Pasal 10
Taidisonangglik tete sogo dalu: medop
1
Ngga ey, Musa sono Woy Wali Iram lo pu go, "Piraun go suongku no klong-a! No, seni so nemot ey nemot go kebali sedue eygo dabui, demu kalik Genam lo mo lemoy. Nggatang so, Genam go tasam kangok go, nemotnang nogo taling genang.
2
Nggatang sogo so, mot go duono-duono pepen genang. Sogo kalik so, sikabung Mesir nogo Genam lo mo pluok. Nggano, tasam-sasam nago-a, nemotnang nogo Genam lo mo semu. Ngga ey, motnang se senong: Seni so Genam ngge Woy Wali Iram gabe."
3
Ngga ey, Musa ey Harun ey klong go, Piraun no gemang pu, "Woy Wali Iram sedue Iblani go Ki Wali Iram go nebut, ngge kalik gabe, ‘Ku kata yam so, mot lo Genam ya tenguo, Genam go suongku nogo, ku sono go mot ya suing? Itak go, Genam go blung se klong! Ngga tang so, nemotnang lo Genam nogo takong genang.
4
Seni so, Genam go blung klong genang sogo mot lo tenguo go. Utep go mot go nan blo nogo, medop Genam lo pu go mea weng-lak.
5
Nan blo naklay, medop ngga lo mea kenok. Nggano, sedue logo nan yakua ikum. Demu kalik go sa lo itak go temu, medop ngga lo yam so mea dam. Nemot go duen logo di naklay, medop ngga lo mea dam.
6
Mot go yap ba nogo, mot go kebali sedue go yap ba nogo, sedue Mesir go yap naklay ba nogo, medop ngga lo mea tram. Tasam ngga kalik go, mot go ayanang nogo, babunang nogo lemoy go maning kua ikum go. Nemotnang tui go sik so, e… nggeasui go ku no pung go, ngga kua lemoy." Ngga ey, Musa ey Harun ey iwot-ak go, Piraun itak go gemang klong.
7
Ngga blo idi lo, Piraun go kebali sedue lo nemot no gemang pu, "Ku kata yam so, sedue ngganemot, imot nogo sado sogo ya lemoy? Itak go, seduekabung ngga klong-a. Ngga tang so, Woy Wali Iram, nemotnang go Ki Wali Iram sono, nemotnang dewi pu genang. Tuiam kua duing? Nan Mesir yam so mea waluk seni!
8
Ngga ey, Musa ey Harun ey tandali Piraun sono wawi gono, nemotnang no Piraun lo pu go, "Klong-a! Dewi klong go pu-a, Woy Wali Iram, mot go Ki Wali Iram sono go. Nando-nando-a ya klong-lak?"
9
Musa lo wa go, "Atnang ey klong genang sogo, sedue nguot-kaguit, sedueseni-kabungnalo, duo-kabung, ngga ey, kambing domba, lembu sapi. Yang, Woy Wali Iram nogo walop atnang se semu."
10
No, nemotnang no Piraun lo pu go, "Woy Wali Iram motnang ey nase koklong. Motnang go duokabung-yap ey, at lo itak go klong go. Ngga, motnang go duduing piam go gemang. Ngga genam mo ikum!
11
Ngga kalik go, motnang ya kua klong-lak! No, sedue seguong-a, Woy Wali Iram sono dewi pu genang-a se klong. Seni so, ngga motnang go duduing." Ngga ey, Piraun go suong ku sik sogo, nemotnang yat go gemang pluep.
12
Ngga ey, Musa sono Woy Wali Iram lo pu go, "Ta sra go, nan Mesir blo sono go medop se weng. Nggano, medop weng golo nan Mesir kenok go, tatamang naklay, demu kalik go sa lo itak go, nan blo sogo naklay yamso medop ngga lo mea dam."
