Pasal 12
Walop Paska lemoy go
1
Nan Mesir no, Musa ey Harun eygo sono, Woy Wali Iram lo pu go,
2
"Banu ngge-a, kuduong sogo banu, mot nogo so mea lemoy. Yaguino-yagui nogo klaya tete sogo banu so banu ngge-a gabe.
3
Blung Israel naklay sono nase pen, “Yangga, ku tanamon tete banu ngge ba no, nemotgo-nemotgo so domba nok klaya, yaptenglam klaya-klaya, nemot go tangklaya go se iti-sing.
4
No, yap tenglam ngga seguay go, dabuilap nanglik eygo, kerlam so yaptenglam klay go dagu sogo ey domba nok klaya se iti. Ngga, suey so se ikum, naklay lo daklaya dam genang sogo, ya nemot?
5
Mot go domba nok ngga, kemsi teguop go yagui klaya yam nogo-a motnang lo se iti! Domba kua go kambing-a se iti.
6
Domba nok ngga, betui ba no motnang lo dok go e… ku 14 no se pung. Ngga no, use woy susut gono, blung Israel naklay yaluim golo se tong-sing.
7
Ngga sik so, domba nok ngga go kin seguai so se iti. Kin ngganemot iti go, tapput dedegut go, di namon ey yatap blo nogo ey se ut. No, menay ngga so dam go sedue go yap no se ut-sing.
8
Ngga wadi dali nemotnang lo domba nok ngga go kedong se dam. Koy blo no tui gono, ragi kua go loti ey bete eygo ulum ey se dam.
9
Kiki so kua dam, nggano kabui no kua suik gono ku dam. No, naklay nemot go wengkabui ey, isegan ey, iteguan ey, naklay koy no ta gono se dam.
10
Wadikua go nogo ey itak go menay ngga kua pung. Wadikua go nogo ey mo pung go, yam so koy no se puit-ak.
11
Ngga dedam go nogo, motnang ngge kalik so se: masisuk masi no se kok, kuibey se dok, nggano, mot go ta no teguoli dali se iti. Ngga, keda-keda so, motnang se dedam! Ngga, Woy Wali Iram nogo Walop Paskah gemang.
12
Seni so, nggeasui wadi go, nan Mesir no Genam mea koklong. Nggano, duo sedue denok trang sogo naklay, sikabung nok sik so, e… menay nok, At lo but go mea kebong. Nggano, Mesir go ida naklay sono go idekeba, Genam ngge Woy Wali Iram lo mea iti.
13
Ngga no, mot yap-yap nago so suisuing go, kin ngga lo taling genang, nago no, kin ngga Genam ikum go, motnang sik sogo, Genam mea klong. Nagono, nan Mesir nogo idekeba Genam lo taling go, motnang nesip nogo, dalu ngga mea kua lemoy.
14
Ku ngge mot no tetaling genang ku so mea lemoy. Woy Wali Iram nogo walop ku so duono-duono motnang lo se pepla. Senang, duono-duono tatetaling genang so, motnang lo se pepla
15
Ku taidisonamon yam so, ragi kua go roti-a duik go motnang lo se dedam. No, ku kuduong sogo no, motnang go yap ba sogo ragi, ngga sono se tega. Seni so, klay-klay sedue ragi eygo ten dam go, kuduong sogo ku sik so e… ku 7 no, saula Israel sik sogo sedue ngga se nabay-sing.
16
Ku klaya tete sik so e… ku taidinamon tete nogo, walop teguop go-a motnang lo se pla. Kebali ku ngganemot nogo kua pluok seni. No, nemotgo-nemot go tendam seguong-a, motnang logo dali se semu-sing
17
Loti ragi kua go walop-a motnang logo se pla. Yang, nggeasui go ku dali no, nan Mesir sik sogo plesedue daley Genam lo wawi go pung go klong go. Walop ku ngge, duon-duono tetaling genang so, senang so motnang lo se pepla.
18
Banu klaya tete ngga ba no, ku 14 tete no, woy susut go nogo, ragi kua go loti-a motnang se dam go, e… ku 21 tete banu ngganemot ba no, woy susut gono se pung.
19
Mot go yap ba nogo, ku taidisonamon yam nogo ragi kua tui. Seni so, ragi eygo ten nando lo dam go, blung Israel sik sogo sedue ngganemot nase but go kebong. Blung tang go sik sogo, amble saula meno sik sogo se nabay-sing.
20
Sogo sogo ten ragi eygo, motnang logo kua dam, motnang go sipsuing naklay nogo, ragi kua go ten-a se dedam."
21
Ngga ey, sedue-sedue Israel Musa lo usi go, gemang pen-nawon, "Motnang klong go, motgo-motgo tang nogo kambing-domba iti go, Paskahnang sogo domba nok se tong.
22
Ngga ey, wakay ba sogo domba kin no spon lo suik go motnang go yatap blo ey yatap di idino-idino se ut dali. Wadi go, motnang sik sogo klayanang go, yap ba sik sogo kua pung, e… wadikua no se pung.
23
Ngga ey, nan Mesir nogo dalu iti genang so, Woy Wali Iram mea koklong. Nagono, domba nok go kin yatap blo ey yatap di idino-idino dedegut go nogo Nemot ikum go, yap ngga itak go, Woy Wali Iram kekayso mea klong. Motnang go yap ba nogo, sogo sogo dalu mea kua lemoy
24
Ngge, mot go duono-duono senang so mlak genang demutrui so gabe lelemoy.
25
Ngga no, nagono, Nemot lo pen go kalik, Woy Wali Iram lo itak genang nan no pung go nogo, suey so motnang lo mlak go walop ngge se pepla.
