(Hizkia sadui srek go) ¹ Kuku ngganemot nogo, sadui kangok Hizkia srek go, kebong yam no se pupung. Amos go danon, nabi Yesaya weng go, nemot ey tugu gono, ngge kalik gemang pu, ngge kalik so Woy Wali Iram lo pu go: “Yam so, yaptenglam ba nogo nebut pu gono, mot mea kebong, sadui yakua suey!” ² Ngganemot no, ding ba sono Hizkia nemu iwot gono, Woy Wali Iram sono dewi so gemang pu. ³ Nemot lo pu go: “Nggeasui go, Woy Wali Iram se duing! Sogo kalik so, Mot ba no genam mo wali. Seni so, dabui lo Mot go nemuku no, genam kengduduk so takebali suey go-a dabui lo mo semu-sanyu." Nggano, Hizkia lo u babu so gemang kluo-nawon. ⁴ Ngganomot no, Yesaya sono Woy Wali Iram lo gemang pu: ⁵ “Klong-a, Hizkia no se pen! Nggekalik so, Woy Wali Iram, mot go aybabu Daud lo keng go Ki Wali Iram lo pu go: “Mot go dewi pu go, Genam mo tup, nggano, mot go unebu Genam mo ikum. Seni so, mot go wali yagui 15 yam so Genam lo mea tebok. ⁶ Nggano, kota ngge, raja Asyur go ta sik sogo, Genam lo mea plet-dak. Ngga ey yakena tema, Genam lo mea klik dali.” ⁷ Ngge-a, taling genang tasam so mot nogo be, Woy Wali Iram sik so mea lemoy. Seni so, Woy Wali Iram lo tegadi so dok go, Nemot lo mea lemoy seni. ⁸ Seni so, woy masi lap Ahas taling go ngga, taton sono kui lo-kui lo masi dabui tanamon yam so tandali Genam lo mea gualing, mo gualing go klong go ngga.” Nggano, woy temoy nogo ngga, taton sono mea lek dali, tanamon dali so mea lek. ⁹ Sadui ba sik so suey gono, Yehuda go raja Hizkia, lo klik go nebut ngge kalik gabe: ¹⁰ Genam lo pu go: Genam go wali nesip yam no se, genam klong genang sogo so, sikebong yakena yaptaput no, genam so gemang usi, genam go wali temu itak go sogo so. ¹¹ Genam lo pu go: ya, tandali go Woy Wali Iram genam yakua ikum. Wali sedue kabung go yakna nogo, sedue kabung klayanang go ya kua ikum ba, kukunan blo sogo sedue kabung sik sogo. ¹² Genam go yap, genam lo susuing go plet go, ya togut ba. Menay yay sogo bala kalik so ya; Wali dan ining go sik sogo, genam go nebuem nebit, Woy Wali Iram lo ya tong, ku blong go sik so e… kuklik gono pung go, ngga kalik so genam itak go. ¹³ Wak so genam lo kuklung go, e… wadikua gono pung, duenuduo kalik so, genam go don, ngga kalik so, Woy Wali Iram lo gemang kusuop-sing. Kublong go sik so, e… wadi go, genam ngga kalik so Mot lo mo itak. ¹⁴ Uduobay kalik so kayang-a genam kiklik, nggano, wiyagui kalik so nebut-a ngungut-klong. Blo sono, genam go nemu tui go bubung, ya, Woy Wali Iram genam nogo ide eygo iseng mo lemoy go, genam nogo jaminan so Mot-a se lemoy sang! ¹⁵ Sogo-a Woy Wali Iram nogo at logo ya pen. Ngga naklay Nemot lo mo lemoy, usene srek, genam yakua, genam go dabui iseng eygo tang so, ¹⁶ O, Woy Wali Iram! Ngge tang sogo so, genam go dabui, Mot sono iti go gabe bubung, genam go waglo, se susuot-sing, genam go sadui, se pali-sing, genam go sadui, se suey sang! ¹⁷ Seni so, bete eygo sadui srek go tang so, genam nogo, gabe susuoy-sing! Kebong go mu sik sogo, Mot lo genam gabe lek. Seni so, genam go piam konkebamling Mot go suongku sik sogo Mot lo mo betep. ¹⁸ Yang, Mot nogo taiti suey, sikebong sip logo, ya kua pu, nggano, Mot nogo usam kekebong logo yakua kluo, simu ba sono uneng sogo yakua bubung, Mot go waysagi ey mlak go sogo. ¹⁹ No, wali sogo sedue-a mea pu, nemot logo-a taitisuey Mot nogo mea pu, ngeasui go genam logo kalik so, Mot go waysagi ey mlak go sogo, aya meno lo, nemot go danonnang nogo gabe pepen. ²⁰ Seni so, Woy Wali Iram lo weng go, genam mo susuoy! Kecapi-a, atnang lo mea tengong-elu, wali naklay ngge, Woy Wali Yap ba so atnang mea susuing! ²¹ Nggano, Yesaya lo pu go: “Ngge suey, diarah don sik so semu go kue iti go, nggano, kuo ngga blo no se tui! Kuo ngga, mea kuet!” ²² Ngga maning kua gono, Hizkia lo mo pen, “Sogo tasam-a ya taling? Yang, seni so, Woy Wali Yap ba nogo genam mea koklong!”