( Hizkia ey Babel sik so mot-ak go sedue ey) ¹ Ngga ku nogo ngga, Merodakh-Baladan go danon Baladan, raja Babel lo mot-dak go sedue, sam so iti go klong go. Nggano, Hizkia no taiti iti go. Seni so mo tup Hizkia sadui sogo nebut banim so, no, tandali don mo kok. ² Nemotnang weng go sogo so, Hizkia yakay. Nggano, nemotnang sono nemot go taut so ta go yap, gemang taling-nawon. Emas nggano perak, rempah-rempah, nggano mlay eygo, ple so ta go yap naklay. Nggano, naklay nemot go taut naklay so teta go yap gemang taling-sing. Nemotnang no, kua taling go taut klayanang go kua. Hizkia lo nemotnang sono, istana sogo taut, nggano nemot lo ta mlak go nan naklay sik sogo, kua taling go kua. ³ Ngga ey, nabi Yesaya gemang weng raja Hizkia sono. Nggano, nemot no gemang usi: "Sedue-sedue ngge lo sogo kalik so mo pen? Nggano, nago sik so nemotnang mo weng? Hizkia lo wa go: "Nemotnang nan ket sogo sik so weng go, yangga Babel sik sogo!" ⁴ Ngga ey, gemang usi dali: "Mot go istana nogo, nemotnang logo sogo-a mo ikum ne? Hizkia lo wa go: "Istana ba sogo naklay nemotnang mo ikum. Kua gigit nemotnang nogo, genam lo kua taling go taut kua, naklay nemotnang mo ikum." ⁵ Ngga ey, Yesaya lo Hizkia no pu go: "Se tup! Woy Wali Iram, Ki Wali Kumam go nebut: ⁶ Seni so, ku mea pung-ayun, sogo-sogo taut mot go istana ba sogo naklay, nggano, mot go babu asi logo taut e... nggeasui gono pung go mea king go klong Babel sono kua. Yakua gigit taut ta go itak genang sogo, Woy Wali Iram go nebut ngge kalik so gabe. ⁷ Nggano, mot go duo sik sogo lo ngga mot mea iti lo, mea istana raja Babel no sida-sida so lemoy genang sogo." ⁸ Hizkia lo wa go Yesaya sono: "Yang, Woy Wali Iram go nebut ngga mot lo pen-to go ngga suey!" No, nemot lo duing go: "No, dabui yakay ey wali ba no genam susuing genang-a se!" NAMON TETE SOGO WALI SUSUOY SAULA MENO GO NAN NO TEGA GO NOGO