Pasal 11
Tanamon tete sogo dalu pen go
1
Musa sono Woy Wali Iram lo gemang pu, "Piraun ey nan Mesir eygo blo sono dalu, klaya dali Genam lo mea iti. Nggablo lo, ngge sik sogo nemot lo itak go motnang pung go mea klong. Nagono, ngge sik sogo, nemot lo motnang itak go, seni-seni so, motnang nemot lo yat go mea klong-lak.
2
Ngga suey, blung Israel nogo se pen, “nemotgo-nemotgo yaptenglam klay go sogo no taut, emas, perak, kabung-kabung no se wadong-sing dali."
3
Ngga ey, sedue Mesir go dabui, blung Israel sono guala-klum ey, Woy Wali Iram lo mea iwot-ak. Nggano, nan Mesir nogo sedue klaya duo sui eygo ngga Musa, ngga tang so mea. Seni so, Piraun go kebali sedue ey Mesir go blung eygo nogo, Musa ngga sedue suey go.
4
Musa no "Woy Wali Iram lo ngge kalik gemang pen, “Ngga ku nogo, wadi nesip nan Mesir nesip lo Genam mea koklong.
5
Ngga ey, nan Mesir sogo duo sedue denok trang sogo, nemotgo-nemot go mea kebong. Piraun go duo trang sipsuing so suisuing go, koybutasemu kabung demu liging goso ip, nggano menay nok kemsi trang sogo naklay mea kebong-lak.
6
Ngga no, nan Mesir naklay nogo, kayangkluim kangok go mea segueng. Ngga kalik go maning kua lemoy, nggano tandali go mea kua lemoy dali.
7
No, sedue Israel sik sogo, uduo klayanang go logo kueng mea kua segue. Seduekabung ey menay ey suey so mea suisuing. Ngga tang so, motnang se senong: seni so, sedue Mesir ey sedue Israel eygo nogo banom-banom so Woy Wali Iram lo mo taling.
8
Ngga ey, mot go kebalisedue naklay, ngge sono weng go, unuik go genam no mea plong, "Se pluep-lak go klong, mot ey mot go blung naklay ey." Ngganemot no, at mea pung go klong. Ngga ey, sagui kangok go ey Piraun itak go Musa-a pung go gemang klong.
9
Musa sono, Woy Wali Iram lo pu go, "Motnang nogo Piraun meakua tup. Ngga tang so, nan Mesir nogo tasam-tasam mata so Genam lo pluok sogo."
10
Tasam ngge naklay, Piraun go nemuku no Musa ey Harun ey golo mo pluok. No, Piraun go dabui Woy Wali Iram lo demu so gemang lemoy. Ngga tang so, nemot go nan Mesir sik sogo, sedue Israel itak go kua klong-lak.