¹ Saula Babel go tasokokonggo Bel mo unuiklak, saula Babel go tasokokonggo Nebo mo kenong-lak, ta so kong go ngganemotnang menay go yalu blono mo ta, menay go tatondi don blono mo ta; yangga nemotnang banim go motnang logo ey nemogo sui belono iti go, nggeasui go menay go tatondidon blono mo ta menay ngga nemot ide lo saisuk ey lasu, ² Idekeba ngganemot lo nemotnang yakua wali. Tasokokonggo ngganemot nang keram – keram so mo kenong-lak ngganemot no mo unuik-lak dali nggaey nemotnang sedue boy banogo kalik so mea iti go klong-lak. ³ Ngganemot sogo so Genam no tup ya, ey motnang Yakub ko tang, ey motnang Israel go tang maning suing-lak ko, ey motnang maning sani ba sogo no Genam lo yalu blono mo tui, ey motnang maning sani ba sogo no Genam lo sui blo sogo mo iti. ⁴ E motnang kabung nalo sedue seni so mo lemoy Genam ngge Nemot lo nggano motnang kut yamso mo blong gomo Genam lo ta no mo iti go ku nogo yakua iti go nik. Genam ngganemot mo semu sanyu nggano nggenemot kalik swong so Genam motnang nogo mea semu; Genam mot nang yalu blono mea tui ngge semu go motnang wali genang. ⁵ Motnang lo duing go Genam nando ey ya keram, nando ey ya i nggano nando kalik so ya pu, ngganemot sogo so atnang keram? ⁶ Sedue kabung emas nemotnang go keba ba sik so mea nsuong nggano perak ko ide mea ikum dali, nemotnang lo kebali sedue drang mea iti emas lo demat semu genang, nggano nemot nogo ta mea kong, nggano nemot nogo mea kut dali ! ⁷ Nemotnanglo ngganemot yalu blono mea tui nggano mea lek, nggano nemogo sip no mea tui; ngganemot no nemot mea ib no ngga nego ngge nego yakua klong. Sedue kabung lo nemot nogo mea usi, no yakua wa nggano nemotnang koy wong baso wak klung go nemot logo yakua iti go pung sip suey gono ⁸ Ngganemot sogo soo ngge nemot se duing nggano suongsut se tera, suey – suey so dabui bano se duing, e… sedue kabung nembut yakua tup ko! ⁹ Seduinglak tasam – tasam banim go babu asi nogo, Genam ngge Ki Wali Iram lo meno kua, Genam ngge Ki Wali Iram lo Genam kalik ko kua, ¹⁰ Yansi go ku nogo sogo kalik ko lemoy genang sogo Genam lo banim mea pen nggano babu asi sikso itigo maning kua lemoy go, ngge kalik pu go: Ago nembut pen go ngganemot mea lemoy nggano Genam go dedung ngganemot Genam lo mea lemoy, ¹¹ Wi iseng eygo woy kelak sikso mea pugo weng, nggano sedue kabung Genam go nebut pen go lemoy genang sogo sip ket ko sikso mea weng. Genam ngganemot mo pen, nggeasui go ta kebali so mea lemoy, Genam ngganemot banimso kunala balo mo duing, nggeasui go ta kebali so mea lemoy. ¹² Genam no tup ya sang e sedue kabung dabui blo sogo iti go, sedue kabung wali tap basik so pung go: ¹³ Wali Genam sik sogo nggeasui go ket so kua gemang, ngganemot sogo soo Genam lo dagu sogo mo lek nggano ta tegan Genam lo plet nang sogo mea iti dali yakua bung; Genam lo Sion yakena no ta tegan mea plet nggano Genam go iway Israel sogo mea iti.”