Tapegat so gemang suing

¹ Nggano Kiwali Iram go soungku no piam gemang semu ngganemot sogo so sedue Midian go ta bano sedue Israel Kiwali Iram lo gemang iti yagui 7 yamso gemang suing. ² Yagui ngganemot yam no sedue Midian go masi banosedue Israel gemang suing. Sedue Israel sedue Midian nogo suali kangok so tra go tangso nemotnang lo sip son genang so gemang semu menduim blo lo ngga sip demu put lo gemang son. ³ Kuno-kuno sedue Israel don bluim sogo nggano sedue Midian, sedue Amalek ngga ey sedue nang woy klak sik sogo mea weng nemotnang dagu sono. ⁴ Nggano sip sung bala dato lo gemang semu nemotnang dagu no ngganemot no Israel sikabung go ten usunang ngga ey menainang ngga domba, lembu, keledai yamso nemotnang lo mea ikak klaya sogo yakwa itak. ⁵ Sedue ngganemotnang mata dega seni so weng go nemotnang menay ey go nggano bala taut ey, ngga menay unta ey nemotnang nggga mata dega seni mendop kalik pling go weng go nan ngganemot leguot sing genang sogo. ⁶ Ngga tangso sikabung Israel sogo-sogo kwa seni sang gemang lemoy, sedue Midian go taibat piam sik sogo, ngga nemot tang so sikabung Israel lo Kiwali Iram gemang usi. ⁷ Sedue Israel kiwali Iram gemang usi sedue Midian tangso. ⁸ Ngga tangso Kiwali Iram lo nemot go nemudi sogo tamot gemang pen;” ngge kalik Kiwali Iram go nembut, Israel go Kiwali Mani Iram: Genam lo motnang mo wawi go pung Mesir sik sogo ngga koybutasemu go yap sik sogo ⁹ Mesir go ta sik sogo genam lo motnang mop let ngga ey nemotnang go ta lo motnang ku no kenok go tangso. No Genam tangso nemotnang sik sogo mo paising ngga ey nemotnang mo yat nggano nemotnang go nan Genam lo mo iti motnang nogo. ¹⁰ Genam tangso motnang nogo nembut mo pen: Genam ngge Kiwali Iram, Kiwali Mani Iram ngganemot tangsogo Amori go demat nang nogo ta kwa kong nan nggeno motnang mo sung” no motnang naklai Genam go nembut ne kwa tup”. ¹¹ Nggano Kiwali Tamot gemang weng go sung di terbatim dagu so bu so sisik sip banom kalik gono gemang son sip ngga Midian sedue yakwa ikum. ¹² Kiwali Tamot nemotno gemang pung nggano nembut dato gemang pen ngge kalik:” Kiwali iram mot ey gemang suing Mot ngga Kiwali Iram go sedue don ey ngga ey suali kwa tra go sudue. ¹³ Gedion lo way gemang pen Nemot nogo : “ ngga kalik so kwa pen-a no Kiwali Iram genam ey go mo sogo so genamnang ngge kalik so ne? nago no nemot go tasam-tasam kangok plouk go babu asi nang pen go genamnang mo tup eyu, no nemotnang lo pen go: Kiwali Iram lo Atnang mo beteb sedue Midian go ta bas ono. ¹⁴ Ngga Kiwali Iram iwot go nembut gemang pen: “ Klong-a Mot go don ey sedue Israel se soswoy sedue Midian go ta ba sik sogo. Ngganemot genang sogo Genam mot motdakgo!” ¹⁵ No tandali Nemot lo Kiwali Iram no gemang pen: “ah Kiwali Iram sogo lo genam sedue Israel ya suswoy? Mot mo senong go genam ngge tang suguey sini tang Menasye sik sogo nggano genam ngge maning nggout sini genam go tang ba nogo. ¹⁶ Kiwali Iram nembut gemang pen: “No Genam mot ey mea klong nggano mot sedue Midian yamso mea but. ¹⁷ No tandali gemang pen dali Kiwali Iram nogo:”no Motang golo suey genam nogo mot go nemu kuno mo. Genam ba nogo Mot lo se taling dali seni segoung so ngge Mot go nembut pen genam baso. ¹⁸ Sip ngge sikso kwa klong e.. genam tandali mea weng mot nogo taiti ey mea iti mot go swoung ku nogo.” Nemot go nembut” genam mea suing e.. mot tandali pung ngge nogo. ¹⁹ Gidion ngga bano gemang degut nggano menay kambing seguey loti ragi kwa go tete ey seefa muk lo semu go gemang suk nggano kedong-a sip bata no tui go ngga ey butu-a sip tugun no gemang sre nemot gemang iti go klong di terbantin kuno Kiwali Tamot no gemang iti go dam genang so. ²⁰ Kiwali Tamot lo nemot no gemang pen:” loti ragi kwa go ngga kedong nggaey demu blono tui-a nggono butu ngga se pi” nemot kalik so gemang semu Gidion lo. ²¹ Nggaey Kiwali Tamot lo tegoli nemotgo ta lo gemang leguit: kedong loti ey maning kening go nggano koy demu ba sik so gemang pung nggaey