¹ Ngeasui go, at go debui sop nogo usam kluo-lu so sang. At go nay sop go anggul usu nogo usam mea kluo silu: At go nay sop nemot go anggul usu senginku so menduim tablang lo gemang sang. ² Nan nemot lo kop go, demu leguok go tega-sing sang, nggaey anggul teguop kuoy go nok lo gemang kuali. Nggano, woyplewoyap usu nemuluik genang usu nasip no gemang klik. Nggaey anggul sik genang sogo mu gemang tuet-nawon dali. Nggano, usu yay got-tenawon, suey so anggul seni tagot sogo be. No, nemusup eygo anggul-a gemang tagot. ³ Yang nggeasui go, esang Yerusalem sogo sedue kabung ey Yehuda sogo seduekabung ey, at ey At go anggul usu eygo ngganemot sogo tangpen-a. ⁴ Sogo-a, At lo Genam go anggul usu nggenemot nogo ya semu, nemot nogo Genam lo naming kua semu go, sogo-a ya pluok lu? Anggul seni suey go-a tagot genang Genam mea bubung, sogo sik so, sringbuit eygoanggul-a ne seni tagot? ⁵ No, nggeasui go, mot no Genam mea pen-asi lu Genam go anggul usu ngganeot no Genam lo pen genang: usu tema wong eygo ngga Genam lo mea tuo-sing! Ngga ey, usu ngga tema togut go ngganemot lo yam so tram go mea puem, ngga ey usu ngga masi lo mea kenan. ⁶ At lo ngga kalik semu go wongdiding-a usu ngga mea pung, ngga ey neguen ey woy eygo-a wayso mea pung, tatamang kali meakua ibot-sing; Utkenum sono At lo pu, usu ngga blo sono go sa yakua pu. ⁷ Yang! Woy Wali Iram go anggul usu ngga tang Israel so pu go. Nggano, seduekabung Yehuda ngga Nemot go tatamang so pu go. Nemot-a nemudi sogo tasam-a Woy Wali Iram lo bubung, no, kuasenigo tasam-a gemang pung. Senieygo so Nemot lo bubung go, no, tabat-a ne gigit. ⁸ Sedue go yap-yap so degut-pung go, usu meno sik so usu meno no degut-pung klong go, ngga ey sedue kabung temu nogo sip kua itak go, motnang seguong-a nan ngge ba so susuing go, esang motnang seglaplu! ⁹ At go kama no Ki Wali Kumam go nebut mo tup gabe: "Seni so, yap mata dega so sedue kua suing goso klui mea tebung. Yap teguop go kangok-kangok go ba nogo seduekabung mea kua suing. ¹⁰ Ngganemot so, anggul usu bata go dega ku tanamon yam so tetrok go sik sogo anggul ip bleki klaya dato so mea iti. Nggano, nemot-a wasma nok usukeba klaya kuali go, no, kebakuok dato no wasma seni mea iti." ¹¹ Esang, wadikua-wadikua buong go mawo genang bu-a uwet go nemotnang, nggano suing go e... ku-a klik go, nemotnang go saysuk nengkoy anggul bu lo tutui go tang, motnang seglapu! ¹² Itar ey, gambus ey, degui ey suling eygo, nemotnang go walop tendedam sogo bano pepla go. No, nemotnang lo Woy Wali Iram go tasam kua ikum, nggano Woy Wali Iram lo tasam kangok go pupluok go, nemotnang kua iikum ne. ¹³ Ngga tang so, betep genang sip sono, Genam go blung mea se klong! Nemotnang sogo-sogo kunala kua go tang so. Sedue sui eygo kangok-kangok go tebadali ten lo mea leguot, nggano bunuo lo woybano blindon mea lak. ¹⁴ Ngga tang so sikebong sip lom dali ngang go bata so mea gigit. Ngga ey Yerusalem go rley-kaboy ey ngganemot ba sono ku sono li genang so. Yakena ngge sogo, sedue kabung ey rley-kaboy ey naklay-naklay mea nega-sing. ¹⁵ Nggano, Nemot lo seduekabung naklay ku sono mea