¹ Ikum-a Woy Dem, Ki Wali Kumam gabe, yang Yerusalem ey Yehuda eygo sik sogo tendam budrop dali-dali nemotgo-nemotgo ta-sing go ngga, nemotnang sik sogo mea iti: ² plesedue wengkabui ey plesedue ey sedue woy ey tamot ey, blue sedue ey sedueseni ey, ³ plewengkabui nggano tengang eygo sedue, nebutmangking sedue nggano blue sedue, nggano blue kangok go sedue. ⁴ Nemotnang go wengkabuinang so duoneguot-a Genam lo mea taling, nggano denok-tiat lo nemotnang tameamlak. ⁵ Yang, sedue tang ngganemot way-way so mea nedik, duomeno lo duomeno mea nedik. Unen nglangin sono plesagui denok lo mea semu. Sedue seguay golo, ta ey kokong go sedue sono kangok gono sagui mea semu. ⁶ Sedue meno lo nglangin go yap no nemot go ntaton mlak go, nggano pu go: "Mot go amka kangok go maning gemang go, atnang go wengkabui so mot se lemoy! Ngga ey mot go tabano ngge gabe kesuop," ⁷ ntaton lo ku ngganemot no mea tenguo: "Sadui susuey go sedue so genam lemoy genang moy so. Genam go yap ba sogo, amka kangok go ey ten eygo kua. Saula tang tamlak genan wengkabui sogo, genam kua taling." ⁸ Yang, Yerusalem mo pui nggano Yehuda mo truik. Seni so, nemotnang go nebut nggano nemotnang go takebali lo, Woy Wali Iram sono mo wayang nggano, Nemot go suongku no sagui mo semu. ⁹ Nemotnang go nebuemnemu bu sik so, nemotnang go takebali mo ikum. Nggano, seduekabung Sodom kalik, dia-dia lo nemotnang go kuklue konkebamling gemang pepen, maykok sogo kua. Ngga kalik go sedue kabung ngga, nemotnang seglaplu! Kudalu-a, nemotnang lo nemotnang go saysuk sono mo weng. ¹⁰ Seni so, seni eygo sedue-a, yakay ey gemang. Nemotnang go kebali seni-a nemotnang lo mea dam. ¹¹ Sedue piam go tang, motnang seglaplu! Kudalu-a nemotnang no mea pui. Seni so, nemotnang go takebali tang so, nemotnang nogo kudalu mea pung. ¹² O, Genam go blung! Denok-tiat lo motnang tameamlak. Nggano, nemotnang nogo wengkabui so kabung lo tameamlak. Ai, At go blung! Tap kua golo wengkabui-wengkabui uwawi go. Nggano, tap motnang lo koklong go nemotnang lo ne uwaluk! ¹³ Yang, neyboy genang sip mo iti, nggano, saula-saula Woy Wali Iram lo neyboy genang so mo ip. ¹⁴ Sedue-sedue nogo wengkabui so Woy Wali Iram lo mo lemoy. Nggano, deguena-deguena lo Nemot go blung nogo: "Anggul usu ngga nemotnang lo gemang waluk-sing. Donkua go sedue kabung sik so motnang lo lek go taut lo motnang go yap ba mo tram. ¹⁵ Sogo so, Genam go blung nogo iseng tetaling nggano seduekabung seguay go iseng ne tetaling? Ki Wali Iram go nebut ngge kalik so gabe Ki Wali Iram Ki Wali Kumam. ¹⁶ Woy Wali Iram pu go: Dabui-a blo sono Sion kabung lo iti go tang so, ngga ey blindon-a blo sono iti go, nemu momot ey koklong, masi ta lo semu go-a gualingklong, nggano masi temoy nogo srem kluim ey. ¹⁷ Ngga tang so, Sion kabung go wengkabui igon Woy Dem mea pung-sing. Ngga ey, nemotnang go suongdon nogo betodop, Woy Wali Iram lo mea ndok. ¹⁸ Ku ngganemot no, nemotnang go srem teguop go naklay Woy Dem lo mea tega-sing, yangga, iwontuk masi nogo, srem wengkabui nogo, nggano banu-banu so klik go srem; ¹⁹ srem kama nogo, iwontu ta nogo, betokut; ²⁰ srem-srem wengkabui nogo, lante iwontuk masi nogo, kuibey, kinemon so ta go sip, nggano blue so ta go sip nogo; ²¹ matrey kenok genang iwontuk, ngano srem nebuemput no glung go; ²² walop amka, amka kangok-kangok go, blindon no popok go amka, ngano sabui keba; ²³ nebuemnemu so ikum go bulap, amka kangok go ba no kokok go amka lenan, wengkabui no dodok go ngano dia idi lo kokok go amka. ²⁴ Yang kinemon eygo didop wayso pegop nemon-a mea pung, kuibey-a tegan sruip lo way so mea dok, betodop net go amka nengkoy eygo-a wayso mea, walopnang amka wayso genuing amka-a mea kok. Nggano koy logo kuopuit-a waso mea pung-sing. ²⁵ Sedue kabung tengan lo but go mea kebong, nggano, motgo don eygo sedue, ple ba no mea leguot. ²⁶ Sion go yakena yataput no nebut rli mea pepen, nggano, genuing-a mea suing, nggano yakena ngga, sedue kua go sip kalik so mea.