Sion go blong pung genang ¹ Iplak-a, blong so lemoy-a! Seni so, mot go blong pung sogo, nggano, mot blo sono, Woy Wali Iram go blong mea ngap. ² Yang seni so, kukunan kuklik lo teglue go, nggano, saula-saula kuklik golo kebet go. No, mot blo sono, Woy Wali Iram go neblong, mea pli, nggano, mot blo no, Nemot go blo, mea ngap seni. ³ Mot go blong sono, keduingkeduing so saula-saula uweng go, nggano, mot nogo so, deguena-deguena mot go blong sono uweng go. ⁴ Yang, susu teguik go, ngesono-nggasono, mot se ikum, nemotnang naklay, mot sono weng go mea yaluim; ket sik so, mot go duo-yap sedue denok uweng go, nggano, mot go duo-yap kabung denok, tuem no kuadok go, mea weng. ⁵ Ngga ku nogo tawasrang ey mot mea glok, nebuemnemu yakay ey mea ikum, saduibong ey mot pling go, nggano, dabui yakay ey mea dega, seni so, biap ngga idi sik sogo sengin go, way so mot sono mea kok. Nggano, saula-saula go taut wayso, mot sono mea rli. ⁶ Unta miam dega golo, mot go nan mea kenok. Median ey Efa eygo sik sogo, unta-unta ngguot lo. Syeba sik sogo, nemotnang naklay, mea weng-lak, emas ey kemenyaan eygo, mea idok go weng, Woy Wali Iram go sui iway ey idok go mea weng-lak. ⁷ Kedar sik sogo kambing domba, mot sono mea yaluim-sing, Nebayot sik sogo domba-domba kemsi, dewi taitinang sogo so, dali mea keduik-sing. Genam go demusung blo no naklay mea puit, Genam yakay genang sogo, taiti so, nggano, Genam go Ki wali Yap, blong dega ey mea iti. ⁸ Nemotnang ngge, utkenuim kalik so, nando lo nenega go nggano, wiyagui kalik so, nemot go put no gualing go? ⁹ Yang, nemotnang nan-nan ket sik sogo so, Genam lo bage bubung. Tarsis sik sogo bayi, banim temu no mea koklong, mot go duo, sedue denok ket sik sogo, wawi go koklong genang so, perak, nggano, nemot go emas, nemot ey idok go mea weng, Woy Wali Iram, mot go Ki Wali Iram go sui nang sogo, nggano, Teguop Iram, Israel go Ki Wali Iram tang sogo so, seni so, blo sono mot-a, Nemot lo mea iti. ¹⁰ Mot go demu tema, amble saula meno lo mea buong, nggano, motnang nogo, nemotnang go deguena-deguena lo, mea tebok. Seni so, Genam go dabuipiam tang so, motnang mo tenguo go nogo, no, motnang klum genang sogo so Genam mo iwat gabe. ¹¹ Mot go yakena yataput-yataput, senang so tenuing go mea gigit, kuklik-kublong meakua kadun, motnang sono saula-saula lo taut iti go weng genang, boy ba sogo sedue kalik so, nemotnang go deguena-deguena wawi go koklong. ¹² Yang, saula tang, nggano, mot no kebali ide ey taling go kladian-a mea nega-sing; saula-saula ngga, waluk-sing go mea nega. ¹³ Libanon go blong yangga, di Sanobar, di berangan, nggano, di cemara, kerlam-kerlam so, mot sono, king go mea weng, Genam go Yap Teguop go, teguop so srem, nemot lo mea semu, seni so, Genam go masi gualing go sip go blong, Genam lo mea pung. ¹⁴ Ide ey mot so taling go sedue go duo-yap mot sono mea weng, nggano, mea unuik-sing, nggano, mot so piam go seduekabung naklay mot go masi dabui no mea unuik go duok. Mot sogo "Woy Wali Iram go yakena" so nemotnang lo mea pu, "Sion, Teguop Iram, Israel go Ki Wali Iram go tete sogo." ¹⁵ Motnang go wali banim go way sogo, mot banom itak go ku nogo, sedue lo dabui piam go, nggano, klaya duonang logo kua wawi go, nggeasui go, mot nogo senang yakay lemoy genang Genam lo mea semu, dabui yakay duono-duono itak genang-a mea lemoy. ¹⁶ Saula-saula go min-a mot lo me sup, nggano, kladian-kladian go min mea sup, mot seni so mea senong, seni so, Genam ngge, Woy Wali Iram, mot go Susuoy Iram, nggano, mot go piam so suep go, Don Iram, Yakob go Ki Wali Iram. ¹⁷ Tembaga way sogo, emas-a Genam lo mea iti, nggano, besi way sogo, perak-a Genam lo mea iti, di way sogo, tembaga-a mea iti, nggano, demu way sogo, besi-a mea iti; Ngengam yakay ey, nemudi sogo eygo-a, Genam mea mot go wali, nemot lo wawi go klong genang. ¹⁸ Mot go nan no, takebali piam go, pupluok go deguo, meakua tup. Mot go nan nogo, uwaluk go, kekebong go, taybat nebut, meakua tup; Mot lo mea pu, “genam go demu tema, suey so wali-wali so!" Nggano, mot go yakena go yataput-yataput "Iwai ey!" ¹⁹ Mot nogo, kublong genang sogo, woy yakua pli. Nggano, wadi go kuklik go nogo, banu yakua ngap, blong genang sogo, No, Woy Wali Iram tang go-a, senang blong so, mot sonogo mea ngap. Nggano, mot go Ki Wali Iram-a, mot go blong so naklay mea lemoy. ²⁰ Yang, yakua susut go woy-a mot nogo mea pli, nggano, yakua sut go banu-a mea blong, seni so, Woy Wali Iram go senang blong-a, mot nogo mea lemoy, nggano, sikebong genuing susuing go ku mea yam. ²¹ Nggano, susuing go sedue kabung naklay, seni eygo so pupluok go sedue-a mea, nan ngge nogo, senang so nemotnang lo mea susuing; di suey go kuoy go, Genam tang so kuali go kalik so nemotnang gemang, genam go blong nemotnang lo taling genang sogo so. ²² Tang seguay dato go, tang babu dega goso mea lemoy, nggano, don kua go, don dega eygo so, mea lemoy. Genam, Woy Wali Iram, lo duing go keda seni so ngga mea lemoy nemot go ku pung gono mea lemoy.