(Susuoy genang deguo teguop) ¹ Mlapui-a, Genam go blung mlapui-a! Mot go Ki Wali Iram lo ngga kalik mo pu: ² dabuikoy dia se susuing mot Yerusalem, nggano, nemot sono don ey mot se usi, yang, koybutasemu ku yam so mo yam. Yang, nemot go kuklue suep go ngga sono mo kay. Seni so, nemot nogo idekeba, Woy Wali Iram go ta sik so mo iti, nemot go kuklue piamkonkebamling tang sogo namon da so idekeba mo iti. ³ No, nebut-a ngge kalik uusi go gemang: "Woy Wali Iram nogo tap, kaseglok pay nogo dali se kebuo, duen ku nogo tap nemudi so se nebuem, imot go Ki Wali Iram nogo kimtap dali se kebuo! ⁴ Nan way-way go suk go, se puem, nggano, nemot go meduim-meduim se tram-sing; Nan metuik-metuik eygo naklay, se tram-sing, nggano, nan kukuoy sogo nemudi so se semu! ⁵ Yang, Woy Wali Iram go blong mea taling. Nggano, kukunan sogo sedue kabung naklay kerlam so mea ikum. Seni so, Woy Wali Iram tang golo, ngga mo pu gabe." ⁶ Nebut kluim lo pepen go: "Mot se usi!" Genam lo wa go: "Sogo kalik go nebut-a, genam logo ya usi?" "Sedue kabung naklay ngge, nenguen kalik so be, nggano, nemot go blong naklay ngga, duen nogo diun kalik so. ⁷ Nenguen mea lekuoy, diun mea kuok, nagono Woy Wali Iram lo Nemot go nebuemnebit so lek go. Seni so wa, saula tang ngga neguen kalik so. ⁸ Nenguen mea lekuoy, diun mea kuok, no imot go Ki Wali Iram go nebut-a senang so mea gigit." ⁹ Hai Sion, deguo teguop so iti go koklong go, meduim kalong blo dega sogo no se klak! Hai Yerusalem, deguo teguop so iti go koklong go, mot go nebut don ey kangok so se uusi, mot go nebut don ey kangok so se uusi, suali kua tra! Yehuda go yakena-yakena nogo se pen-sing: "Ikum-a, ngga mot go Ki Wali Iram gemang!" ¹⁰ Ikum-a, Woy Wali Iram, Ki Wali Iram ngga, Nemot don ey uweng go, don dega ey uweng go, ngga ey, Nemot go ta don eygo lo, Nemot lo tameamlak-yon. Ikum-a, nemotnang Nemot go seguot, kerlam-kerlam so Nemot ey ey gemang lemoy, nggano, nemotnang eygo Nemot go suongku lo koklong genang sogo, Nemot lo mea iwat. ¹¹ Menany yay so susuing go kalik, Nemot go menay Nemot lo wawi koklong nggano, Nemot go ta lo nemotnang gemang yaluim; Nemot go kebum blo no domba nok titiat nik go uwawi, kunala temoy no, domba unennang Nemot lo wawi go gemang koklong. Kudidemat naklay blo sogo Ki Wali Iram-a gabe ¹² Biap bu nemot go ta ba nogo nando lo mo idok nggano, nemot go taglang lo ut mo yam mo tui, sungkuim nemot lo mo iyi-sing, dacing lo meduim-meduim mo timbang, kuago, kumeduim neraca no king go mo iyi? ¹³ Nando lo, Woy Wali Waglo ya atur, kuago, Nemot nogo nebut mangking sogo ya suing? ¹⁴ Nando sono, mangking mo wadong Woy Wali Iram senong iti genang sogo so, nggano, Woy Wali Iram nemudi so taling genang sogo nando lo ya nguok, kuago, Nemot nogo senong nando lo ya nguok nggano, Nemot nogo tap taling go, kunala temoy no Nemot lo pupluok genang sogo? ¹⁵ Se