalik nemot andua no kua kekengduk go kalik so, ganemot kalik dali motnang Genam nogo kua duk, ey blung Israel, Woy Waly Iram go nebut ganemot kalik. ²¹ Tup-a! medium medium di kwa blono u-kukluo go u-usi go denok-itat Israel sik sogo, nemotnang tap piam go kuoy go sik so, gano nemotnang Woy Waly Iram, Nemotnang go Waly Aya mo kay-sing. ²² Teguey-a, ey denok itat nenat ey-go! Genam lo motnang nat sik sogo mea pali-sing. “Ngge genamnang, genamnang Mot mit sono weng go, ganemot sogoso Mot lo Woy Waly Iram, genanang Go Waly Aya”. ²³ Seniso, medium-meduim taiti so puit go ngga wamoi so mlue go, seni medium-meduim bloso gegluek-go! Seniso, Woy Waly Iram, imot go Waly Aya senguong-a Israel suey genang! ²⁴ No demat suongsut ey go sik so, imot go seni babuasi nang logo ganemot lo mo gud-sing imotnang maning neguot go sik so; nemotnang go kambing domba gano nemotnang go lembu, sedue denok itat gano nemotnang go kabung denok-itat. ²⁵ Ganemot kalik go sgoso imot suongsut ey mea sdek, gano ney-a imot go kon lo imot ey mea kebet, ganemot sgoso imot kon Woy Waly Iram, imot go Waly Aya no mo semu, seni imot gano imot go babuasi neguot go sik so iti go e-geasui gono mo pung-atun; Gano imot Woy Waly Iram, imot go Waly Aya nebut kua tup.”