Pasal 37

(Woy Wali Iram sono Hizkia lo don wadong go) 1 Nebut wayang ngga, raja Hizkia tup-nawon gono, nemot go amka saysuk nogo ta lo tegek gono, genuing amka-a way so kok gono, Woy Wali yap ba sono gemang degut-nawon. 2 Ngga ey, Elyakim istana wengkabui, Sebna negara go sam so kiklik go, nggano, imam-imam sik sogo sedue seni-sedue seni. Genuing amka ey kok go pu go, nemotnang naklay gemang klong, Amos go danon nabi Yesaya mit sono. 3 Ngge kalik so, nabi Yesaya no nemotnang lo gemang pu: “Ngge kalik so Hizkia lo pu go, ‘Nggeasui go ku ngge diding ba logo ku se, idekeba ey neneboy eygo ku; duo tui genang sogo ku mo pung gabe. No, duo ngga tui genang sogo don yam so mo kua. 4 Woy Wali Iram, mot go Ki Wali Iram, bu so iti go wengkabui lo wayang go nebut ngga mo tup? Raja Asyur lo mot-dak go, bu so iti go wengkabui lo Ki Wali Iram wayang go. Ngga tang so, Woy Wali Iram, mot go Ki Wali Iram lo idekeba iti so gemang, sedue ngga go nebut wayang mo tup go tang so. Ngga tang sogo so, dewi pu go, blung temu maning gabe go sogo!” 5 Kebali sedue raja Hizkia lo mot-dak go Yesaya mit no pung go. 6 Ngga ey, nemotnang sono Yesaya lo pu go: “Motnang go tuam no, ngge kalik so, se pen-klenalo: “Woy Wali Iram go nebut ngge kalik so gabe: ‘Mot suali kua tra! Genam sono raja Asyur go koybutasemu lo wayang go. 7 Ngga. seni so, Genam lo pu go klong go, nali-wabu meno-a, sedue ngga ba nogo mea degut. Nggano, deguo meno nemot tup gono nemot go nan sono mea klong; Nggano, tengang lo nemot uluk go mae kebong. Ngga kalik Genam lo mea semu. 8 Bu so wasey go wengkabui ngganemot, nemot go nan sono koklong go nogo, raja Asyur ey Libna ey ple so pupung. Deguo ngge nemot tup go, ‘Lakhis sik sogo raja ip go mo koklong gemang!’ 9 Ngga ba nogo raja mo tup, Tirtha raja Etiopia sogo nebut ngga kalik go: “nemot pung go mo koklong, mot ey ple tui sogo so!” Ngga tup go nogo, sedue mot-dak go ngga pu go, Hizkia sono klong go gemang pen: 10 “Raja Yehuda Hizkia nogo, ngge kalik so, se pen-kenalo, ‘Mot lo keng go, mot go Ki Wali Iram lo wamoy so mot nogo kua mlue, mot no tegadi dok go ngga: ‘Yerusalem Asyur go ta ba sono go yakua itak?” 11 Seni so, mot ngge mo tup, nan ngge naklay no raja-raja Asyur lo semu go tasam. Yangga, naklay nemotnang lo mo kesuop-sing, ngga, mot mo senong! Sogo kalik so, mot ngge-a ya itak ne? 12 Kudidemat, genam go babuasi lo mo kesuop-sing go logo, sogo kalik so nemotnang ta mo itak ne. Yangga, Gzan, Haran, Rezef, nggano, Telesar sogo saula Eden. 13 Raja Hamat, raja Arpad, yakena Sefarwaim go raja, nan Hena raja, nggano Iwa, nago so ne?” (Hizkia sam ikum-nawon go) 14 Sedue-sedue mot-dak go ta sik so, Hizkia no sam ngga gemang iti. Nggano, sam ngga ikum-nawon gono, Woy Wali Yap ba no nemot-nawon go degut. Woy Wali Iram go suongku no sam ngga truk gono: 15 Woy Wali Iram go suongku no dewi Hizkia lo gemang pu-biwon: 16 “Woy Wali Iram, Israel go Ki Wali Iram! Kiwalitamot blong dega eygo blo so mot got-tebato go! Kukunan sogo deguena-deguena nogo, Ki Wali Iram dega Mot seguong-a klaya gabe. Utso-nanso semu go Ki Wali Kumam, Mot seguong-a klaya got-togoy. 17 Ya, Woy Wali Iram sang! Mot go kama-a, se long-kundo sang. Ngga ey, genam nogo se tup-kundo sang. O, Woy Wali Iram, Mot go namu pli-a sang, nggano se ikum-kundo! Ngge, Sanherib go nebut naklay se tup-kundo, Ki Wali Iram, senang Wali Iram so wayang go sam ngge, nemot lo iti go gabe. 18 Yang seni so, Woy Wali Iram, nemotnang go nan ngge temu raja-raja Asyur lo mo kesuop-sing. 19 Ngganemot no, nemotnang go kudidemat koy no naklay mo puit-dak. Nemotnang ngga, Ki Wali Iram kua. Ngga, di, demu, ta lo semu go seguong, nggatang sogo so, sedue lo mo kusuop-sing. 20 Nemot go ta sik sogo, genamnang se susuoy-sing sang! O, Woy Wali Iram, atnang go Ki Wali Iram. Ngga tang so, kukunan blo sogo klajaan-klajaan naklay senong genang; Seni so, Mot seguong-a klaya, Woy Wali Iram gabe!” 21 Ngganemot no, Amos danon nabi Yesaya lo sedue mot-dak go, Hikia no klong go gemang pen: 22 Israel go Ki Wali Iram, Woy Wali Iram go nebut, ngge kalik gabe: “Genam sono, dewi mot lo pu go Sanherib, Asyur go raja ngga, ngge kalik Woy Wali Iram lo gabe pu: Sion kaguit lo mot mo wayang esang, nggano, nebut wayang eygo-a mot sogo Yerusalem kanguit lo mo pen,

ngga ey, mot go taton no wengkabui ngonglok ey nemotnang mo koklong.
