Pasal 9
Taidi tete sogo dalu: menay nogo dalu kangok go
1
Ngga ey, Musa sono, Woy Wali Iram lo pu go, "Piraun go suongku no klong-a! Nggano, nemot no se pen, “Woy Wali Iram sedue Iblani go Ki Wali Iram go nebut ngge kalik so gabe, ‘Genam go blung itak go se klong. Ngga tang so, Genam nogo nemotnang dewi takong genang.’”
2
No, nemotnang klong genang sogo, mot lo tenguo go, nggano, nemotnang maning gluik go,
3
mot go menay usus sogo, kuda, keledai, unta, lembu sapi, nggano kambing domba, Woy Wali Iram logo dalu kangok go "sampar" mea klak.
4
Ngga no, sedue Mesir go menay ey sedue Israel go eygo sang Woy Wali Iram lo mea tui. Ngga tang so, sedue kabung Israel go menay klayanang go meakua kebong. No, sedue Mesir go-a naklay mea leguot."
5
Nemot go ku Woy Wali Iram lo mea pu, ngga, Nemot lo pen go nebut, "Utep so, nan ngge blo nogo tasam ngga Woy Wali Iram lo mea lemoy."
6
Ngga no, ngga utep go tasam ngga, Woy Wali Iram lo gemang lemoy. Sedue Mesir go menay naklay ngga lo kebong go. No, sedue Israel go menay sik sogo, klayanang go kua kebong.
7
Nggano, Piraun lo sedue kuong king go, ngga sono klong go, ikum go seduekabung Israel go menay sik sogo klayanang go kua kebong. No, Piraun senang so dabui demu ey, kua iwat saula Israel itak go klong sogo.
Taidisoklaya tete sogo dalu: kluo
8
Ngga ey, Musa ey Harun eygo sono Woy Wali Iram lo pu go, "Demusung blo sik sogo sung sip klaya damoy ey iti. Nggano, Piraun go nemu ku no, bluo sono sung ngga Musa lo se tega.
9
Ngga ey, sung ngga sungkuim so lemoy go nan Mesir naklay blo no mea kenok. Ngga lo, nan Mesir naklay nogo, koy lo buot go kalik go kluo lemoy go mea pung-sing, sikabung ey menay eygo naklay nogo."
10
Ngga ey, demusung sik sogo sung nemotnamon lo iti go, Piraun go suongku no ip go, ngga ey ut sono sung ngga Musa lo gemang tega. Ngga lo, seduekabung ey menay eygo saysuk temoy nogo koy lo buot go kalik go kluo gemang pung-sing
11
Mesir go blue sedue go saysuk, kluo ngga klak dali go nogo, Musa go nemuku no ip go susuing genang sogo yakua. Blue sedue ngga go saysuk no klak go kalik dali, sedue Mesir naklay nogo gemang klak dali.
12
No, Musa sono Woy Wali Iram lo pen go kalik, Piraun go dabui-a demu so Woy Wali Iram lo gemang lemoy. Ngga tang so, nemotnamon nogo kua tup-srenawon.
Taidisonamon tete sogo dalu: demu kalik go sa
13
Musa sono Woy Wali Iram lo gemang pu, "Wadikua buong go ip go, Piraun bung-a, nggano, nemot no se pen, “Woy Wali Iram sedue Iblani go Ki Wali Iram go nebut ngge kalik gabe, ‘Genam go blung itak go se klong. Nemotnang Genam nogo dewi pu go takong genang.
14
Seni so, daklaya ngge Genam go dalu mot go kebalisedue ey mot go blung naklay nogo seguong-a kua, no, mot tang go nogo Genam lo mea taling dali. Ngga sik so, mot senong genang: seni so, kukunan naklay blo sogo Genam kalik go meno kua gabe.
15
Yang! Banim so, mot but genang so blo sono Genam go ta mo iti. Mot ey mot go blung eygo dalu lo but genang so. Ngga tang so, kukunan sik sogo mot kua genang.
16
No, ngge lemoy genang sogo so, mot Genam lo itak go gabe wali. Yangga, ngga tang so mot no Genam go don taling genang. Nggatang sogo so, kukunan blo nogo Genam go sui iway iti genang.
