(Sesuoy Iram ngga Ki Wali Iram-a klaya) ¹ No, nggeasui go, Woy Wali Iram, Yakob mot so semu go, Israel mot so lemoy golo pen go nebut, ngge kalik so gabe. “Suali kua tra! mot Genam lo mo susuoy gabe, mot go sui Genam lo mo usi, suali kua tra! Mot ngge, Gemam go tete. ² Nago no, mot koklong go, bu blo lo li go, mot ey Genam mea koklong. Bulatang kangok go blo lo mot li go, bu logo mot yakua lek. Nago no, koy blo lo mot klong go, mot koy nebleng logo yakua kuim. ³ Genam ngge, Woy Wali Iram, mot go Ki Wali Iram, Don Iram, Israel go Ki Wali Iram, mot so susuoy go Susuoy Iram. Mesir sik so mot Genam lo susuoy go, nggano, Etiopia ey Syeba eygo-a, mot way so mo itak. ⁴ Genam go nemuku nogo, mot go seni kangok dega go tang so, nggano, blong ey, mot nogo Genam ngge klum kangok. Mot way sogo, sedue kabung-a Genam lo gemang itak, saula-saula-a, mot go wali way so gemang iti. ⁵ Suali kua tra! Genam ngge, mot ey gabe, mot go duo-yap, woyklay sik so Genam lo pu go, mea weng-lak. Nggano, woysut sik so motnang Genam lo mea yaluim-sing. ⁶ Dun idi sono Genam lo me pu: “Ma ya iti-a!” Nggano sada idi sono mea pu: “Kua gugluk ya!” At go duo-yap, sedue denok ket sogo, wawi go se weng-lak! Nggano, At go duo kabung denok, nan sring-sring sik sogo, wawi go se weng-lak. ⁷ Genam go sui ey pupu go sedue kabung, Genam go blong nang sogo so, Genam lo mo semu go sedue kabung. Genam go ta lo semu gono lemoy go, sedue kabung!” Nemot no mea pu, motnang semu go, Genam go sui lek nang so: Mot, Genam lo lemoy go, Genam lo mot mo kuoy!” Israel ngga Woy Wali Iram so tetaling go ⁸ Nuey-a, saula nemu pung go ngga, sedue lo wawi go dia sono na taling. Nemot-a nemu tegun gemang go, kama wik go, nemot-a kamasua gemang go! ⁹ Nuey-a, kerlam so saula-saula ey yaluim go, nuey-a, kerlam so saula-saula tang ey yaluim go. Nemotnang sik sogo, nando lo, kunala-kunala ngge nemotnang nogo ya pen, tasam-tasam banim go nando lo ya pepen klong? Nuey-a, nemotnang go saksi nemotnang lo wawi go se weng, dia no naklay nenguon genang. Nuey-a, sedue lo tup gono mea pu: “Ngga kalik seni so!” ¹⁰ “Motnang ngge, Genam go saksi-saksi,” Ngga kalik so, Woy Wali Iram lo pen go. “Genam go tamot, Genam lo mo kuoy go, mot senong go, Genam no keng genang sogo, nggano senong genang: “Genam Nemot lo!” Genam maning go nogo, ida meno kua, Genam gemang go nogo ida kua dali. ¹¹ Genam ngge, Woy Wali Iram Nemot lo! Nggano, genam sik sogo Susuoy Iram meno kua gabe. ¹² Genam lo gabe pepen, gabe susuoy, gabe penklong. Nggano, motnang nesip sogo ida meno kua, Genam seguong-a gabe. Motnang ngga, Genam go saksi-saksi, ngge kalik so, Woy Wali Iram go nebut gabe: “Genam ngge, Ki Wali Iram!” ¹³ Nggano, kusantegun go nogo, Genam ngge, Nemot gabe. Genam go ta ba sik sogo nando lo ya lek? Genam lo mo semu go, nando lo Genam sak ya kok? ¹⁴ Ngge kalik so, Woy Wali Iram go nebut gabe, mot go Susuoy Iram, Teguop Iram, Israel go Ki Wali Iram: “Mot tang sogo so, Genam lo sedue mot-dak go Babel sono gemang klong. Nggano, kikidik yataput naklay mo tenuing-sing. Nggano, sedue Kasdim go yakay yam so mo lasu. ¹⁵ Genam ngge, Woy Wali Iram, Don Iram, mot go Ki Wali Iram, mot go Deguena, Israel so lemoy go.” ¹⁶ Ngge kalik so, Woy Wali Iram go nebut gabe: Biap ba lo tap semu go, nggano, bu latang kangok so klak golo tap mo semu, ¹⁷ kereta kuda eygo ple pung sogo so, pu go pung go klong go, ple sedue ey don sedue dega eygo, nemotnang srek go tandali go yakua bong-lak, mo kebong, sagoy kalik so mo sut ¹⁸ Nemot lo pu go: “tasam-tasam banim-banim go ngga, kua duduing, walu sogo tasam-tasam senang so kua iikum! ¹⁹ Se ikum! Genam tasam demening go-a mea semu. Tasam nggeasui go, mo pung gabe, ngga motnang manng kua senong? Ya, kaseglo pay logo tap Genam lo mea semu, nggano, butuo bu duen logo mea semu, ²⁰ Genam go blong duen menay lo mea iti, duen uduo ey isuali eygo-a, padang gurun no bu Genam lo lemoy go tang sogo so, nggano, duen nogo bu Genam lo semu go tang sogo so, Genam go blung mo kuoy go nogo bu iti genang sogo so. ²¹ Genam go blung Genam nogo so Genam lo mo semu, Genam go iway pepen klong genang sogo so, Israel go kuklue mo suep. ²² Seni so, Genam-a mot lo kua usi gabe, hai Yakob, nggano, genam tang sogo so, mot kua susa-susa, hai Israel. ²³ Mot go korban domba koyno puit genang sogo Genam nogo kua iti go weng, Genam go blong mot go korban menay tong go logo kua iti, mot go korban sajian sogo Gnam lo ta logo kua plong, Genam lo mot nogo kemenyaan iti genang sogo susa-susa kua taling, ²⁴ Mot lo min kinemon eygo duoy lo itigenang sogo kua plong, mot go korban sembelihan lo Genam nutemoy genang sogo kua plong. No, mot lo Genam no ide mot go konkebamling lo gabe ide, mot go, kuklue lo Genam nogo ide-a gabe taling, ²⁵ Genam ngge, mot go kuklue kon kebamling so suep go, genam tang sogo so, Genam ngganemot gabe. Nggano, Genam mot go kluklue tandali go kua duduing. ²⁶ Genam, kua kay! Weng-a imot perkara ya pen go, mot go sogo sogo naklay dia no se pen, mot kuklue kua goso pu genang, ²⁷ Mot go babu asi lo kuklue pepluok, mot go nebut so pepen go sedue lo, genam go suong ku no sagui mo semu. ²⁸ Ngga tang sogo so, wengkabui-wengkabui kon kua go sip nogo kon eygo so mo lemoy, dabui ide ey Yakob kua genang so gemang iti, nggano, Israel wayang genang so gemang itak.”