¹ Waly Aya go nebut genam sono pen go, gekalik: ² Klong go sikabung Yerusalem no se pen-analo: Waly Aya go nebut gekalik: Genam mot go klum maning neguot sono go ey duing go, mot go klum banim go Genam nogo ku wip dok go nogo ey duing go, sgokalik golo mot ku ganemot nogo duk Genam nogo kaseglok pay logo, sip ngga usu yakwa semu. ³ Ku ganemot nogo sikabung Israel klaut so Waly Aya nogo so, didon bungaran kalik nan ba sik so pung go, sikabung naklai didon ganemot dam go, nemot nang ey piam. Kwa seni go nemot nang blo sono ta. Waly Aya siksogo nebut ganemot kalik. ⁴ Waly Aya go nebut setup, ey mlena Yakob, ey mlenawalasrang Israel naklai, yap tengglem mono sik so iti go yap tengglam mono no. ⁵ Waly Aya go nebut gekalik: sgokalik go kuklue a genam lo mo pluok tumot go babuasi sono, ganemot sik so nemot nang kuet sono klong. Di demat piam piam go tebadali gono duk, ganemot lo nemot nang sgo-sgo kwa go so lemoi. ⁶ Gano nebut nang kwa usi: Waly Aya nagoso, imot so wawi go pung go nan Mesir sik sogo, imot so kasgolok pay lo wawi go, iwalom ku , nan bu kwa go, sip ku klik go. Sikabung sip ganemot logo kwa uwet, gano yakena kwa sip ganemot sogo? ⁷ Genam lo mot wawi go kukenan seuy go a taling go itak go, didon suey goa mea dedam, sip ganemot sogo naklay suey go senguong a. No mot nang lo tasam kwa seni golo At go kukenan ganemot yam so se suey kwa go so lemoi, Genam go kukenan mot nang go tasam kwa seni go lo kwa seni go so mo lemoi. ⁸ Taiti so puit go sedue, Genam sogo kwa usi, Waly Aya nagoso? Sikabung demu trui so pepluok go, Genam ne kwa senong dali,gano domba yai so susuing go genam nogo waydang go,gano nabi nang di demu go sui no nebut atuiya pen klong, nemotnang seni kwa go nemot no duk go. ⁹ Ganemot sik so Genam nebut way mot nang ey sesok,mot nang go domdat nang ey go mea sesok dali, Waly Aya go nebut ganemot kalik. ¹⁰ Sue gono, sikabung Kitim go nan beab ketang logo no ikum, sikabung Kedar no pu go klong, gano suey so se ikum nesayon,ganego tasam kalik go ganego go gemang! ¹¹ Saula meno nogo gemang ikum, nemotnang go taso kekong go di demat ngge ya itak go wayso di demat meno no ta kekong go? No, Genam go blung kikiblong ya itak go, wayso seni kwa goa melak go, ¹² Ganemot sik sogo sadui bong ey peling ya, ut, ganemot no bubuong naklai se klak, waly aya go nebut ganemot kalik. ¹³ Da namon yan so At go blung lo tasam piam go mo pluok, nemotnang Genam mo itak waly bu nuik, nemotnang tang so bu mu mo tuet, bu mu put ey go, bu yakwa damoi. ¹⁴ Sikabung Israel ngga koy bu tasmu, koy bu tasmu go danon? Ganemot sik so ga sono ge sono lilek? ¹⁵ Ganemot nogo so sing-singa neguot sogo nebut ey, nebut se kekangok, nemotgo kukenan sikabung lo iwalom ku so lemoi, kota-kota koy lo kuim, gano sikabung kwa sesuing. ¹⁶ Ey sikabung Mempis ey sikabung Tahpanhes ey golo, mot nang demu yengkabui mea mendok, ¹⁷ Motnang tang so idekeba genemot melak go, mot nang go yalu blo sono ta go gemang, mot nang lo waly Aya, Woy Waly Iram itak go sik sogo, mot nang so wawi go tap sono? ¹⁸ Geasui go, Mesir sono klenalo go sogo kalik go a ya tegu kebalo, Nil bu drop sogo so? Asyur sono klenalo go, efrat bu drop sogo so? ¹⁹ Motnang go piam lo, motnang mea ngguok, motnang go waydang nemot lo, motnang nogo demun gemang but.snong go, seikum motnang go kuklue piam nemot lo,mot nang Waly Aya, Woy Waly Iram mo itak, Genam sogo bubuong ey kwa, Woy Waly Iram go nebut ganemot kalik. ²⁰ Banim go sik so iti go mot go idekeba mot lo mo pdueng, gano Tegan dok go mo tong mot tang so, ganemot no mot tang so nebut