DALU TEMOI NOGO

¹ Walinebut Wali Aya siksgo Yeremia Sono weng go woy dalu temoi nogo ² Yehuda gunuing so, yataput-yataput kangok go kenuong go gano u ey nan blo sono iti go tui; Yerusalem tebok sogo so pepen go blosono ey klak. ³ Nemot go woy woy lo koybutasemu no pu go bu uwet go; nemotnang bu mu mit nogo ey pung, no bu kua tegu, nemotnang bu so sde go sip tandali u-ulou so iti go klong, nemotnang suongsut ey, nebuemnemu kin suk so lemoi, nemotnang lo yengkabui ey kebet amblekeba sron logo ey. ⁴ Usu nogo kebali mo itak, sa kua pupu go sik so, ganemot sikso usu kebali sedue dabui waluk-lak gano nemotnang go yengkabui amblekeba sron lo kebet. ⁵ Ganemot sikso RUSA unen lo nemot go nok imening tui go ey itak, neguen demening pung go kua go sikso. ⁶ KELEDAI duen ba logo metuik dikuago blo sono ip-lak, nebut srigala kalik sesemu, nemot go nemu usne sogo kalik, rumput kua go sikso. ⁷ Sgokalik go sikso genamnang go tasam piam go naklay nebut genamnang so waydang go, ip-a genamnang guik, Wali Aya, Mot go sui sikso! Gekalik go sikso. Genamnang lo pai-sing go mata so, genamnang Mot no mo kon genamnang go tasam lo. ⁸ Israel lo ta so mlak go,tebok-a genamnang ide go ku no! sgokalik go sikso Mot sikabung suk meno kalik so kukenan ngge nogo, sikabung tap masi sogo kalik, nemotnang suing go tandali ip go klong? ⁹ Sgokalik go sikso mot sikabung taplu go kalik, PAHLAWAN mea kua tebok go kalik so? no, Mot genamnang ba so, Wali Aya, gano Mot go Sui gabe pen e-tugu genamnang ba nogo, genamnang kua itak!” ¹⁰ Wali Aya logo nebut saula ngge nogo gekalik:” nemotnang u-uwet sogo yakay ey gano ganemot sogo masi mea kua gluik. Ganemot kalik go sikso Wali Aya nemotnang sogo kua duduing; no geasui go nemotnang go piam-a mea taling go pen gano konkebamling temoi nogo idekeba-a mea iti.” ¹¹ Wali Aya genam no nebut pen go: “ mot dewi saula ngge suey nang sogo kua pu! ¹² Nemotnang genuing suing go, Genam nemotnang lo dewi klak go mea kua tup, nemotnang lo taiti puit go Genam nogo sogo Genam mea kua tup, Genam nemotnang sogo kua duduing, no Genam lo nemotnang ple lo mea kua, ten kua golo, gano dalu lo.” ¹³ Gano genam lo pu: Woy Wali Iram no sogo kalik so NABI nang lo mo pen go temoi nogo nemotnang no: motnang nogo ple mea kua pung, gano ten kua go ku motnang blono nogo mea kua lemoi, no Genam lo motnang no teguop yakay-a mea iti sip ngge nogo!” ¹⁴ Wali Aya lo wainebut genam no pu go: NABInang ngga kuet sono go ikum go piam go pepen go Genam go sui no! Genam nemotnang kua pu go klong, Genam nemotnang nogo walinebut kua pen. Nemotnang lo taling go ikum go ngga wamoi so mlue go, ngga nemotnang lo dabui bano wamoi mlue atuia go ngga pepen go. ¹⁵ Ganemot sogo so walinebut Wali Aya siksogo NABInang nebutpen kuet sono go ikum go ngga pen go temoi nogo Genam go sui no, nemot-a Genam nemotnang kua pu go klong, gano pu go: ple pung nang sogo gano ten kua go ku kukenan ngge nogo mea kua lemoi-: NABInang ganemot ple pung go gano ten kua go ku pung golo mea kebong-sing! ¹⁶ Gano saula nemotnang nang lo nebut kuet sono ikum gono pen go ngga, teba-teba tap-tap Yerusalem lo mea leguot-sing, ple pung go sikso gano ten kua go sikso, gano sikabung mu bano tui genang sogo mea kua: nemotnang, nemotnang go senun naklay,nemotnang go duo sedue denok gano kabung denok. Ganemot kalik so Genam lo nemotnang go tasam piam go nemotnang blo sono mea pi.” ¹⁷ Se pen nebut pu go genemot: genam unbu senang so lili go ku blong ku klik, gekalik go sikso duo kaguit demening go Genam go saula go, kuo kua seni go nemot go saisuk temoi no pung go, kua naklay mea kua pali go. ¹⁸ Genam neguen senguong-a pung go sip no mo pung, ngga nogo sikabung tengang kaluang lo but go kebong go gemang! Gano genam KOTA sono mo dgut, ganogo sikabung ten lo sadui tra go gemang dali! Naklay ganemot sikso NABInang, taitisopuit go nang kukenan nemotnang kua senong gono klong. ¹⁹ Mot lo mo tenget seni Yehuda? Sion sogo kua duduing dali? Sogo kalik go sikso Mot lo genamnang ngge tmo kalik so but, ee genamnang nogo suey go pali go pung genang sogo mea kua? Genamnang teguop yakay so bubung, no suey go kua pupung; ku pali go so bubung no kua seni ku-a pung! ²⁰ Wali Aya, genamnang mo senong genamnang go piam, gano genamnang go babuasi go tasam piam go; seni so, genamnang kon mo pluok Mot no. ²¹ Mot genamnang kua itak, Mot go sui sikso,gano Mot genamnang kua ikle Mot go iram demu go naliblong sikso! Mot nase duing tegadi genamnang ey dok go, tegadi ganemot tong genaning! ²² Gemang go sa pu go li demat kua seni go saula ngga lo ta-a kong go ba nogo? Gano ut nemot tang sogo sa ya pu go li? No seni so Mot senguong-a, genamnang go Woy Wali Iram, genamnang lo ta so mlak go, ganemot naklay so lemoi go?