kut-sing, sui dega eygo sedue-sedue dabui-a blo no iti go sedue kabung, ku sono mea suing. ¹⁶ No, Ki Wali Kumam-a nemudi sogo, don kango go, tang so blo no mea iti. Ki Wali Iram kon kua go, Nemot go blong teguop Nemot go senieygo ba no mea blo sono gemang iti. ¹⁷ Yang, Nemot go usu nogo kalik, domba daley ey kambing daley ey neguen mea dedam. Nggano, taut miam eygo sedue yap toguop go togot go yap sring blo no ten so mea. ¹⁸ Esang, kuklue so wamoy mlue tegan lo dok go mumlue go, nggano dikebleng tegan logo kalik piamkonkebamling lo dok go, Mot seglaplu, esang. ¹⁹ Nemotnang lo pupu go, "ya ngge suey! Ki Wali Iram lo, Nemot go tasam kangok go keda so lemoy go, imot ikum genang. Ngge suey, Konkua Israel go Ki Wali Iram lo nemot go Ki walitamot pu go weng go, imot senong genang." ²⁰ Esang, piam go-a sueygo so wayso pu go, nggano, tasuey goso way so piam so pu go, nggano, kuklik go-a way so kublong so lemoy go, nggano, kublong-a kuklik so ne lemoy, bete eygo-a tomeygo so pu go, tomeygo-a bete so ne lemoy, motseglapu. ²¹ Nemotnang go saysuk-a naklay go dega so pu go, nemot go saysuk-a senong go dega so pu go, nemotnang seglaplu! ²² Esang, budoneygo bubluot genang nemotnang sedue naklay go dega, nggano, budoneygo bluot go sre genang sogo naklay dega go sedue. ²³ Nggano, klayduoy logo tang so piam sedue-a senieygo so pu, nggano senieygo-a wayso ne paysing. ²⁴ Ngga tang so, udung dop koy lo dasing go kalik, nggano nenguen lekuoy koynebleng ba no kuim go kalik, nemotnang go srang ey naklay mea buin. Nggano, sung kalik nemot go tega mea pling. Ki Wali Kumam go senong nggano Ki Wali Iram, Israel go Blong Wali Iram go nebut Nemotnang lo tenguo go no wayang go tang so. ²⁵ Ngga tang so, Woy Wali Iram go sagui Nemot go blung nogo, blo sono Nemot go ta mo iti, nggano, nemotnang mea but Nemot lo, bubuong ey medium-meduim mea king. Nnggano, tap nesip lo nasrok kalik nemotnang go temoy mea tega-sing. Nemot-a, naklay ngge lemoy go, Nemot go dabuipiam maning yakua tebuo. Nggano, Nemot go ta blo sono maning iti go susuing. ²⁶ Ket sik sogo saula-saula sono amkasron(bendera) Nemot lo maning gemang uwik. Nggano, kukunan sring sik so, nemotnang usi genang so iwoy mea sruan. Seni so, keda-keda seni so nemotnang mea weng! ²⁷ Nemotnang sik sogo don kua go, masi wakot go, yakua kenuong. Nemotnang nemu kua sup, sip ngga nogo yakua srek, yakua kenong, kuibey ey masisuk tegan eygo yakua tong. ²⁸ nemot go pleday kalong suon go, nggano pleunen dali kikik. Nggano, nemotnang go kuda go masiwon don dega ey demukoy kali, nggano, dikebleng kuda lo lelek go isegan don dega eygo nebit go kluim kalik. ²⁹ Nemot lo, nebut tuot go singa unen logo kalik, singa nguot lo nebut tuot go kalik nemotnang go kluim, kayang nemotnang lo klik go, nemot lo dam genang so menay mlak go, iti go kekap go, lom sikso tandali lek genang sogo yakua. ³⁰ Ku ngganemot no, nemotnang lo kayang klik go biap alui pupui go kluim kalik mea tup. Kukunan blo sono, seni so, kuklik go, naklay kukuim sogo mea ikum, nggano kublong go naklay gum lo mea ketok seni, ngga kalik seduekabung lo mea ikum.