23 Nando nogo so, mot lo paysing go, ne wayang? Nando nogo so, mot lo ngga kalik don ey mo bega? Nggano, dabui blo sono iti go nemot nemu mo iyalap-klong? Genam ngge, Teguop Iram, Israel go Ki Wali Iram gabe! 24 Seni so, Woy Dem so mot go tamot-tamot lo mo paysing. Nggano, mot lo pu go: “Genam go kereta mata sogo lo, genam sip blo sogo, kumeduim no klak go mea suing, sip blo dega sogo, yangga nan Libanon no. Ngga sogo, di kangok-kangok go me tuo-sing, di sanobar teguop kuoy go. Sip blo dega sogo genam mo degut, naklay kuit dega no mo palom, duen babu go, nemot go di mata sogo sip ba sono. 25 Genam nogo bu mo pung gabe, bu ngga-a genam mo drop. Mot kua senong? Genam go masidabui lo bu lekuoy go; Mesir Nil butuo naklay bu yam so pang go. 26 Mot tang go mo tup, banim sik so Genam lo mo pu-ngu, nggano, takuduen sik so atuia ngga Genam lo mo semu gemang! Nggeasui go, ngganemot gabe lelemoy-klong. Yang, yakena kangok-kangok go don eygo ngga, kluim kua goso mot lo demu-a suk go mea gigit. 27 No, ngga sogo sedue kabung-a, don yam so mo wakot, saduibong ey pling go, suongsut ey gemang tra. Nemotnang, duen sogo neguen kalik, nggano, nenguen kiki kalik, yabla blo no pung go nenguen kalik, sagot maning kua seni gono, woy sagon-sagon lo genueng go kalik so. 28 Yang, mot wisi so ip go, ku no suing go, yap sik so pung go, yap no degut go naklay, Genam mo senong. Nago no, Genam sono sagui mot lo semu go, nggano, mot go dabui blo sono iti go nebut. 29 Genam sono, sagui mot lo semu go tang sogo so, nggano, mot go dabui blo sono iti go nebut ngga klak go, Genam go kama no mo pung gabe. Genam go demu don dato-a, mot go nebuem ku no, Genam lo mea tui, nggano, mot go lomsuk nogo tegan Genam lo mea kok. Nggano, Genam lo mot itak go, tap lo tandali mea klong. Nago sik so mot mo weng go, ngga sono itak go mot mea klong. (Woy Wali Iram go duduing Hizkia nogo) 30 Hizkia, mot nogo taling genang so, ngge-a mea lemoy: “Yagui ngge ba nogo, sedue kabung lo dam genang sogo, nemotnang tang sogo kua kuali go, ten-a mea dam. Nggano, yagui namon tete sogo nogo, motnang lo dam genang sogo, motnang lo keduong so kuali go sik sogo-a, iti go mea dam. No, yagui nangglik tete sogo ba nogo, motnang usu se kuali wasma se iti, anggul usu se klik, nggano, buo go nase dam! 31 No, tang Yehuda sik sogo sedue kabung temu susuoy go ngga, nemotnang maning gemang go, dinang kalik so, nan ba sono srang naklay mea kiking, nggano, way so blo sono seni-a tagot go mea but-sing. 32 Yang, sedue kabung maning susuing go, Yerusalem sik so mea pung. Nggano, medium Sion sik so, mo susuoy go sedue kabung mea pluep-sing. Ngga, Woy Wali Iram, Ki Wali Kumam lo Nemot go kunala nele go tang so mea pluok.” 33 Ngganemot sogo so, raja Asyur sogo ngge kalik so, Woy Wali Iram go nebut gabe pung: “Kota ngge ba nogo, nemot yakua degut, ngga sono go nemot go ple ya kua tuk. Nggano, ngga sono go, nemot go taming eygo yakua iti go klong. Nggano, tema klik go wok teguot genang sogo nan, nemot logo yakua suk. 34 Nago tap sik so nemot mo weng go, tap ngganemot dali lo nemot tandali mea klong. No, yakena ngge nogo, nemot yakua degut! Ngge kalik so, Woy Wali Iram lo gabe pen. 35 Nggano, yakena ngge go tema Genam lo mea klik. Genam tang sogo so, nggano, Genam go tamot Daud tang sogo so, nemot susuoy genang!” 36 Ngga blo idi lo, sedue 185.000 yam so, Asyur bala ba no, Woy Wali Iram go kiwalitamot lo klong go gemang uluk-sing. Ngga utep wadikua ikum go, sedue naklay temoy seguong-a gemang ikum! 37 Nggatang so, Sanherib, Asyur go raja, Niniwe sono gemang ip-nawon. 38 Ku meno so, kudidemat ta so kong go sip Nisrokh no Sanherib susu ku sono kenuong gono, Adramelek ey Sarezer ey, danonnamon lo tengang lo gemang uluk. Ngga ey nan Ararat sono nemotnamon gemang kap. No, danon meno Esarhadon lo nglangin way so raja sogo gemang suing.