¹ Yehuda ey Yerusalem eygo Uzia lo tamlak go nogo, deguena-deguena Yehuda tasomlak go, Yotam, Ahas nggano Hizkia. Ku ngganemot no, Amos go danon Yesaya lo ikum go gemang pu, ² Ut mot se tup, nggano, kukunan mot se ikum, Woy Wali Iram lo pen go: "Duo-yap Genam lo babu go, nggano, Genam lo min kok go denok. No, sagui-a Genam sono, nemotnang lo ne sesemu. ³ Yang, sapi mo senong nemot so popong go, kledai mo senong nemot go tendam sip nemot so pong go lo kong go. No, Genam go blung Israel ngga kalik so kua." ⁴ Ey, kuklue lo tram go saulakuon, tabat lo tram go blung, taibat-a pupluok go tang, piam so puluok go duo-yap! Woy Wali Iram nemotnang lo mo itak, teguop go kon kua go memotnang lo mo wayang, ngga tang so, Israel go Ki Wali Iram iwotdak go Nemot sono srong-a kong. ⁵ Sogo tang so, motnang tandali-tandali plesagui sesemu? Wengkabui naklay iseng seguong so, nggano dabui yamso don mo kua. ⁶ Masi dabui sik so e... wengkabui no pung go, saysuk iseng seguong so: wimsre go, natun eygo kuo demening go nggakalik itak go gigit, ta kua suk, maning kua dok, mlay logo kua ut dali. ⁷ Mot go nan kluim mo tebung. Mot go yaken-yakena koy lo mo puit; mot go nemu damoy so mot go nan sik sogo wasma seni plesi lo mo king. Yakena ngga, amle lo waluk go kalik, kluim mo tebung. ⁸ Sion kaguit banom mo itak, anggul usu bala nogo kalik, ketimun usu bala kalik, nggano, plesedue lo wok teguot go yakena kalik. ⁹ Yang! Imot sik sogo seduekabung temu Ki Wali Kumam lo kua itak go sogo, Sodom ey Gomora eygo kalik imot mang mo lemoy. ¹⁰ Hai Sodom seduekabung go wengkabui-wengkabui, Woy Wali Iram lo pu go motnang se tup, Ki Wali Iram lo ngunguok go sono kama se tui, ey Gomora sogo seduekabung! ¹¹ Woy Wali Iram lo pu go; “Mot go menaytaiti miam so ibot go, Genam nogo sogonang so? Motnang go menaytaiti miam so ibot go puput golo Genam mo nena, domba kemsi ey sapi nok go bena nogo Genam kua iwat; sapi kemsi nguot go kin nogo, nggano domba kemsi nogo Genam kua yang. ¹² Genam go suongku no ip so motnang weng go nogo, nando lo motnang mo pu, Genam go yap seboy teguop go motnang go masi lo ne gualing, nando lo motnang kuong king? ¹³ Dabui lo kua iti go menaytaiti ngga, Genam sono kua iti go weng. Seni so, ngga kalik go menaytaiti ngga seni kua, Genam so piam go. Banu inim no walop pla go nogo, nggano, Sabat yaluim go tegu-sing go nogo, Genam yakua ikum. Motnang go walop ngganemot kuaseni golo mo tram g tang so. ¹⁴ walop-walop banu inim no mot lo sesemu go ngga, nggano senang so sesemu go walop-walop ngga ikum sogo Genam ikle ey; ngga naklay genam nogo idekeba so mo lemoy, ngga glung golo Genam ey mo lasu. ¹⁵ Dewi pu sogo no motnang lo bluo sono ta iti go, Gemam motnang sono go nebuemnemu yakua iwot. Nemot-a Genam sono dewi tandali-tandali motnang lo pupu go, ngga Genam ya kua tup. Seni so, mot go ta naklay kin lo mo damoy. ¹⁶ Mot saysuk bu se ulu! Genam go suongku sik sogo, motnang go tasam piam go ket sono se ka, taybat se itak, ¹⁷ tasuey pluok genang-a se ngunguok. Nemudi sogo-a se usey, kuaseni go sedue tapla so se tebok. Duonsawon go tete tebok go se pen, kenin kua go kabung nalo tete sogo se tebok go pen pen dali! ¹⁸ Weng ya! Ngge suey, imot ya pen go! — Woy Wali Iram lopu go — Yang, nemot-a mot go konkebamling kermizi kalik kin suk so go gumwau kebup kalik mea klaut; nemot-a amka kusumba kalik buom go, ibam nok kalik mea klaut seni. ¹⁹ Motnang keng go suey so tup go, motnang go seni suey go mot go nan ngga sik motnang mea dam. ²⁰ No, way so plesagui-a motnang lo semu go, motnang-a wayso tengang lo mea dam." Yang, ngga Woy Wali Iram lo pu go nebut gemang. ²¹ Ngge, sogo kalik so ne? Yakena ngga, banim go kengduduk so, nggeasui go wayso kamae-kamea so ne lemoy! Banim go nemudi so koklong, nggano seni eygo-a mo damoy. No, nggeasui go tetebuet lo wayso mo kenok. ²² Mot go perak mo bluot-sing. Nggano mot go arak ip, bu ey mo bluot. ²³ Mot go deguena-deguena plesagui sedue so lemoy go, wom sedue ey ta mo keduik. Naklay-naklay klay duoy sogo-a yakay dega ey, ngga ey klayduoy-a ne tutruik. Duonsawon go tete nemotnang logo kua pepen, ngga ey kenin kua go kabung nalo tete sogo nemotnang logo kua pen dali. ²⁴ Ngga tang so, Israel go kuikikling, Ki Wali Iram, Woy Wali Iram, Ki Wali Kumam don dega ey go lo ngge kalik so gabe pen; "Ya, Genam go plesi nogo, Genam go dabui piam mea but-sing. Nggano, way dali so Genam go plesi nogo mea but dali. ²⁵ Tasam motnang nogo, Genam lo mea pluok: biapsoda lo Genam go perak bu At lo mea ulu. Ngga ey, nemotnang sik sogo demutima git so mea pung. ²⁶ Mot go seduewoy-woy banim go kalik so, tandali Genam lo mea iti. Nggano, banim go sedue kalik dali nebut mangking mea king. Ngga ey, nemudi sogo yakena so, kengduduk yakena so mot sogo mea pu." ²⁷ Sion nemudi so Genam lo neyboy gono tameamlak. Nggano, wali mo iwotdak go seduekabung seni eygo-a, ta Genam lo mea itak. ²⁸ No, sagui eygo seduekabung-a, kuklue so pluok go-a kekayso mea kesuop. Nggano, Woy Wali Iram itak go seduekabung-a mea suep. ²⁹ Yang, takokongdi motnang lo duing go tang so, motnang nogo suongsut-a mea taling; nggano, dino-demuno ta kokong sogo-a motnang lo kuoy go tang so, nemu bluo sono go motnang yakua iti. ³⁰ Yang, takokongdi, dop kuok go kalik so motnang mea kuok, nggano bu kua kok go usu kalik motnang mea lekuoy. ³¹ Yang, don eygo-a iwa-iwa kapas kalik mea lemoy, nggano, nemot go kebali tegangkoy kalik mea lemoy; ngga namon koy ey mae teglong, koy ngga sut genang yakua.