13
Ngga ey, nan Mesir blo sono Musa lo nemot go teguoli gemang leguit. Ngga ey, woyklak sik sogo nebit Woy Wali Iram lo nan ngga blo no gemang iti. Kublong klaya-kuklik klay ba no. Nggano, wadikua go, woyklak sik sogo nebit ngga lo medop king go weng-lak golo,
14
Nan Mesir naklay medop lo yam so kenok. Ngga, nan Mesir naklay blo no gemang gualing. Seni so, mata dega so. Ngga kalik go medop maning kua pung. Nggano, ngga blo logo ngga kalik go meakua lemoy dali.
15
Nan blo naklay, medop lo yam so kenok golo, nan ngga naklay ku ey klik. Tatamang naklay medop lo yamso dam. Demu kalik go sa lo itak go didon, tatamang, usu, nan Mesir naklay sogo, kua itak. Di temoy sogo dop kiki sogo kua ikum.
16
Ngga ey, Musa ey Harun eygo keda so Piraun lo usi gono gemang pu, "Genam kuklue mo pluok, Woy Wali Iram mot go Ki Wali Iram sono go, motnang sono go mo kuklue dali.
17
Ngga tang sogo so, genam go kuklue sang se suep. Woy Wali Iram mot go Ki Wali Iram sono dewi pu-a. Ngga tang so, kekebong go tasam ngge, genam sik sogo ngga sono se ka."
18
Ngga ey, Piraun go suongku sik sogo, Musa pung gono, Woy Wali Iram sono dewi gemang pu.
19
Ngga ey, woysut sik so nebit, Woy Wali Iram lo iti go, yangga nebit don kangok go woy sut sik sogo. Medop naklay biap Teberau sono nebit ngga lo giang go gemang degut-sing. Nan Mesir nogo, klayanang go medop kua itak.
20
No, Piraun go dabui demu so, Woy Wali Iram lo gemang lemoy. Ngga tang so, sedue Israel klong genang kua yang.
Taidisonamon-namon tete sogo dalu: kuklik go
21
Musa sono, Woy Wali Iram lo pu go, "Ut sono ta sra-bilo-a! Ngga tang so, nan Mesir naklay nogo ku mea klik. Ngga tang so, sedue takasa so uwet genang."
22
Ngga ey, ut sono Musa ta sra go, Mesir naklay nogo, kuklik gemang pung, kublongnanglik-kukliknangglik yam no
23
Nemotnang go anduasi ikum genang yakua. Kunangglik ngga ba nogo sip srek sik sogo, sedue Mesir yakua buong. No, seduekabung Israel suisuing go sip-a, kublong so gigit.
24
Ngga ey, Musa usi go Piraun lo gemang pu, "Klong-a, dewi klong pu-a, Woy Wali Iram sono. No, menay sapi ey domba ey kambing eygo-a se itak. Mot go duokabung yap-a, motnang ey se klong-lak."
25
No, Musa lo pu go, "Taiti so puit genang ngga menay. Nggano, menay puit genang ngga naklay, atnang nogo mot lo ya iti? Woy Wali Iram atnang go Ki Wali Iram sono atnang taiti puit genang.
26
Menay atnang ey mea klong dali. Masi won klayanang go meakua itak. Seni so, menay ngga sik so, dewi pu genang sogo atnang mea iti. Woy Wali Iram, atnang go Ki Wali Iram sono go. Nggano, atnang kua senong, atnang dewi pu genang, Woy Wali Iram sono. Ngga, atnang maning kua senong, menay nago-a taiti sogo ya puit."
27
No, Piraun go dabui-a, demu kalik Woy Wali Iram lo gemang lemoy. Ngga tang so, nemotnang klong-lak genang nemot yakua itak.
28
Ngga ey, Piraun lo nemot no pu go, "Klong-a! Genam sik sogo nase klong! Mot seglaplu! Mot go nebuemnemu, tandali go genam kua ikum. Yang! Mot go nebuemnemu ikum go ku no, mot mea kebong seni."
29
Ngga ey, Musa lo pu go, "Yang, mot lo pen go kalik, mot go nebuemnemu tandali go, genam meakua ikum!"