ten ngga koy lo yamso gemang dam nggano Kiwali Tamot gemang saguip nemot go nemu damoi no. ²² Gidion gemang senong ngge Kiwali Tamot ba nggano gemang pu:” Kiwali Mani Iram genam mo piam ba Kiwali Tamot at go nemu ey nemoot go nemu ey mo tegu” ²³ No kiwali Iram lo nemot no gemang pen: mot mo suswoy! Suali kwa tra mot yakwa kebong.” ²⁴ Nggano Gidion lo taiti so puit go sip nggano gemang semu Kiwali Iram nogo nggaey sui gemang pu: Kiwali Iram ngge suswoy. Taiti so puit go sip ngga maning gemang gigit sip Ofra ngga yakena dega sedue Abiezer nogo. ²⁵ Wadi go ku ngganemot nogo Kiwali Iram nembut gemang pen:” Mot go Aya go menai lembu kemsi se iti ngga lembu kemsi namon tete so tui go yagui 7 no pung go nggano demat nogo sip go taiti so puit ngga mot go Aya lo semu go nggano se togut kay sengoung-a di nemot dagu so setou dali. ²⁶ Nggano taiti so puit go sip Kiwali Iram ngga mot go Kiwali Mani Iram, ngga blo no plesedue go sip no suey so semu nggano lembu kemsi namon tete so tui go ngganemot no iti go taiti sopuit go sip no di ngga mot tou go ey koy no se tui go puit. ²⁷ Ngganemot no Gidion lo yamso sedue koybutasemu ey ngga kalik so gemang pluok Kiwali Iram lo pen go kalik nemot sono, no nemot suali so gemang tra natun yap ba sedue kabung no ey yakena dega sedue kabung ey ngga kalik tra go tangso ngga nemot sogoso wabudong go kwa semu no wadi kuklik bano gemang semu natun. ²⁸ Nggano wadikwa so sedue kabung yakena dega bong go gemang ikum demat sip ngga mo togut ba, di nesip nogo ey mo tou ba ngga ey lembu kemsi namon tete so tui go ey mo puit ba taiti sop puit go sip demening no. ²⁹ Nemotnang lo gemang usi” kai nando lo ngge mo plok?” maning nemotnang usi nggano meo duo gemang pen:”Yoas go duo Gidion nemot lo taibat ngge gabe plok”. ³⁰ Nggano sikabung yakena dega lo Yoas o gemang pen:” Mot go duo nggge dia sono se pung ngga ey nemot mea kebong. Nemot lo demat go sip ngge mo togut go di nesip demat go taiti so puit go sip dagu ey. ³¹ No Yoas lo tandali gemang pu sikabung mata so nemot dagu no:” Motnang demat son oba tuguik to? No motnang nemot no maning tebok? Nando lo maning demat no tuguik go utep wadikua nemot mea kebong? No demat ngga ki kali ngga Ki kalik neya nemot banom sogo mea tuguik nemot go taiti so puit go sip togut tang sogo.” ³² Ku ngga nemot nogo nemotnang lo Gidion so Yerubaal so gemang temuit, nemotnang lo pu go: neya demat ey mea wako nggano nemot go taiti so puit go sip mo togut ne. ³³ Sikabung naklai Midian ey Amalek sik sogo ey nggano woy klak sik so naklai gemang mo klong pay Yizrael no bala sip gemang semu a-tun. ³⁴ Ku ngga nemot nogo Kiwali Waglo lo Gidion bano gemang sung: nemot lo tagu suk lom nembit-a u nggano abizaer sikabung gemang keng nemot-ey naklai. ³⁵ Nggaey deguo gemang pen Menasye go tang no, nggano nemotnang naklai gemang keng dali. Deguo tang Azer no gemang pung dali, Zebulon ey Naftali-nggaey nemotnang go sikabung naklai gemang tebok dali. ³⁶ Nggano gidion Kiwali Iram no nembut gemang pen:” No Mot lo sedue Israel suswoy genang so ngga lemoy genang genam tangs sogo ngga Mot go nembut pen go kalik. ³⁷ No genam lo domba go dit mea sey lout sip no: no domba dit blo segoung-a bu gum sik so go mo net go say nggano nan blo no kwa say, no ngganemot tangso genam mea senong Mot lo genam no moyang sedue Israel genam tangso mea suswoy Mot go nembut kalik.” ³⁸ Ngga nemot kalik so gemang lemoy: utep wadikwa seni nemot bong go damba go dit ta lo mong go gemang sik bu gum sik go sogo ngga sip cawan no yamso damoi ey gemang tram. ³⁹ Nggano Gidion lo gemang pen Kiwali Iram no: Mot go dabui piam kua li genam blo sono, no genam tandali go mot no pen sogo da klaya ngge nogo: “Da klaya tete ngge sip domba go dit blo lo ngga naklai se pat, no nan blo lo-a naklai gum lo se say sing.” ⁴⁰ Ngga nemot kalik wadi go Kiwali Iram lo gemang semu a-tun, ngga domba go dit blolo naklai gum lo kwa say no nan blo lo-a gum lo gemang say a-tun.