¹ Ngge, Yerusalem ey Yehuda ey go sogo so Ki Wali Iram go nebut, Amos go danon Yesaya no taling go. ² Ku yam sogo no lemoy genang: Woy Wali Iram go meduim Nemot lo Susuing go sip, kumeduim don blo no ip go mea gigit nggano meduim kalong blo so mea gigit; saula-saula daley ngga seguong sono mea koklong-lak, ³ nggano seduekabung mata so koklong golo mea pu: "Weng-a, Woy Wali Iram go meduim sono imot ya klak go, Yakob go Ki Wali Iran go yap sono, Nemot go tap-tap nakaly imot nogo Nemot lo nguok genang, nggano tap ngganemot lo imot koklong genang; seni so, Sion sik so wali demutrui mea pung, nggano Yerusalem sik so Woy Wali Iram go Nebut mea pung." ⁴ Saula-saula neyboy g wengkabui so Nemot lo mea lemoy nggano saula-saula Nemot lo tapla so mea suing; nemotnang go tengang ple wayso usuwali so mea semu-sing ngga ey neguen trok genang tengang so nemot go suon mea semu; saula meno lo saula meno nogo ple yakua iti, nggano ple pupung genang sogo nemotnang yakua nguok. ⁵ Weng-a! Yakob lo tui go tang, Woy Wali go blong ba lo imot ya koklong go! ⁶ Yang, Mot go blung Yakob lo tui go tang, Mot lo mo itak, yang, seni so nemotnang woyklak sik sogo kunala-kunala lo kuaseni golo degut nggano sedue Plistin kalik blue-a kiklik go, nggano amle denok ey nemotnang tamokeduik. ⁷ Nemotnang go nan sogo demusamon ey perek eygo mata dega so, taut miam dega ey; nggano, nemotnang go nan kuda mata dega so, nggno nemotnang go dikebleng kuda lo lelek go miam dega seni so. ⁸ Nemotnang go nan nogo demat lo mo tram-sing; nemotnang go ta lo semu go ida no nemotnang susubu gemang wit. Yangga, nemotnang go talo semu go no ta ne kokong. ⁹ Yang sedue kabung ku sono unuik go nemotgo-nemot go ku sono mea kenuong — nemotnang esang go kua wawi! ¹⁰ Demu meduing teble ba no degut-a! Nggano nan mu ba no se son Woy Wali Iram go blong don dega go sik sogo nggano Nemot go blong don dega sik sogo! ¹¹ Dabui blo no iti go sedue kabung, ku sono mea tenget-sing, ngga ey dabui tategue go sedue ku sono mea kenok; nggano ku ngganemt nogo, Woy Wali Iram seguong-a blo dega so mea iti. ¹² Yang, Woy Wali Irang, Ki Wali Kumam lo ku klaya mo kuoy dabui tategue go seduekabung nogo idekeba iti genang ku nggano dabui blo no iti go sedue nogo ide keba iti genang sogo ku, ku sono kenok genang sogo so; ¹³ nan Libanon sogo di walong go blo dega sogo ide keba iti genang nggano kong so kong ge gigit go, nggano Basan sogo di tarbabtin nogo ide keba iti genang; ¹⁴ meduim kangok-kangok go naklay nogo idekeba iti genang nggano meduim blo sono gigit go ngga nogo idekeba mea iti; ¹⁵ plewoy yap blo dega sogo naklay nogo idekeba iti genang nggano yakena demutema don eygo idekeba mea iti; ¹⁶ Tarsis sik sogo bayi kangk go ide keba mea iti nggano takebali teguop go naklay nogo. ¹⁷ Seduekabung dabui ta tetegue go, ku sono mea unuik-sing nggano dabui blo sono iti go sedue mea unuik-sing; ku ngganemt nogo Woy Wali Iram seguong-a blo dega sono mea iti. ¹⁸ Yang di-demu-demat naklay mea suep-sing. ¹⁹ Yang seduekabung demuput ba lo mea degut-lak nggano Woy Wali Iram go blongdon tang so nanput balo nemotnang mea degut nggano Nemot go srem blong ey go sik sogo, ku nemot buong go kukunan ulue so ip go nogo. ²⁰ Ku ngganemot nogo perek sik sogo taut susubusowitgo nggano emas sik sogo taut seduekabung susubusowitgo usum ey yow eygo sono ikak go mea tega-sing, ²¹ nggano nemot meduim teble-teble ba no mea kok nggano demu meduim go teble-teble ba no mea degut Woy Wali Iram go tadon eygo sik sogo nggano Nemot go srem blong ey go sik sogo, ku nemot buong go kukunan ulue so ip go nogo. ²² Seduekabung no masi motgo se itak, seni so nemot go nebuemnebit nebuem ba lo pupung go, nggano sogo tang so nemot nogo ya mlak?