Sion nogo Deguo teguop ¹ Woy Wali Iram go Ki Wali Waglo genam ey gabe, Yang, genam Woy Wali Iram lo mo tuik; Sengsara ba sogo sedue kabung no, deguo teguop pen genang so, Nemot lo genam, mo mot-dak, nggano, dabui mo kusuop go sedue kabung, tamla genang so, boy ba sogo sedue nogo, taitak go nebut, pen genang so, nggano, kikidik ba no betep go sedue nogo, taitak go deguo pen genang, ² Woy Wali Iram go yagui nogo klum, nebut pen klong genang, nggano, imotnang go Ki Wali Iram lo, way iti genang ku pen genang, sikebong genuing so suing go sedue kabung nogo, dabui yakay pen genang. ³ Nemotnang nogo, sung way so, betokut-a kebet genang so, sikebong amka way so, kinemon eygo mlay-a iti genang, don lasu go way so, usam-a iway so iti genang, nemot sogo, sedue kabung lo, pu sogo, "di tarbantin seni so!" Nemot go blong taling genang sogo, "Woy Wali Iram go tatamang". ⁴ Yaguino-yaguino mo kurluk go, tandali nemot lo buong genang, nggano, banim go sip-sip kluim kua goso gigit go, tandali buong genang. Yakena-yakena mo togut go, tandali inim so, nemot lo mea lemoy, duono-duono, kluim kua goso gigit go sip. ⁵ Motnang go, menay yay sogo, dia idi sogo sedue lo mot nogo mea kebali, nggano, mot go usu kebali, nggano, anggul usu, amble lo weng go mea semu. ⁶ No, motnang sogo mea pu, Woy Wali Iram go woy (imam) nggano, imot go Ki Wali Iram go tamot so mea pu. Saula-saula go taut-a, motnang sono mea idok, nggano, imot go saysuk, nemotnang go taut lo mea yakay. ⁷ Motnang danamon so, suongsut tra go, way dali, nggano, kon way so, mot sono mlabui suop go way dali so, motnang danamon so, mot go nan no, warisan mea iti, nggano, warisan mot go tete so, yakay-a senang so mea gigit. ⁸ Yang, Genam Woy Wali Iram, demutrui nogo klum ey. No, gugluik ey nenagluim eygo nogo, Genam ikle ey! Mot go seguot drang, seni so, Genam lo mea iti, yakua gluik. Nggano, senang tegadi motnang eygo, Genam lo mea dok. ⁹ Saula-saula eygo, mot go duo-yap go sui-a, blo sono mea pupu! Nggano, duo mamdat-yap, saula-saula tang nesip nogo, ngga ey, nemotnang ikum go, seduekabung naklay lo mea yang, seni so, nemotnang ngga, Woy Wali Iram lo taiti iti go tang gabe. ¹⁰ Woy Wali Iram ba no, genam yakay gabe tetra, atgo Ki Wali Iram ba no, at go dabuilap yakay so, seni so, amka keselamatan, Nemot lo genam sono kok go nggano, genam juba kebenaran lo, gabe pok-sing, wip ey dok genang sedue lo, nemot go wengkabui no srem glung go kalik so, nggano, wip ey dok genang kabung lo, nemot go srem kok go kalik so. ¹¹ Yang, tatamang kukunan no pupung go kalik so, nggano, wasmakuali go tip usu lo pupung go kalik, ngga kalik so, Woy Wali Iram, Ki Wali Iram go tap seni eygo, mea pupung nggano, suong ku no, saula-saula go usam iway mea keklak.