gekalik so pu: genam koy bu ta smu sogo yakwa lemoi dali.meduim don blo nogo, ganemot no di kangok go dop mata go, di nemot balo sdek go tasam kwa seni go so pluok. ²¹ No, mot Genam lo anggur kuoi go so lemoi go mo pung,didon suey seni go so mo lemoi, no mot geasui go iwot go di nemon peguob go so lemoi go, anggur duen ba sgoso lemoi go!! ²² Mot lo mot go sasuik temoi bu lo lu go, sabun mata so sasuik no ut gono bu wata dali go, Genam go nemu ku nogo mot go kon yakwa suep, Aya Waly go nebut ganemot kalik. ²³ Sgokalik so mot nebut don ey go ya pu: genam go saisuik temoy ngge tasam piam go kwa pluok, genam di demat nogo kwa duk? Ikum ya mot go tasam pay nogo, mot tang so se snuong tasam sgokalik pluok, ey unta unen, masi iwa-iwa sogo, kap sando ya gesno, ²⁴ Saisuik temoi ta itak go kaseglok pay no kap go, nebit suey go dop sgoso! Nando lo kamea kunala ta logo kalik so ya duk, naklai kabung kamea ey go so uwet go, kwa uwet, nemot nang mea tgu kamea go ku pung gono. ²⁵ Yai sesuing, mot go masi nogo sepatu se kok, blindon tang lekuoi genaning! No way so nebut mot lo ne pu: tebadali wa! Tebadali! Genam go klum sikabung meno no, ganemot sgoso genam nemot nang no mea duk. ²⁶ Wom sikabung, wom sgono mlak go sik so suongsut tra go kalik, ganemot kalik dali so blung irael suongsut mea tra dali, seni senguong so, nemot go iram, nemot nang go sikabung sui ey go, sikabung taiti so puit go, gano nemot nang go nabi. ²⁷ Di tebot nogo ey pu go: mot ngga genam go aya, gano demu so pugo: mot lo genam tui go! Seni so nemotnang taton ya iwot Genam sono, gano nemotnang go nebuem nemu genam snogo kwa iwot dak, no ku nemotnang piam go bolo kelak go, nemotnang lo gekalik so pu: Waly Aya bong ya genam nang ba sesuoy! ²⁸ Di demat mot nang lo mot nang go ta lo semu go ta nemot no kokong genang sgo kay? Nemot a pu go ip ya, seni so mot ya sesuoy go piam ba sik sogo! Mot go kota go miam sgokalik, ganemot kalik dali di demat mot nang lo ta lo lemoi go ta kokong nang sgoso, ey Yehuda! ²⁹ Sgokalik goso waydang kletgoi Genam ey go, motnang lo Genam mo piam, mot go tasam lo, ganemot kalik nebut Waly Aya sik sgo. ³⁰ Seni kwa At lo mot go dwo nang but go, suey go nguok go nemotnang ba nogo kwa deguot, mot go tengang lo mot go nabi yam so tuk, singa neguot sgolo tuk go kalik. ³¹ Mlenawalasrang sgokalik go motnang? Woy Waly Iram go deguo teguop a tup ya! Genam ngge Israel sno kaseglok pay sogo mo lemoi gano kukenan ku klik go sgo mo lemoi? Ga sgoso gekalik be pen tgu, sgokalik sik so gekalik go mot nang lo ne pepen: genamnang ta mo itak, genam nang Mot mit nogo yakwa weng Aya Waly? ³² Kabung kaguit lo nemot go periasan ya kai, gano kabung meno lo nemot go kleme no dak go Tegan ya kai? No, Genam go blung lo, Genam mo kai. Ku kwa walong go bano. ³³ Suey sang mot lo mot go tap klum nang sogo uwet go! Ganemot sgoso, mo melay mot go tap piam go blo senguong lo keklong. ³⁴ E mot go amblekeba nogo, sikabung drang kwa go kin ey ikum, sikabung piam kwa go; sikabung wom sgono but go kalik. Ganemot kalik so naklai mo lemoi ³⁵ Mot lo pu go : genam piam go kwa pluok! Sni so, Nemot go dabui piam lo genam mo itak! Sniso, Genam lo mot neyboy sip sono mea wawi go klong, mot go nebut pen sik so, mot lo pu go: genam kon kwa! ³⁶ Mot lo iwa-iwa so tra go be, mot go tap masi iwot genang sogo! Mesir logo sik so mot suongsut ey mea tra, Asyur logo sik so mot suongsut tra go kalik. ³⁷ Gasiksgo mot mea pung ta blo sno iti gono, Waly Aya lo nemot nang mea tenguo, nemotnang mot ey ta kduik go ngga, gano mot nemotnang ey go yakwa lemoi.