Israel lo tang Benyamin ey plepung go

¹ Nggano gemang bisi sikabung Israel naklai; nggaey Dan sik so iti go Bersyeba no nan Gilead lo gemang yaluim blung naklai seguong so Mizpa no klong go Kiwali Iram tegu so. ² Nggano gemang ip wengkabui sedue naklai tang sikabung Israel sik sogo gemang ip Kiwali Iram go blung nemu damoi nogo nemotnang go mata 400.000 sedue masilo klong go nggano tegang kalong-ey mlak go. ³ . Deguo ngga tang Benyamin lo tup go sedue Israel Mizpa no mo klong. Sikabung Israel lo gemang pu: “ pen-a sogo kalik taibat piam ngga lemoy.” ⁴ . Nggano sedue Lewi kabung kebong go kenin lo gemang pen won: “genam-ey koybutasemu senun so iti go nemot ey Gibea no pung go tang Benyamin go sip no ngga lo sedek genang so. ⁵ Nggano blung yakena dega Gibea lo suing go gemang weng genamnang go sip yap yai e suing ku wadi go genam segluk so nemotnang genam but sogo no genam go koybutasemu senun so iti go ngge nemotnang lo gemang kok nggaey gemang kebong. ⁶ Ngganemot tangso at go koybutasemu senun so mo iti nemot go temoy genam lo nemot tong go nggano gemang wasei sing sikabung Israel go tang-tang no sikabung nggalo kamea tap semu go ngga taibat kon dega eygo mo plok sikabung Israel go nesip bano. ⁷ Nggasui go motnang naklai nggeno mu pung sedue Israel ngganemot so suey se seduing nggano se pen motnang go nembut.” ⁸ Nggano blung ngga naklai gemang kai seguong so bong go nembut gemang pen: “imotnang naklai ngge sik sogo bala sono yakwa klong ngganemot sogo imotnang yap no kwa klong dali. ⁹ Ngge-a Gibea nogo imotnang lo mea plok; plepung genang undi-a mea betep! ¹⁰ Imotnang mea kuoy tang Israel naklai logo sikabung nemotgo-nemotgo 100 sik sogo 10 mea keng nggano 1000 sik sogo 100 mea keng nggaey 10.000 sik sogo 1000- a mea keng nggano ten plesedue daley sik sogo mea iti nemotnang mo weng go nemot kalik mea semu Gibea-Benyamin no tasam kon ey go nemot lo semu go kalik Gibea-Benyamin nogo sikabung Israel nesip nogo.” ¹¹ Ngganemot kalik sedue Israel yaluim go yakena dega ngga way but genang naklai kerlam-kelam so mea semu. ¹² Ngga nemot no Israel go tang nang lo deguo sedue gemang pen go klong tang Benyamin naklai nogo ngga kalok: “sogo kalik go taibat piam mo plok motnang nesip ba nogo! ¹³ Ngga nemot tang sogo sedue-sedue ngga genam nang no ngga sedue taibat piam so plok go Gibea nogo nggano imotnang lo nemotnang idekeba glung genang nemotnang nogo ngganemot tangso nemotnang go taibat piam mea suep sikabung Israel sik sogo.” No tang Benyamin nembut ngga kwa tup nemotnang go ntanton nang sik sogo ngga sikabung Israel.” ¹⁴ Way so tang Benyamin gemang yaluim yakena dega meno-meno sip sik sogo Gibea no nggaey gemang klong ple pung so sikabung Israel ey. ¹⁵ Ngga nemot kuno tagu I go tang Benyamin yakena dega meno sik sogo ngga: 26.000 sedue tegang walong ey Gibea go blung ey kwa I ngga ey tagu I go 700 sedue suey segoung nemot go mata. ¹⁶ Nemotnang ba sik sogo ngga 700 sedue ta kalik idi lo tengang mlak go nggano nemot nang lo but go sedue kay seguong-a mea kebong butudop klaya sogo mea tong