(Susuoy Iram Woy Wali Iram lo pu go mea weng) ¹ Nan-nan naklay, yakot so suing go, kama-a Genam sono se long! Don inim-a, saula-saula se iti! Nuey-a, dagu sono nemotnang weng gono, nebut se pen: ngge suey, kerlam so imot ip go, nebut ya pepen go. ² Se senong, woyklak sik so, nando lo ya mot-dak? Mot-dak go, masi gualing go nogo, don ey nemot mea susuing. Yansi go nogo sogo, Nemot go masi ba no saula-saula mea suing. Ngga no, nemot go masi ba no raja-raja mea suing. Sungkuim so, Nemot go tengang kaluang lo, nemotnang mea lemoy. Neguen lekuoy kalik so, Nemot go pleday lo, nemotnang mea lemoy. ³ Nggano, Nemot lo nemotnang truik go, suey so tap lo mea susuoy. Nemot lo masi maning kua gualing go sip no. ⁴ Kebali ngganemot naklay, nando lo ya semu? Banim sik so, Nemot lo uusi go, mlenawalasrang tip nase pung-sing. Genam ngge, Woy Wali Iram, banim seni sogo Nemot gabe. Nggano, nemotnang mesip sogo pung go nogo, Genam ngganemot gabe! ⁵ Yang, Nemot no nan-nan lo ikum go, nemotnang ey mea suali. Kukunan sedingno-sedingno, bubuong ey kiking. Dagu seni sono, nemotnang naklay gemang kekok-lak. ⁶ Meno duo lo, meno duo tebok gono, nemot go andua no gemang pen: ”Dabui don nase kok!” ⁷ Yang, besi so semu go sedue lo, emas so semu go sedue don mea iti, nggano, emas so sesemu go sedue lo nemot so nedik go sedue nogo mea pu, ngga nemot. Besi bata go blo no martelu lo nedik gono, nemot lo mea pu, “Ngga mo suey!” Ngga ey, paku glok-sing go, yakua ulue genang so mea got-sing. Israel ngga Woy Wali Iram go tamot ⁸ No, mot ay Genam go tamot Israel, Genam go dem Abraham lo tui go sik so, Genam lo kuoy go, ay Yakob. ⁹ Kukunan seding-seding sik sogo, mot-a Genam lo mo wawi gabe. Nggano, woyklak-woysut, sada-dun sik sogo, mot-a Genam lo gabe usi. Mot sono, Genam lo pu go: “Mot ngge At go tamot, yakua tenguo genang so, mot-a Genam lo mo kuoy.” ¹⁰ Suali kua tra, mot ey Genam gabe, dabui kua ulue, mot go Ki Wali Iram Genam ngge gabe, mot nogo don, Genam lo mea kok, mot nogo Genam lo mea tebok, Don ey mot suing genang, At go tasemla idi lo mot mea mlak. ¹¹ Seni so, mot so dabui piam go sedue kabung naklay, suongsut ey mea tra, nggano, nemotnang go sui mea waluk-sing. Mot sono sagui so semu go sedue kabung, kua go kalik so mea, nemotnang mea nega-sing. ¹² Mot ey sagui so pupung go sedue kabung, nemotnang-a mot lo mea truik. No, nemotnang eygo mot meakua tegu. Ple so mot ey pupung go sedue, nemotnang ulue sogo kalik, seni kua gemang. ¹³ Sini so, Woy Wali Iram, mot go Ki Wali Iram Genam ngge gabe, Mot go tasemla idi no gabe mlak. Nggano, mot no gabe pupu: “Suali kua tra, mot At lo mea tebok!” ¹⁴ Suali kua tra, ey Yakub sop nansu kalik go, ey Israel, tet kalik go dato. Mot, Genam lo tebok go, ngga kalik so Woy Wali Iram lo gemang pen. Mot so susuoy go ngga, Don Iram, Israel go Ki Wali Iram lo. ¹⁵ Seni so, dipap pengirik kalik Genam lo mot kalong eygo inim, nemot go kalong tala namon ey way-way sogo so mea, medium mot lo kuk go, mea