26
Ngga no, nagono motnang no duo-yap lo usi go, “Walop ngge go seni sogo kalik so?”
27
Motnang lo se pen, “Yangga, nan Mesir no Paskah sogo domba nok tong go tang so, sedue Israel go yap-a, Woy Wali Iram lo itak go, sedue Mesir go yap ba nogo-a dalu lemoy go. No, imot sedue Israel go yap-a gemang sesuoy-sing." Ngga tang so, saula ngga unuik go, takong go.
28
Musa ey Harun eygo no Woy Wali Iram lo pen go kalik, sedue-sedue Israel klong go gemang pluok.
Tanamon tete sogo dalu: sedue denok trang sogo kebong go
29
Ngga ey, wadi nesip go, nan Mesir sogo sedue denok trang sogo, Piraun go sip suing sogo danon trang, boy ba sogo sedue, kekedik ba sogo, nggano menay nok kemsi kuduong sogo, klay-klay Woy Wali Iram lo gemang but-sing.
30
Ngga ey, ngga wadi go Piraun nemot go kebalisedue naklay ey, sedue Mesir naklay ey buong go, nan Mesir naklay no u kluim segueng go, kangok so gemang tup. Seni so, yap klaya go danon trang kua kebong go kua.
31
Ngga ey, ngga wadi go, Musa ey Harun ey Piraun lo usi go gemang pu, "Buong-a! Genam go blung nesip sik sogo, pung go nase klong. Mot ey sedue Israel naklay ey se klong-lak! Mot lo pu go kalik, Woy Wali Iram sono dewi klong pu-a.
32
Mot go kambing-domba, lembu-sapi naklay ikak go se klong. Nggano, genam nogo taiti se wadong dali."
33
Sedue Israel pung go klong genang so, sedue Mesir lo ta logo ey gemang poplong dali. Nan ngge sik sogo saula Israel pung go klong-a, "Atnang naklay kebong genaning."
Nan Mesir sik sogo sedue Israel pung go
34
Ngga ey, saula tang Israel lo tepung, ragi maning kua tui tepung sip ey dok go, yalu no kokong go gemang klong-lak.
35
Musa lo pu go kalik, sedue Israel logo gemang pluok dali. Sedue kabung Mesir sik sogo taut, emas, perak nggano amka, nemotnang lo gemang wadong dali.
36
Ngga no, sedue Mesir go dabui, saula tang Israel nogo klum-a ey Woy Wali Iram lo iwot go, ngga tang so, nemotnang lo wadong go taut ngga gemang ikak.
Ngga kalik so, sedue Mesir go taut nemotnang lo gemang lek.
37
Ngga ey, Raamses sik sogo Sukot sono masi lo sedue Israel ip go gemang klong-lak.
Ku ngganemot no ip go, sedue seguong-a i go, 6ratus ribu yam so. Ngga, denok ey kabung eygo kua i.
38
Ngga ey, amble tang meno sik sogo, nemotnang ey keng go, menay, kambing-domba, lembu-sapi, miam dega ey, daley kango go dega.
39
Nan Mesir sik so iti go tepung ngga, roti ragi kua goso, muong-muong so, nemotnang lo gemang duik. Seni so, tepung ngga ragi kua tui, nan Mesir sik sogo, nemotnang lo yat go, kuek so kuek go, tap no dam genang ten kua dali go nogo.
40
Sesenong: Nan Mesir so seduekabung Israel suing go yagui, 430 yam no
41
Yam so 430 yagui no pung go ku ngganemot seni no, nan Mesir sik sogo Woy Wali Iram go plesedue tala pung go gemang klong-lak.
42
Ku ngganemot wadi go ngga, Woy Wali Iram lo Nemot go blung Israel yay suisuing. Nan Mesir sik sogo nemotnang wawi go pung genang sogo so. Nggano, sedue Israel naklay, yay ey gemang suisuing. Nggano, ku ngganemot, duono-duono Woy Wali Iram go blong iway iti genang sogo ku gemang.
Paskahnang sogo demutrui
43
Musa ey Harun eygo sono Woy Wali Iram lo gemang pu, "Ngge Paskah tetaling genang gabe: amble saula tang meno sik sogo, kua keng go dam.
44
Klayaduo koybutasemu duoy lo iti go, saduisuk tong gono, walop Paskah ngge se keng go dam dali.
45
Amble saulameno walop Paskah sogo ten kua keng go dam!
46
Yap klaya go ba nogo, Paskah ngge se dam dali. Walop ngga ba sik sogo menay temu klayanang go, yap ba sik sogo dia nogo kua iti go pung. Menay ngga go don, klayanang go mot logo kua pedueng
47
Walop ngge, blung Israel naklay lo se plepla.
48
No, nagono, amble saulameno sik sogo mot ey mo suing go, nggano, mot ey walop Paskah Woy Wali Iram nogo pla sogo, nemotnang sik sogo sedue saduisuk se tong-sing, ngga ey, walop se keng go se dam. Ngga tang so, nemot ngga nannok so mea wawi. No, nando saduisuk kua tong go, walop ten ngga yakua dam
49
Sedue Israel tang go ey, amble saulameno eygo klay gono mo suing go nogo sogo demutrui, klaya seguong gabe iti."
50
Musa ey Harun eygo no Woy Wali Iram lo pen go kalik, blung Israel naklay lo keng go gemang semu. Nemotnang lo ngga kalik so gemang pluok.
51
Ngga no, ku ngganemot seni no, sedue Israel Woy Wali Iram lo wawi go pung go, nan Mesir sik sogo itak go gemang pluep-lak. Nemot go plesedue tang daley, ngga nemotnang gemang klong-lak.