go pui. ¹⁷ . Nggaey sikabung Israel go tagu gemang I; tang Benyamin ey kwa tebok go ngga 400.000 sedue tengang walong ey mlak go; ngga naklai ple sedue. ¹⁸ . Nggano sikabung Israel gemang ip go kling Betel sono nggano pung Kiwali Iram no gemang usi nawon: “ nando nang lo bani mya klong ple pung genang tang Benyamin ey?” Kiwali Iram gemang pen: “ Tang Yehuda lo se klong banim.” ¹⁹ Nggano sikabung Israel wadikwa seni bong go nggano bala gemang semu Gibea dagu no nggaey nemotnang go sip yai gemang suing. ²⁰ Nggano sikabung Israel gemang klong tang Benyamin ey ple gemang pung; sikabung Israel daley gemang semu nggano ple gemang pung nemotnang ey Gibea dagu no. ²¹ Kerlam so tang Benyamin lo klong Gibea sik sogo ple gemang pung ngga sogo kebong go pui go 20.000 sedue Israel ba sik sogo ku ngga nemot nogo lemoy go. ²² No sikabung Israel go plesedue don-ey naklai gemang suing nggano nemotnang go daley gemang semu sip banim nogo dali. ²³ Ngga nemot no sikabung Israel gemang klong nggaey u gemang kluo Kiwali Iram go nemu kuno e woy sut no pung nggano nemotnang lo gemang usi Kiwali Iram nogo: “genamnang ya klong dali tang benyamin ey plepung genang no nemotnang ngga genamnang go ntatonnang?” Kiwali Iram lo gemang pen: “ Klonga-a nemotnang way se but.” ²⁴ No sikabung klong go ku namon no degut go tang Benyamin no dedagu, ²⁵ Nggano ku namon degut go tang Benyamin lo banim gemang klong but sikabung Israel ngganemot nogo sikabung Israel pui go 18.000 naklai ngga sikabung tengang walong ey mlak go. ²⁶ Nggano sikabung Israel naklai gemang klong yang ngga naklai blung gga nggano sip Betel no pung go; ngga sono nemotnang u gemang kluo Kiwali Iram go nemu kuno Tendai e gemang suing woy ey gemang sut nggaey taiti gemang iti ngga taitisopuit ey taitisopuit suswoy genang ey gemang iti Kiwali Iram nogo. ²⁷ Nggaey sikabung Israel lo gemang usi Kiwali iram nogo—ku ngga nemot nogo tegadi so king go sip Kiwali Iram nogo ngga so gemang, ²⁸ Nggaey Pinehas bin Eleazar bin Harun taitisopuit Kiwali Iram sono gemang suing ku ngga nemot nogo—nemotnang lo gemang pen: “genam nang lo ya klong tang Benyamin ey way plepung genang genam go ntaton nan gey no nggenamnang ngga yakua semu?” Liwali Iram lo pen go: “Klonga-a utep go nemotnang Genam lo mot go ta bano mea iti.” ²⁹ Nggano sedue Israel tap lo tong yai-ey gemang suing Gibea no. ³⁰ Ku nangglik nogo sikabung Israel gemang klong banim so way sogo tang Benyamin ey nggano daley semu go way ple gemang pung Gibea ey ku natun go kalik. ³¹ Nggano tang Benyamin lo banim gemang bisi ple daley ngganemot no; nemotnang gemang pung yakena dega sik sogo banim go kalik nggano ple sedue daley so gemang truik tap kangok namon nogo ngga nogo—meno tap Betel nogo nggano meno dali Gibea sono tap nuguen kwa go lo—ngga nemot sogo sedue nang gemang kebong yang ngga tagu I go 30 sedue sikabung Israel sik sogo. ³² Ngano tang Benyamin lo gemang pen: “sikabung ngga imotnang lo mo but yamso ngga kuno go kalik.” No sedue Israel nembut mo pen banim so; “weng-a imotnang kap go nemotnang mlue