Pasal 54
Koresh ngga Woy Wali Iram go ta ba sogo taut
1
Nggekalik so, Woy Wali Iram go nebut gabe: “Ngge, Genam go nebut! Genam lo taling go sedue, yangga Koresh. Koresh nogo nebut gabe, ‘nemot go tasemla idi no, Genam lo mlak go, ku sono Genam lo saula-saula kenok go, ngga ey, raja-raja ku sono Genam lo ketuk genang so. Yataput-yataput nemot go suong damoy no, Genam lo tenuing genang, ngga, yakua kadun goso gigit genang.
2
Yang, “Banim temu no, mot go nemuku no, Genam-a bise go mea koklong, nggano, medium-meduim ku sono mea kuk-sing,
tembaga lo semu go yataput togut-klong genang sogo so, nggano, besi kok go sebendi pedueng genang sogo so,
3
Ngga ba so kok go gigit go taut ey, drang sip ey Genam lo mot no mea taling. Nggatang so, mot senong genang: Genam ngge, Woy Wali Iram, mot go Ki Wali Iram, mot so mot go sui no usi go gabe.
4
At go tamot Yakob, ngga no, Israel At lo kuoy go tang sogo so. Mot go sui no, Genam lo mo usi go tang sogo so, nemot-a mot logo naming kua senong go.
5
Genam ngge, Woy Wali Iram, meno-meno kua. Genam seguong-a klaya! Ida meno-meno kua. Don ple-a, mot sono Genam lo mo wasey, nemot-a, Genam ngge mot logo maning kua senong go.
6
Sedue kabung naklay, woyklak sik so iti go woysut no pung go, senong genang, ‘Genam ngge, Woy Wali Iram gabe, meno-meno kua,
7
nemlong ey kuklik eygo so semu go. Teguop go ey kua seni go eygo so semu go. Genam ngge, Woy Wali Iram, naklay so lemoy go.
8
Hai ut! Blo sik so, kunala nebuem go-a duong-a! Nuey-a, kunala nemudi sogo, sa kalik so utkenuim lo na pu-kunyun. Kukunan na tenuing go, nggano, suey wali-wali-a tron ey pung genang. Nemudi sogo wali, kukunan blo nogo nase pung-sing. Genam ngge, Woy Wali Iram! Naklay-naklay ngge so semu go, Genam lo.
Woy Wali Iram ngga Ki Wali Kumam lo
9
Mot seglaplu! Nemot so semu go ey, nando lo nebut uwaydang? Sedue ngga, saulakabui kesuop go kluip datu kalik go wa. Se duing, nemot so semu go nogo nan logo ya pu, “Sogo so, mot semu-tegoy?” kuago, “Sogo-a, mot lo semu to?”
10
Mot seglaplu! Nglangin sono, nando lo pu go, “Sogo-a, mot lo mo tui?” nggano, unen sono pu go, “Sogo-a mot lo mo tui?”
11
Woy Wali Iram, Ki Wali Iram! Israel so lemoy go, Teguop Iram lo pen go nebut gabe: “Genam sono, motnang lo usi go ngga duo sogo usi? Genam sono plenta semu, Genam go ta kebali tang so?
12
Kukenan Genam lo semu go, ngga no, nganemot blo no sedue kabung mo semu. Ut, blo sono Genam go ta lo gabe kong, ngga naklay, nogo Genam lo gabe pepen.
13
Koresh Genam lo mot-ak go mea weng. Nggano, nemot go tap, nemudi so Genam lo mea semu, Genam go kota tandali nemot lo mea klik, nggano, Genam go blung boy ba sik sogo, nemot lo mea plet-dak. Drang logo yakua king, mea plet-ak.” Ngga, Woy Wali Iram, Ki Wali Kumam lo pen go nebut.
14
Woy Wali Iram lo pen go: Usu wasma Mesir sik sogo, Etiopia ey Syeba eygo sik sogo duoy, sedue kabung tang babu go blo dega no king go, mot sono mea weng-lak, nggano, motnang goso mea lemoy, nemotnang, motnang go taton lo lante ey mea koklong, motnang sono kenuong go, motnang no nemotnang lo mea mlue. Motnang nesip sogo, Ki Wali Iram-a gabe, sip meno sogo kua! Nemot mit sogo, Ki Wali Iram dagu sogo, ida meno kua.
15
Seni so, Mot ngga Woy Wali Iram, ngga ba no son go, Israel go Ki Wali Iram, Susuoy Iram.
16
No, didemu no ta koklong go sedue-sedue, naklay suongsut ey se teguey, noda ey se pluep-lak.
17
No, Israel-a, senang wali ba no Woy Wali Iram lo mea susuoy. Motnang, suongsut yakua tra, nggano, noda yakua tui goso, senang wali so, suey wali-wali so mea susuing.”
18
Seni so, Woy Wali Iram go nebut, ngge kalik so gabe: Ut so semu go, -- Nemot ngga, Ki Wali Iram – Kukunan semu-won gono, kong go, -- ulue so gigit genang so kua, no, nemot ba nogo sedue suing genang so semu go -- Genam ngge, Woy Wali Iram, meno-meno kua!
19
Maykok so, Genam lo nebut kua pen, kuklik go sip ba nogo Genam kua pen. Tebadali seni kua goso, Yakub go duo-yap lo Genam lo uwet sogo so kua. Genam ngge, Woy Wali Iram, nebut seni-a senang so gabe pepen. Nemudi sogo nebut-a, senang so gabe pen. Tang nogo, Genam nebut seni-a, mea pen.” Saula-saula tandali Woy Wali Iram no keng so usi go
20
Yaluim-a, weng-a! kerlam-kerlam so ya taling go, hai, motnang saula-saula sik so mo susuoy go, No, duosana-sana didemu demat, susuoy tap kua gono takong go ngga puplu so.
21
Mot go kutrui-kutrui ngga dia sono nase pen, kerlam-kerlam so nemotnang pen genang sogo: kunala nggenemot kuduong sik sogo, nando lo mo pen? Nggano, banim sik so nemot lo mo pen-ngam? Ngga, Genam Woy Wali Iram seguong lo mo pen! Meno duo lo kua, ida meno logo kua! Genam seguong-a, Woy Wali Iram! Ki Wali Iram, Susuoy Iram nemudi sogo, meno-meno kua. Genam seguong-a gabe!
22
Genam sonotandali se iwot! Mot go saysuk susuoy genang sogo so se itak. Hai, kukunan sedue kabung seding no seding no! Seni so, Genam-a, Ki Wali Iram gabe, meno-meno kua.
23
Genam tang so, Genam go tang go tamopegat, Genam go lom ba sik so, senieygo ngga mo pung. Genam go nebut, tandali go yakua lek go-a mo pen: Nggano, Genam go suong ku no sedue kabung naklay isegabuiem mea unuik, nggano, kengduduk genang so, nebut naklay ba nogo tamopegat,
24
Nggano, mea pen: “nemudi sogo, don ey go ngga, Woy Wali Iram ba seguong so.” Nemot sono dabui piam go sedue kabung naklay, suongsut iti genang so, Nemot sono mea weng-lak,
25
no, Israel go duo-yap naklay-a seni mea ikum, nggano, Woy Wali Iram ba no, yakay dega-a mea pung!"