Piam Gibea nogo lemoy go

¹ Ku ngganemot nogo lemoy go Iram maning kua suing Israel nogo nggano menduim Efraim idi nogo sedue Lewi meno gemang suing sedue demening weng go nggano nemot lo koy bu ta semu senun so iti go gemang Betlehem-Yehuda sik sogo. ² No koy bu tasemu senun so iti kabung nggalo taibat meno plok go tangso nemot nogo ngganemot tangso nemot gemang klong nemot go aya go yap no Betlehem-Yehuda nggano banu 4 yamso gemang suing. ³ Ngga tang sogo so nemotgo kenin gemang tetaut misip so klong so kabung ngga wuew genang so nggano tandali nemot ey kerlam so weng genang so; kerlam so nemot-ey nemotgo nggout koybu tasemu ey menai keledai namon ngga kemsi, unen ey. Nggano kabung kagut ngga lo gemang nemot ey degut nemot go aya go yap no nggano nemot go aya lo nemot ikum go dabui yakay-ey gemang tra nawon nemot ey mo tegu. ⁴ Nglangin so masi ngga kabung kaguit go aya lo nemotnang kwa pu go klong no nemotnang ku nangglik so gemang sedek nggalo nemot go aya go yap lo; nemotnang ten dam bu drop go ngga-ey nggalo gemang sedek. ⁵ Ku 4 no pung go nggano sedue lewi lo wadi kwa seni bong go ngga-ey gemang tetaut klong genang so ngga nemot no kabung kaguit go aya lo gemang pen nemot go duo kenin nogo; “sasyuk swot genang so loti-a pla dam nggano motnang tap masi seklong.” ⁶ Nemotnang gemang suing ngga-ey nemot namon ten dam ey bu drop go kerlam so nggano kabung kaguit go aya lo gemang pen sedue ngga nogo: “motnang go dabui yakai ey nggasui go ngge lo sedek-a da klaya tete.” ⁷ No sedue ngga ip go klong genang so nglangin somasi lo nemot plong go suing genang ngganemot tang so nggalo gemang sedek. ⁸ Ku 5 no pung gono nemot lo wadi kwa seni bong go klong genang no kabung kaguit go aya lo gemang pu: “ weng-a mot go sasyuk swot-a nggano namboinya suing woi natun gono.” Nggano nemot namon ten gemang dam nawon. ⁹ Sedue ngga ip go klong so nemot go koybu ta semu senun iti go-ey nggano koybu ta semu sedue ngout ngga-ey no nemot go nglangin so masi lo ngga kabung kaguit ngga go aya lo gemang pen nemot nogo: “ ikum-a woi yamso susut go ku wadi yam no pung go; suey genang so ngge lo sedek dali-a ikum-a woy yam so susut ngglo sedek-a motgo dabui yakai genang so; nggano utep wadikwa seni motnang se klong motgo yap no sepung.” ¹⁰ No wadi ngganemot nogo sedue ngga moyso sedek genang nggalo; nemot tetaut go ngga-ey gemang klong ngganemot no nemotnang klong go gemang pung sedue Yebus go nan no ngga Yerusalem--; kerlam so nemot-ey menai keledai unen, kemsi ey taut ey glung go nggano nemot go koybu ta semu senun so iti go-ey kerlam so gemang. ¹¹ Yebus no dedagu ku woy se susut nggano koybu ta semu ngga lo gemang pen nemot go tuem nogo: “weng-a imotnang wadi go ngge lo ya sedek sedue Yebus go yakena dega ngge no.” ¹² No tuem lo way gemang pen: “ imotnang ngge lo yakwa sedek sip demening ngge logo saula meno go yakena dega sedue Israel go sip so pu no imotnang masi mea klong Gibea no.” ¹³ Tandali gemang pen nemot go koybutasemu nogo: “weng-a imot klong go sip meno kalik ikum go ngga Gibea no mea sedek kwa go Rama no mea sedek.” ¹⁴ Nggano tandali tap masi gemang klong-lak nggano woy gemang sut Gibea dedagu no sip ngga tang Benyamn go nan. ¹⁵ Ngganemot tang so Gibea no gemang suing nggano gemang degut ngga bano wadigo nggalo mea sedek, nggano pung go sip nugen kwa gono yakena dega sogo no sikabung ngga sogo lo nemotnang kwa pu go degut yap