(Woy Wali Iram go Tamot) ¹ Ikum-a! Ngga, Genam go Tamot, Genam lo taling go, Genam lo kuoy go sedue, nemot nogo-a, Genam dabui gabe iwat! Genam go Waglo, nemot blo no Genam lo mo tui. Saula-saula nogo idekeba, nenguon so dia no, nemot lo taling genang. ² Nemot logo kayang meakua klik, kua go wak klung go klum yakua, tap logo nebut tuot go yakua tup. ³ Bluim teguok go kalik, meakua pedueng, nggano, sumbu koy nebleng mo kenip go nemot meakua sut, no, kengduduk so idekeba nemot lo mea lek. ⁴ Nemot tang go, meakua kenip, nggano, meakua pedueng go pui, e... kukunan blo nogo demutrui nemot lo mea kong; nemot lo nguok genang so, nan-nan naklay bubung. ⁵ Ki Wali Iram, Woy Wali Iram lo, nggekalik so pen go, ut nemot lo semu gono, nemot gabe glun kukunan so sey-won go, ngga ey nemot blo no naklay pung, ngga ey, nemot blo sogo sedue kabung nogo nebuemnabit so iti go, nggano, nemot blo no uwali go nogo, dabuilap mo iti: ⁶ "Genam, Woy Wali Iram lo mot usi go gabe, motnang susuoy genang duduing sogo so, mot go ta no mo mlak gabe; mot, Genam lo mo semu, ngga ey mot no mo iti seduekabung naklay nogo tegadi go dok, saula-saula nogo neblong lemoy genang so. ⁷ nemu pung go, nemu pli genang sogo so, idekeba ba sogo sedue kabung, idekeba yap ba sik sogo pung genang sogo nggano, kuklik go ba so susuing go sadue kabung, kikidik ba sik sogo dia sono pung genang. ⁸ Genam ngge, Woy Wali Iram, ngga Genam go sui gemang; Genam go blong meno duo sono go, Genam yakua iti, kuago, duo sana-sanan nogo, Genam go iway yakua itak. ⁹ Banim sik sogo, nebut kungap pepen go. e... nggeasui gono pung go gabe mo lelemoy, kunala-kunala demening go, Genam lo mea pepen-klong. Kunala tasam ngga, maning kua nenguon go, ngganemot mot sono, Genam lo gabe pepen." Sesuoy genang sogo iway ¹⁰ Woy Wali Iram nogo so, usam inim-a se kukluo, nggano, kukunan sring-sring sik so, Nemot nogo usam se kluo! Nuey-a, biap alui nemot go seni naklay ey kurlui go bubut, nggano, nan-nan nemot go sedue kabung naklay eygo lo sek se iti. ¹¹ Kaseglok pay, nemot go lom ba lo usam se kukluo, ey kota-kota, nggano, Kedar lo susuing go yakena-yakena lo se kukluo! Ngge suey, demu meduim sogo lo, sek ey iti go, ngge suey, meduim-medui kalong sik so, nemotnang lo usi go! ¹² Ngge suey, Woy Wali Iram sono nemotnang lo takokong go, nggano, nan-nan sono go, Nemot go iway pepen-klong go. ¹³ koklong go, plesedue kalik, Woy Wali Iram lo ple mea pung, ple sogo sedue no, nemotnang nogo ple tui genang don Nemot lo iti go kalik; sek ey waykut ey, Nemot sono Nemot lo iti go, Nemot go plesi-plesi nogo, nemotnang go don, Nemot lo gemang taling. ¹⁴ Banim sik sogo, Genam logo nebut kua pepen, yakot so Genam susuing, Genam go dabui-a, tebadali kekenok; nggeasui go, kabung duo tui sogo kalik Genam lo wak mea klung-silu, yakay-yakay so, Genam susu mea teguik. ¹⁵ Kumeduim ey meduim naklay ey, di kua goso, Genam lo mea lemoy, nggano, nemot go di naklay, yam so mea kuok-sing; Butuobu-butuobu naklay, nemot go bu Genam lo mea pang-sing nggano, bukon-bukon naklay mea pang. ¹⁶ Nemupung go sedue kabung-a, Genam lo mea uwawi nemotnang kua senong go tap lo, mea wawi, nggano, nemotnang mea wawi go koklong nemotnang kua senong go tap lo, mea wawi go klong. Kuklik goso, Genam lo mea lemoy, no, nemotnang nogo-a, kublong so mea nggano, nan kukuoy sogo, nemudi so mea nebuem. Nemotnang sono ngga-a, Genam lo mea pluok, Genam lo ngga mea lemoy seni. ¹⁷ Ta lo pung go duo dana-sana no keng go sedue kabung taton sono mea teguey, ngga ey suongsut so mea susuing, yangga duosana-sana ta lo semu go sono nemotnang lo pu go: "Mot-a atnang go ida gabe!" Israel kua senong go kua lemoy go. ¹⁸ Kama wik go sedue kabung, se tup-lak! Nemu pung go sedue kabung, nemu iti go ikum-a! ¹⁹ Genam go tamot eygo, nando go nemu mo pung dali, nggano, Genam lo mot-dak go sedue kalik go, nando-a kama wik go? Genam go tamot kalik so, nando-a nemu mo pung, nggano, Woy Wali Iram go tamot kalik kama mo wik go? ²⁰ Mata so, mot mo ikum. No, nemu kua uliuk go senong ne. Mot lo kama mo tui, no, yakua tup ne. ²¹ Nemot sik sogo susuoy genang sogo so, Woy Wali Iram lo mo iwat gabe. Nemot go senong blong eygo dega, nguok genang sogo so. ²² No, nemotnang ngga, sedue lo wom so kiking go saula tang, nggano, nemotnang go taut sedue lo gugluik go saula. Nemotnang naklay, geronggang-geronggang ba no sado no mo pui go, nggano, kikidik yap ba no mo son-sing. Nemotnang ngga, sedue go womking sip so mo lemoy. No, nemotnang taitak genang sogo kua. Womkiking go nogo, meno duo logo yakua pu ne: "Tandali ma ya!" ²³ Motnang sik sogo, nando-a tasam ngga sono kama ya tui. Ngga ey, nemu uluik gono, kama tup genang sogo, yansi go ku nogo nang sogo ya? ²⁴ Yakob go wom king genang sogo so, nando lo mo itak. Nggano, kikidik ba sono Israel degut genang sogo mo itak? Woy Wali Iram lo ngga kua lemoy? Yang, Nemot sono kuklue piam konkebamling imot lo mo semu, nggano, Nemot lo taling go tap no keng genang sogo, seduekabung moy so, nggano, Nemot lo nguok go nogo sedue kabung tup sogo moy so. ²⁵ Yang, Nemot go dabuipiam nemot sono Nemot lo mea glung-sing, nggano, ple kangok go ba lo mo pung. Ngga sik sogo, ngga sono nemot nabay genang sogo so, no, nemot meakua senong go duing. Nggano, nemot so koy logo kalik so pupuit go, no nemot tang go kua senong ne.