Edom nogo sogo idekeba way ¹ "Edom sik sogo nando lo mo weng, Bozra sik so, amka bom ey kok go, weng go, nemot go amka nemurlam sogo nando lo, nemot go don kangok dega go ey, gualing weng go?" "nemudi sogo wali, tegadi sogo Genam lo dok go, nggano, Genam go don ey, suey wali-wali so susuoy genang!" ² "Mot go amka bom-bom so, ngga kalik go, sogo temoy no, nggano, Mot go amka ngga kalik go, sogo sik so bom, anggul bu so sisik go sedue kalik go?" ³ "At tang so, anggul banom sik go, no, Genam go blung sik sogo, At nogo kua tebok ne! At go dabuipiam ba lo, saula-saula Genam lo anggul kasik sik go, ngga ey, Genam go dabuipiam ba lo nemotnang mo gualing-sing; Genam go amka sono, nemotnang go kin ingan lo say go, nggano, At go amka mo waluk. ⁴ Yang, way but genang ku, atuia Genam lo mo semu, nggano, tang way usi genang sogo yagui, mo pung gabe. ⁵ Kamso, At lo nemu iti go ikum go: Genam no tebok go kua ba; nggano, Genam nena go, nemou-a bubung: tebok genang sogo kua. Nggano, andua lo Genam nogo gabe tebok, ngga, Genam go dabuipiam nengkoy lo, At nogo tebok go. ⁶ Genam go dabuipiam ba lo, saula-saula At lo masi lo gualing-sing, Genam go dabuipiam nengkoy ba no, nemotnang kesuop-sing, nggano, nan ba sono, nemotnang go kin busuat go gemang pi." Dewi ba no piam wa go Israel lo wadong go ⁷ Woy Wali Iram go kebali taiti klum, At lo mea pepen-klong, Woy Wali Iram go takebali iway eygo mea iti, imot no, Woy Wali Iram lo semu go naklay, nggano, Israel tang nogo, takebali suey go kangok go, Nemot go klum tang sogo so, nemotnang sono semu go, nggano, Nemot go klum kangok go tang so lemoy go. ⁸ Nemot lo pen go: "Seni so, nemotnang-a, Genam go blung gabe, denok-tiat wamoy mlue kua go." Nemot-a, nemotnang go, Susuoy Iram so lemoy go, ⁹ nemotnang, naklay diding ba logo. Klaya duo, tamot mot-ak go kua, no, Nemot tang golo, nemotnang gemang susuoy. Nemotnang go kon, Nemot lo suep go, Nemot go klum ey dabuiklum eygo tanga so. Iti go sip no, Nemot lo gemang king, banim dega go ku nogo king go. ¹⁰ No, plesagui nemotnang lo, genang semu, nggano, Nemot go Ki Wali Waglo nogo, suongsut gemang taling. Ngga ey, iwot go, nemotnang go plesi so, Nemot gemang lemoy. Ngga ey, nemotnang eygo, Nemot tang golo, ple gemang pung. ¹¹ banim dega go sono, nemotnang gemang duing, Nemot go tamot Musa go ku sono: biap ba sik so, nemotnang so wawi go klak go, Nemot nago so, Nemot go, kambing domba ey, klay goso? Nago so, Nemot lo tui go, Nemot go Ki Wali Waglo so, nemotnang go dabui ba no tui go. ¹² Nemot go ta dega lo, Musa ey tasemlea idi lo mlak go; nemotnang go nemuku no, bu tegek go. Nemot go sui, senang so Nemot ey gigit genang so, semu go; ¹³ Nemotnang so wawi go, biap bu li go, kasglok pay lo kuda lo koklong go kalik? Nemotnang go masi yakua kling, ¹⁴ bupay sono menay li go kalik so. Woy Wali Iram go Waglo lo, nemotnang wawi go, nimla sip sono gemang klong. Nggkalik so, Mot go blung Mot lo wawi go, Mot go sui dega iti genang so semu go. ¹⁵ Ki Wali yakena sik so ikum kundo ya, Mot go nemudi sogo, teguop go ey! Mot go nenele nago so, Mot go don dega eygo nago so, Mot go klum dabui lo tra go, nggano, Mot lo klum go sang? Mot go saysuk kua gluik-a! ¹⁶ Mot ngga, atnang go Aya sang! Seni so, atnag sogo, sogo-sogo Abraham logo kua senong seni, nggano, Isrel lo atnang kua senong. Ya Woy Wali Iram, Mot tang go-a, atnang go Aya gabe! Mot go sui ngga, banim dega go sik sogo, “Atnang go, Susuoy Iram”. ¹⁷ Ya, Woy Wali Iram, sogo so, tap kua go sono, atnang itak go nega? Mot go tamot-tamot sueygo tang sogo so, tandali weng-a, Mot tete sogo saula tang gemang go tang so! ¹⁸ Sogo tang so, Mot go Teguop sip, sedue piam golo ne wayang, Mot go sip kon kua go, atanag go plesi lo, ne gugualing? ¹⁹ Atnang banim dega go nogo ey, kerlam go kalik so, Mot go tamlak go ba nogo, maning kua suing go, Atnang blo nogo, Mot go sui kua pu go, kalik so be.