17
Genam go blung mot lo maning gugluik, nemotnang mot lo itak go kua koklong go
18
Seni so, utep i go sogo ku, demu kalik go sa Genam lo mea pu, ngga seni so kangok dega. Nan Mesir nogo ngga kalik go, maning kua lemoy. Nan Mesir lemoy go sik so e… nggeasui gono gabe pung.
19
Ngga tang sogo so, mot go usu damoy sogo menay, sip suey go sono wawi go se klong. Seduekabung ey menay ey usu sogo naklay, yap sono kua wawi go, demu kalik go sa pupu golo but go mea kebong."
20
Ngga ey, nando Piraun go kebali sedue sik sogo, Woy Wali Iram go nebut no suali tra go, pu go nemotnang go kebali sedue ey, menay eygo yap no se pu go kuek.
21
No, Woy Wali Iram go nebut no nando lo kua keng go, nemot go koybutasemu ey nenay eygo usu no gemang itak.
22
Ngga ey, Musa sono Woy Wali Iram lo pu go, "Ut sono ta sra-bilo ya! Ngga tang so, nan Mesir naklay blo sono go demu kalik go sa pu go, seduekabung, menay, tatamang usu sogo naklay nan Mesir sogo naklay gemang kenok."
23
Ngga ey, teguoli ut sono Musa lo gemang taling. Woy Wali Iram lo kuidop ey sa demu kalik go ey, nggano, koy lo kukunan blo sono, nggano, Woy Wali Iram lo demu kalik go sa pu golo nan Mesir kenok.
24
Ngga no, demu kalik go sa pupu, kuadon koy kuidop eygo sa lo gemang pupu, naklay kangok dega. Nggakalik go, sedue Mesir go nan nogo kua lemoy go. Nemotnang saula tang klaya, banom suing go sik sogo kua lemoy.
25
Demu kalik go sa ngganemot lo yam so leguot, sogo-sogo usu sogo, nan Mesir sogo naklay. Sikabung ey menay ey, tatamang usu sogo naklay, sa ngga lo yam so leguot-sing. Nggano, duen logo di naklay, yam so truik-sing.
26
Nan Gosyen, sedue kabung Israel suisuing go-a, demu kalik go sa ngga kua pu.
27
Ngga ey, Piraun lo pu go Musa ey Harun eygo usi gono gemang pu, "Kuklue kangok so genam lo mo pluok, Woy Wali Iram ngga seni so! No, at ey genam go blung eygo lo mo kuklue.
28
Woy Wali Iram sono dewi pu-a! Kukluim kangok go ey, demu kalik go sa tong-a. Ngga ey, motnang at lo itak go mea klong. Ngge nogo, walong so motnang yakua suing."
29
Ngga no, Piraun sono Musa lo pu go, "Yakena ngge sik so, genam pung gono, Woy Wali Iram sono genam ta mea iti. Nggano, kukluim mea itak go, demu kalik go sa mea tong. Ngga tang so, mot senong genang: seni so, kukunan ngge Woy Wali Iram go gabe.
30
No, genam mo senong: mot ey mot go kebali sedue ey, Woy Wali Iram ngga Ki Wali Iram nogo suali kua."
31
-Usu wasma maning un sogo ey seni yam no, seni so, yam so mo waluk-sing.
32
No, gandum ey yen eygo-a kua waluk, nemot kuali go ku maning go nogo.
33
Ngga ey, Piraun itak go Musa pung go gemang klong. Woy Wali Iram sono ta iti-biwon go, kukluim ey demu kalik go sa eygo gemang tong. Nggano, kukunan blo nogo sa ngga kalik go kua pu dali.
34
No, Piraun ikum go: seni so, sa demu kalik go nggano kukluim mo itak. Nemot kuklue gemang semu dali. Nemot senang so, dabui demu ey, nemot ey nemot go kebalisedue eygo.
35
Musa no Woy Wali Iram lo pen go kalik, Piraun dabui demu so lemoy go, ngga tang so, sedue Israel itak go kua klong