nogo sedek genang. ¹⁶ No wadi go sedue seni monolo gemang weng nemot usu kebali sik sogo pung go no sedue ngga menduim Efraim sik sogo wenggo Gibea no gemang suing sedue diasik sogo no sikabung ngga sogo naklai sedue Benyamin. ¹⁷ Nggano nemot lo nemu iti go gemang ikum sedue meno tap so gemang weng sip nugen kwa sip no yakena dega ngga sedue seni lo gemang usi: “nago nogo motnang klong so nggano nago sik so motnang mo weng?” ¹⁸ Way sogogemang pen nemot sono:” genamnang go tap masi Betlehem-Yehuda sik sogo nggano klong sogo menduim Efraim idi nogo imotnang ngga sik sogo weng go; geman tap masi Betlehem-Yehuda no nggaey nggasui go yap sono tandali klong sogo no ngge sogo sedue genam kwa wawi nemotnang go yap sono, ¹⁹ Genam nogo menai keledai go ten Jerami nggano loti, anggul genam nogo so ngga-ey genam go kabung ngge-ey nemot go koybutasemu nogo-ey; genamnang sogo-sogo kwa itak.” ²⁰ Nggano sedue seni ngga lo gemang pu; ” suali kwa tra! Sogo-sogo mot lo duing go ngga geman lo mea iti no motnang sip yakena dega nugen kwa ngge lo kwa sedek.a’ ²¹ Nggano nemotnang gemang wawi go degut nemot go yap bano nggano menai keledai nang nogo ten gemang iti ngga-ey nemotnang masi bu ulu go ten dam go bu ey gemang drop. ²² No nemotnang dabui yakai so maning susuing sikabung yakena dega ngga gemang weng ngga kamea sikabung yap katang lo yai gemang suing nggano nemotnang lo tap put no senang so gemang wik nggaey gemang pen sedue seni yap sogo no: “ iti-a dia go pung sedue ngga mot go yap bas ogo dia no imotnang lo nemot kok sogo.” ²³ Nggano yap sedue nggalo dia no gemang pung nemotnang ey tugu go nembut gemang pen: “kwa semu sat yap nang piam kwa semu; sedue ngge genam go yap no mo degut go tasam kon ey-go kwa plok. ²⁴ No genam go duo kaguit go gemang nggano sedue ngga go koybutasemu senun so iti go gemang nemot namon-a dia no mea wawi go pung; nomotnang-a se kok ngga motnang lo duing taibat suey no sedue ngge sono tasam piam kon ey go kwa plok.” ²⁵ No sikabung ngga lo nemot go nembut kwa tup nggano sedue Lewi lo nemot go koybutasemu senun so iti go gemang mlak a-natun nggaey dia sono gemang wawi go klong nggano nemotnang lo kabung ngga gemang kok ibe sogo rlam so sok go wadi nesip sik sogo iti go ku ey blong wadikwa no pung nggano woy demening keklak kabung ngga gemang itak go klong. ²⁶ Wadikwa seni kabung ngga tandali gemang weng sedue ngga go yap nggano yataput no pupung nemot go tuam sedek go yap no nemot gemang kunong kulo sedek e woy ey se pepli. ²⁷ Wadikwa seni nemotgo Tuem bong go nggano yataput tunuing go dia sono klong so nggano gemang ikum kabung ngga koybutasemu senun so iti go ku lo gemang pui go sedek taput degut no ta-a gemang tugue taput no. ²⁸ Nemotlo gemang pen kabung ngganemot nogo: “bong-a klong sogo.” No way sogo nembut kwa nggano nemot lo temoy ngga iti go gemang wawi go menai keledai blo sono tui go nggaey gemang tetaut go gemang klong ngga sik sogo nemot go yap nogo. ²⁹ Yap no pung go tegang iti go nggano nemot go koibutasemu senun so iti go temoy nemot lo mlak go nggano gemang tong tebot-tebot so nemot go don yam-don yam no ngga 12 yam so nggano gemang wasei sikabung Israel go nan siding no siding no. ³⁰ Nggaey sedue naklai lo ikum go gemang pen: “tasam ngge kalik go genam nang lo maning kwa ikum ku sedue Israel nan Mesir sik sog pung go e ngasui no lemoy go. Ikum go suey so se duing nggano nembut se pen!”