kesuop-sing, nggano, medium-meduim naklay mot lo mea kesuop-sing. ¹⁶ Nemotnang mea pui, nggano, nebit lo nemotnang u go, mea pling-lak. Nebit kangok golo, nemotnang mea buim-sing. No, mot-a, Woy Wali Iram ba nogo tang so, yakay ey mea pling. Nggano, Teguop Iram, Israel go Ki Wali Iram ba nogo so. ¹⁷ Susa ba sogo sedue kabung, taut kua go sedue kabung, bu so maning uwet go, no, bu kua ikum go, nemotnang go nebleng bunuo so sang, no, nemotnang nogo, Genam ngge Woy Wali Iram lo mea wa. Sedue Israel go Ki Wali Iram Genam gabe, banom go nemotnang yakua itak. ¹⁸ Meduim lekuoy go blo lo, butuobu Genam lo mea semu, ngga blo lo bu mea sesay-sing. Ngga no kaseglok pay nogo, bu bising ey mea pipi-sing. Kaseglok pay bukon so Genam lo mea lemoy. Nan lekuoy go sik so bu mea kurlui klong. ¹⁹ Nenguen pay no di aras Genam lo mea kuali, di penada, di murad nggano, mlay di mea kuali, di sanobar, duen bata gono Genam lo mea pung-sing, nggano, di karangan, ey nali ey nemot mit lo mea pung-sing. ²⁰ Nggano, sedue kabung naklay ikum go, mea senong; Nemu so luik go lo mea duing: “Seni so, ngga naklay, Don Iram, Israel go Ki Wali Iram lo mo lemoy. Kudidemat nogo Woy Wali Iram ikle so ²¹ Woy Wali Iram lo pu go: “mot go perkara pen-a!” Nggano, nemot go alasan-alasan ey se pen dali, ngga Wali Iram, Yakob go Ki Wali Iram lo pen go. ²² Nuey-a, ip go atnang sono nemotnang se pen; sogo-a ya lemoy? banim no kungap pen go ngga, nemot go seni atnang no se pen, ngga, atnang ikum genang. Kua go sogo sogo yansi lemoy genang sogo, genamnang sono se pen! Nemot mo lemoy go, genamnang ikum sogo be! ²³ Sogo sogo yansi lemoy genang sogo, atnang no se pen! Genamnang senong sogo be, seni so, mot ngga demat seni sogo. Takebali plok-a, tasam suey go, tasam piam go-a, semu-a! Kerlam so atnang ikum go, tawasrang ey glok genang. ²⁴ Seni so lo mot ngge, kua go kalik so be, mot go takebali seni kua dali, mot so kuoy go sedue kabung ngga, kusuirlom ey tetra be. Ki Wali Iram ngga Ki Wali Kumam ²⁵ Dun idi sik so sedue klaya, Genam lo mot go gemang uweng. Woyklak idi sik so, nemot go sui no Genam lo usi go mo uweng gabe. Blang so semu go sedue lo, nan masi lo gugualing go kalik so. Ngga kalik so, pengusaha-pengusaha nemot lo, nan kalui kalik masi lo mea kenan-yon. ²⁶ Keduong sik sogo, kunala ngga, nando go lom ba sik so mo taling-ngam? Ngga tang sogo so, atnang mo senong, “Nemot seni so lo!” Seni so, kunala ngga so taling go sedue kua, nggano, deguo ngga so pen go sedue kua dali, mot go nebut so tup go sedue klayanang go kua lo. ²⁷ v 27 Keduong seni sogo, Sion sono Genam lo gabe pepen, nggano, deguo teguop pepen genang ngga, Yersalem sono gabe itak. ²⁸ Genam lo ikum go, sedue klaya duonang go kua, nemotnang sik sogo tap naklay kua senong. Nggano, nemotnang no Genam lo usi go, klay duo nang go logo yakua wa. ²⁹ Sini so, nemotnang ngga kua go kalik. Nemotnang go takebali ulue seguong so, nemotnang go duosana-sana semu go ngga, nebit kalik seni kua.