go yakena dega go tap kangok so na pung lak.” ³³ Ngganemot sogo so sikabung Israel ip go nemotnang go sip sik so daley gemang semu Baal-Tamar no ngganemot nogo sikabung Israel ngga bano son go kai seguong-a pung go tap no gemang tong sip Geba daku so ngga sip ule no. ³⁴ Gibea damoi no pung go sikabung Israel 10.000 naklai nggano plepung go naklai kangok dega seni no tang Benyamin kwa senong koy gemang weng nemotnang nogo ³⁵ Kiwali Iram lo tang Benyamin but go kenong sikabung Israel lo ku ngganemot nogo sikabung Israel lo tang Benyamin kay seguong so naklai gemang but go kebong ngga tagu I go 15.000 sedue ngga sedue tengang walong so mlak go. ³⁶ Tang Benyamin lo ikum go nemotnang mo but go kenong ngganemot no sedue Israel tandali ngga ba sono tuguey tang benyamin go nemu damoi no—nemotnang lo duing go tap no tong go sedue nang naming ngga bano suing Gibea but genang— ³⁷ Nggano keda sogo tap no tong go sedue nang lo Gibea gemang but nemotnang lo banim gemang bisi nggano yakena dega ngga gemang but tengan kalong lo. ³⁸ No sikabung israel lo nembut mo pen tap no tong go sedue nang ey koy puit genang nggano koy indop kangok so kelak genang yakena dega ngga logo. ³⁹ Nggamenot nogo sikabung Israel gemang tuguey sip plepung go sik sogo nggano tang Benyamin lo sikabung Israel gemang but go kebong mgga tagu I go sedue 30 yamso nemotnang duing go: “ senisogo imotnang lo sedue ngga nang mo but go kebong naklai banim go kalik.” ⁴⁰ No ngganemot kuno koy undop mata dega seni klak go yakena dega ba sogo usi so ip go kalik klong go nggano tang Benyamin lo iwot go ikum yakena dega koi lo yam so kuim go kalik koi ngga klak go ut blono pung go. ⁴¹ Nggaey sedue Israel tandali gemang bisi ngganemot no sedue Benyamin kuku ey gemang tra nawon nemotnang ikum go koi kangok gemang weng nemotnang blo no. ⁴² Nggatang sogo nemotnang gemang kap sedue Israel go nemu damoy lo sip duen kua gono gemang kap no plepung go ngga nemotnang lo yakwa pay nggaey sedue yakena dega sik sogo nemotnang naklai gemang but nemotnang nesip nogo. ⁴³ Nemotnang lo tang Benyamin dagu so yai gemang suing nggano nemotnang lo gemang truik tong kwa tong sogo e ngga woi klak idi lo Gibea ku nemu ku no pung. ⁴⁴ Benyamin go tang sik sogo sedue kebong go 18.000 naklai ngga don ey go sedue. ⁴⁵ Meno nang gemang tuguey go kap duen kua go sip no ngga metuik demu Rimon no nggano tap kangok sogo maning tegang lo ibot misip so nemotnang so I go: 5000; nemotnang so truik go e Gideom no pung ngga nogo but go kebong go 2000 sedue yam sogo. ⁴⁶ Ngga nogo kebong go tang Benyamin sik sogo ku ngga nemot nogo naklai tagu I go 25.000 sedue tengang walong ey mlak go naklai sedue don ey go. ⁴⁷ No sedue 600 gemang teguey go kap sip duenkua gono ngga metuik demu Rimon no nggano gemang suing banu 4 yam sogo metuik demu ngga nogo. ⁴⁸ No sedue Israel gemang tugei tang Benyamin nogo nggaey nemotnang tegang kalong lo gemang but sedue ey menai ey naklai nemotnang lo ikum go yamso gemang but sing ngga nogo nggano yakena dega ngga sogo naklai koy lo gemang puit go itak.