senong, saula-saula ngga daysruk ba sogo bu ingan kalik go nggano, neraca temoy nogo sung kalik ide kua. Seni so, nan-nan go ide, sungkuim go ide blo so kua. ¹⁶ Nggano, nan Libanon go di, koy puit genang sogo kua nemot, ngga ey, nan ngga sogo menay, korbannang sogo kua nemot dali. ¹⁷ Nemot go suong ku nogo, saula-saula kua go kalik, Nemot lo duing go, nemotnang ngga, seni kua, seney ulue-a. ¹⁸ Motnang logo nando ey, Ki Wali Iram ya kerlam, nggano, motnang logo sogo eygo-a, Nemot ngga ya kerlam? ¹⁹ Duo sana-sana so sesemu go tukang ey ya kerlam, nggano, emas so sesemu golo, emas lo sebut go, rantai-rantai perak nemot nogo so semu go. ²⁰ Arca so klik go sedue eygo, keda so yakua buin go di kuoy go, naklay dega go tukang-a uwet go, don dega ey duosana-sana king genang sogo tukang mea wet. ²¹ No, motnang kua senong? Motnang maning kua tup?Takuduen sik sogo, motnang nogo kua pen?Kukunan kutrui tui go ngga, motnang maning kua senong? ²² Kukunan muong go blo no, Nemot gemang susuing, ngga sogo seduekabung miam dega ey medop kalik; Nemot logo so, ut ngge kain kalik gabe glung, nggano, yap susuing genang kalik so ut gabe klik! ²³ Kukunan blo wengkabui-wengkabui kua goso, Nemot lo mea lemoy. Nggano, kukunan blo sogo hakim-hakim, Nemot lo seni kua go so mea lemoy! ²⁴ Ngga ngge kalik so: demening nemotnang lo kuali go, demening nemotnang bluim go, demening ibot go glok go, nemotnang ngga, nan ba sono srang maning kua king, nemotnang ngga sono, lom nebit Nemot lo mo u gemang, e… mea lekuoy-sing. Nggano, udongdop lekuoy kalik so, nebit lo mo pling go klong. ²⁵ Nando ey, motnang logo Genam ya kerlam? Genam nemot kalik sogo ya iyi? Ngga, Kon kua go Teguop Iram lo pen go nebut. ²⁶ Ut sono, mot go nemu-a se yalap! Nggano, se ikum: Uttop ngga naklay. nando lo mo semu? Nggano, pu go nemotnang go tala naklay, plesedue kalik pluep go, nemotnang go sui no usi gono, gemang pupluep-lak, klayanang go kua pung go kua go? Yang, seni so, Nemot go don, don dega eygo nogo. ²⁷ Sogo tang so, mot ngga kalik so pu go, hai Yakub, nggano, ngge kalik so pu go, hai Israel: "Woy Wali Iram sik sogo genam go wali ngga ba sono mo kok, nggano, at go Ki Wali Iram logo, genam go hak kua ikum ne?" ²⁸ Mot kua senong, nggano mot kua tup? Woy Wali Iram ngga Ki Wali Iram, Senang Kiki Iram, kukunan seding sik so seding nogo so semu go; Nemot don yakua wakot, nggano, saysuk yakua lasu, Nemot go senong, senong genang sogo meakua. ²⁹ Saysuk lasu go nogo don, Nemot lo gemang iiti, nggano, mo wakot go nogo don yakay ey, Nemot lo gemang iiti. ³⁰ Sedue nguot don kua go, nggano mo lasu go, nggano, duonguot masi dak go gemang pui go. ³¹ No, Woy Wali Iram so bubung go sedue kabung-a don inim mea iti: nemotnang ngga, kaley pling go klak go kalik so don dega eygo tabang lo; Nemotnang mea kukuek, no, yakua wakot, nemotnang koklong go, nggano, meakua lasu.