Ki Wali Iram sik sogo kisebui plesi nogo ¹ Woy Wali Iram lo pu go, "Genam go blung nogo, At lo mea wa. No, Genam sono go dewi, nemotnang lo kua pupu ne. Nemotnang lo Genam tegu sogo so, Genam duduing go, no, Genam nemotnang lo kua uwet ne. Genam sono go suruakuon ngga lo kua uusi. Nemot-a, nemotnang nogo Genam lo wa sogo duduing: “Genam ngge go se!” ² Kono-woyno, Genam go blung nogo wa so Genam lo bubung. No, plesagui-a, nemotnang lo sesemu ne. Taybat-a suruakuon ngga lo ne pupluok. Nggano, nemotnang tang go atuia-a, ne kekeng. ³ Genam go dabui piam, nemotnang lo senang so sesemu goso. Kurban persembahan, didemu nogo, kekeytap so, usu damoy no, nemotnang lo pupuit go, usu-usu didemu nogo: nggano, kemenyaan demusung blo no pupuit ne pupuit ⁴ Wadi-wadi go kuklik go nogo, demuput-demuput ba no klong go, simu blo no nemotnang klong go, sedue lap sik sogo magking-a ne usi klong. Kagot menay, nebo kedong ey betu ey nemotnang lo ne dedrop. ⁵ Nemotnang lo pu go, ‘ket sono se klong! At nogo kua tuing. Atnang ngge, kon mo kua, motnang sik sogo atnag banom so se pung!' Nemotnang go kelakuan ngga, Genam lo, ikum sogo moy so! Genam go sagui, nemotnang nogo, koy yakua sut go kalik. ⁶ Nemotnang nogo kisebui, Genam go suongku no Genam lo mo klik. Seni so, yakot sogo Genam yakua suing. Nemotnang go taybat way Genam lo me taling. ⁷ Nemotnang go kon ey, nemotnang go asibabunang go piamkonkebamling tang sogo so. Genam so nemotnang lo wayang go: kemenyaan nemotnang go didemu nogo so takokong sip no, demu blo no nemotnang lo puit go tang so. Nemotnang go taybat ey kerlam go idekeba-a, nemotnang nogo way mea taling. Ku nayum go no semu go kalik so." ⁸ Woy Wali Iram lo pu go, “maning ip ey gemang go anggul don, yakua betep, no, sik go anggul bu so mea semu. Genam go blung ngga kalik dali so, naklay meakua suepsing. Nemotnang sik sogo, Genam go kebali so sesmu go gemag. Nggatang sogo so, naklay meakua suep-sing. ⁹ Tang Yehuda sik sogo sedue Israel temu, taitikum Genam lo mea iti. Nggano, Genam go medium nogo nan nemot go duo lo mea suing. Genam go sedue kabung Genam lo kuoy go, nggano mea klik. ¹⁰ Genam sono, At go blung lo ta mea kokong. Nemotnang go domba ey sapi ey, ten so Saron demuteble lo mea dam-klong, nggano, Akhor pay lo mea dedam-klong. ¹¹ No, Genam itak go sedue kabung-a, Sion nogo kunala kua go, At go medium teguop kunala kua go, ngga kalik so yakua. bukit yang suci: Gad ey Mani eygo sono, tendedam taiti so pupuit go nogo, ngga kali so kua. ¹² Motnang naklay mea leguot, taybat ba no mea leguot. Genam lo usi go nogo, motnang lo way kua wa, nggano, nebut At lo pen go nogo, motnang lo kua tup ne. Genam sono, motnang go dabui waydang go, taybat-a semu so ne. ¹³ Seni so, susubu Genam sono go seduekabung-a, ten mea dedam. No, motnang-a, tenday bunuo so, mea susuing. Nemotnang-a yakay ey mea. No, motnang-a, suongsut ey mea tra. ¹⁴ Nemotnang lo sek mea iti. Motnang-a, dabui sadui ey, unebu-a so mea naduk. ¹⁵ Motnang go sui, piam so At go kuoy go sedue lo mea pu: 'Nemotnang kalik so, motnang Woy Wali Iram Don Iram lo, mea but!' No, Genam no tamalak go sedue kabung-a, sui inim go-a Genam lo mea iti. ¹⁶ Nan ngga sogo, taiti so uwadong go, kengduduk eygo Ki Wali Iram lo taitiklum mea iti. Nando tanat sogo, Ki wali Iram go sui no nemot ta mea nat. Seni so, iseng banim go ngga, mo nega nggano mo kay-sing." Wali inim dato lemoy go ¹⁷ Woy Wali Iram lo pu go, "Ut imim-a, Genam lo mea lemoy, nggano, kukunan inim-a Genam lo mea semu. Banim-banim go kladian, ngga sono mea suep-sing, ngga, tandali go yakua duduing dali. ¹⁸ Yakay ey se, dabui yakay senang so se iti, inim go dato-a, Genam lo semu go sogo so, sek yakay ey se iti. Yerusalem inim yakay lo damoy go, Genam lo semu go, nggano, nemot sogo sedue kabung naklay rley eygo. ¹⁹ At tang go, Yerusalem tang sogo so, yakay ey mea, nggano, ngga sogo sedue kabung tang sogo so, yakay kangok. ²⁰ Ngganogo, denok maning go nogo yakua kebong, nggano, sedue kangok go yam so mea srawe-sing. Yagui seratus no pung go sedue kabung, nguot-kaguit kalik so, mea ikum. Ngga ey, maning gono kebong go, At logo kisebui lek goso mea duing. ²¹ Yap-a sedue lo mea klik, ngga ey nemot goso, mea suing. Anggul usu nemotnang lo mea semu, nggano, nemot go ip sik go mea drop, ²² sedue temu ngga drop sogo moy so, Genam go blung go yagui, walong so mea wali. Nggano, nemotnang go kebali usey go seni, mea dam. ²³ Nemotnang lo pupluok go naklay, seni ey mea tagot, nggano, nemot go danonnang tebadali buong so-buong go yakua kebong. Nemotnang ey, nemot go duo-yap ey, senang so wali genang sogo taitiklum at lo mea iti. ²⁴ Maning nemotnang lo kua wadong gono, Genam lo mo wa gemang; nemotnang go dewi maning kua wadong go no, nemotnang go dewi Genam lo mo tup. ²⁵ Domba ey duen uduo ey nenguen-a kerlam so mea dedam; duen uduo singa ey sapi ey klay gono padi tang mea dedam, nggano, sedue kabung lema lo yakua glok go kebong. Genam go medium teguop go ngga nogo, nenagluim kua, nggano, taybat yakua semu dali."