Saula ngga go piamkonkebamling nabi lo pla-sing go ¹ Kua duing, wali-wali so mot susuoy genang, Woy Wali Iram go ta tebot, nggano, kua duing, Woy Wali Iram kama mo wik, mot lo uusi go yakua tup. ² No, mot go taybat logo tang so, mot lo uusi go Nemot kua tutup. Mot go kuklue piamkonkebamling lo, mot ey mot go Ki Wali Iram eygo, sak gemang kok. ³ Motnang lo wamoy mlue go, wom king go, nggano sedue but go kin lo, mot go ta yam so mo sebut. ⁴ Perkara sogo talogo ey tebadali motnang lo semu go, nggano, nemudi so kua uwet ne. Wamoy mumlue, nggano, senikua go-a blo sono, motnang lo ne iiti, sedue kabung meno waluk genang sogo atui-a sesemu, nggano, taybat-a pupluok. ⁵ Motnang go atuia-atuia piam golo, lema wit go si kalik, kebong ta go gigit. Lema wit go si ngga wang go, ngga ba sik sogo, nemot go lema mea pung. ⁶ Atuia ngga kalik go, mot nogo nemot go seni kua, sebankut ut lo klik go amka kalik, seni kua! ⁷ Senang so, atuia piam go-a, motnang lo sesemu, nggano, kedaso pluok sogo-a ne duduing. Piam kua go sedue, suali kua goso, but go ne kekebong. Nago sono, motnang klong go, nemotnang lo tabat piam go ey kebong eygo-a ne iitak. ⁸ Ngengam atuia-a, motnang logo, yakua semu, nggano, mot go tasam naklay, nemudi sogo kua ne. Mot go tap, pay-pay so, nggano, sedue kabung tap ngga lo keng go, dabui yakay kua. Nemotnang go kuklue piam konkebamling wa go ⁹ Ki Wali Iram sono, saula ngga lo pu go, "Nggeasui go, atnang mo senong, sogo temoy no, atnang nogo Mot logo yakua wali so susuoy ide ey genamnang so taling go sedue go ta sik sogo. Blong so atnang bubung go, no, kuklik-a gabe pung. ¹⁰ Takasa so, nemupung go sedue kalik atnang lo uwet; kublong sogo atnang masi mea kling, kuklik ba logo kalik; sedue kabung uwali go nesip nogo, atnang-a, kebong go kalik. ¹¹ Atnang suali ey, nggano, dabui ba u suk-a; nemudi sogo so atnang uwet, no, nemudi sogo ne kua; suey so susuoy genang so atnang duing go, no, nemot go seni kua ne. ¹² Seni so, Mot sono atnang lo taybat semu go mata dega so; atnag sono go, atnang go kuklue lo, tagabe pepegat. Seni-seni so, atnang go piam konkebamling, atnang mo senong, nggano, atnang go kuklue piam konkebamling mo senong. ¹³ Atnang teguey go, Woy Wali Iram sono plesagui mo semu, nggano, atnang go Ki Wali Iram no kekeng sogo moy so. Sedue meno, ide ey atanang lo taling gono, piam mo semu; Tap kua go ba lo, diding ba no, atnang go kunala mo degut, nggano, atnang nebut wamoy mlue-a pepen. ¹⁴ Demutrui nemudi sogo, ket sono mo betep, nggano, wali nemudi sogo, ket sono mo teguo Ibe sip nogo, nemudi sogo wali tasam, suey so kua keng go pupluok, nggano, dabui lo keng go, seni-a pepen go, ket sono mo rlo. ¹⁵ Nemudi so tetaling go sedue mo kua, nggano, ket sono go taybat nando lo ya tenguo, nggano, nemot tang go, taybat lo ne waluk-sing dali." Nemot go blung susuoy genang so Woy Wali Iram lo dali mo semu Woy Wali Iram mo ikum, nggano, nemudi so wali kua go kua iwat. ¹⁶ Nemot lo tawasrang ey glok go, klayanang go logo, nemudi so ip go, nggano, tapla sogo kua pen ne. Nemot go don tang golo suey sono, Nemot lo susuoy genang, nggano, don ey nemotnang nogo suing genang iti sogo. ¹⁷ Nemudi sogo, wali ey suey so wali-wali eygo-a amka besi ey topi eygo kalik kok go. Nemot lo naklay mo iwat, kunaklay pali-sing genang sogo, ngga ey nemudi so kua uwali go nogo, way taling genang sogo se. ¹⁸ Nemot go plesinang nogo way, nemotnang go tasam tang so mea iti. Nggano, saula-saula ket sogo nan-nan sogo, Nemot go kisebui sik sogo meakua kap seni. ¹⁹ Nemot go don ey blong eygo, sedue kabung woyklak ey woysut eygo sik sogo lo, suali ey ta-a mea kong. Bulatang klak go uweng go kalik so, Nemot lo mea weng. Nebit kangok golo, mot-ak go kalik so mea weng. ²⁰ Nemot go blung sono Woy Wali Iram lo pen go, "Yerusalem sono, Genam mea weng, motnang suey wali-wali so susuoy go, motang go kuklue piamkonkebamling sik sogo teguey go, itak go susuoy genang so mea. ²¹ Ngeasui go, motnang ey tegadi gabe dok: “Genam go don motnang sono gabe iti, don ngga, senang so mea gigit. Mot go duo-yap no se ngunguok. Duono-duono, nemotnang lo senang so ngunguok genang."