Woy Wali Iram logo suey wali-wali degut genang deguo ¹ Ayo, hai bunuo eygo sedue kabung naklay, wenglak-a, nggano bu drop-a, nggano, hai nemot go duoy kua go sedue kabung, wenglak-a! Duoy kua goso gandum iti-a, nggano, se dam, anggul nggano susu duoy yakua kua iti goso dali mo ta! ² Sogo tang so, motnang go duoy meno-meno yakua dam goso ne nenay, nggano, mot go seguot duoy meno-meno nu yakua temoy goso ne betep? Tup-a! At sono, yang motnang ten dedam klong go ngga suey nggano, motnang ten tom dega eygo mea dam. ³ Motnang kama se tui! Nggano, Genam sono se weng-lak; Se tup, nggano, motnang wali genang! Motnang ey senang tegadi Genam mea dok, senang klum no, Daud ey tegadi don ey Genam lo dok go kalik. ⁴ Seni so, saula-saula nogo saksi nang so Genam lo nemot mo taling, nggano pemlenta saula-saula tang nogo raja meno so mo lemoy; ⁵ seni so, mot lo mea usi saula tang mot kua senong go, nggano, saula tang mot kua senong go, mot sono mea kap weng, Woy Wali Iram, mot go Ki Wali Iram logo tang so, nggano, Teguop Iram, Israel go Ki Wali Iram, yang genang so mot go iway mea iti. ⁶ Nemot ya tegu gono, Woy Wali Iram se uwet; Nemot dagu sogo no, Nemot sono se usi! ⁷ Ngge suey, sedue kabung piam go, nemotnang go tap itak go, nggano, sedue kabung taybat eygo, nemotnang go atuia piam go itak go; ngge suey, Woy Wali Iram sono tandali nemot teguey go, Nemot mea klum seni, nggano, imot go Ki Wali Iram no keng go, seni so, piam naklay nemot lo mea suep. ⁸ Yang, Genam go duduing ngga, mot go duduing kalik so kua, nggano, mot go tap ngga Genam go tap ey kua kerlam, Woy Wali Iram go nebut ngge kalik so: ⁹ Kukunan sik sogo, ut blo dega seni so, nggakalik dali so, ket dega so Genam go tap, mot go tap sik sogo, nggano, Genam go atuia ngga, mot go duduing sik sogo ket dega so. ¹⁰ Yang, sa ey sadodon eygo, ut blo sik so lili go kalik so nggano, tandali go meakua klak, no, kukunan blo lo, bu so lemoy go mea pipi, nan say gono tatamang-a mea pung-sing, wasma nok usu sedue no iti go, nggano, ten-a sedue ten sogo no mea iti, ¹¹ Ngga kalik so, Genam go nebut, Genam go lom sik so pung go: nemot Genam sono go seni kua goso meakua weng, no, Genam lo duduing go nemot mea kebali, nggano, seni ey mea tagot, Genam lo sogo so nemot no pu go mea lemoy. ¹² Yang, yakay ey motnang mea klong nggano, yakay ey mea wawi go klong; meduim ey kumeduim ey mea yakay, nggano, mot go nemu damoy so sek mea pla, nggano, duen sogo di naklay lo ta mea teguak. ¹³ Wong diding so pong go, di sanobar so way so mea pung, nggano, kecubung so pung go, di murad-a way sogo mea pung, nggano, ngga mea lemoy go, Woy Wali Iram go sui iway, iti genang sogo, ngga lo taling genang, senang so mea gigit, yakua nega.