Pasal 13
Keduong so tui go sedue denok ey menay nok kemsi eygo
1
Musa sono, Woy Wali Iram lo gemang pu,
2
"Sedue denok kuduong so tui go naklay, Genam nogo so tenguo go se teguop-sing. Yangga, Israel kabung go sani sik so trang so tui go sedue denok naklay. Ngga no, menay nok kemsi kuduong so tui go Genam tete sogo gemang. Nemotnang ngga, Genam tete sogo gemang.
Ragi ey kua bluot go loti-a duik go dam genang walop
3
Ngga ey, Israel saulatang sono, Musa lo pu go, "Nggeasui go ku tetaling genang sogo walop se pepla. Seni so, motnang Mesir no koybutasamu go yap sik so pung go ku ngge gabe. Yang, Nan Mesir sik so, Woy Wali Iram lo, Nemot go ta don-dega eygo lo motnang wawi go mo pung go klong. Walop ngga pla genang, sogo-sogo ten nogo, ragi ey yakua tui go dam.
4
Banu "Abib" ba no motnang pung go klong go ku ngge gabe.
5
Nagono, Woy Wali Iram lo wawi go sedue Kanaan, sedue Het, sedue Amori, sedue Hewi nggano sedue Yebus go nan, tanat ey tegadi mo dok, mot go babuasi no: motnang no iti genang so, Nemot lo dok go. Nan ngga, seni kangok, min ip ey tom teguop eygo lo tram go. Walop dewi ngge, banungge-banungge dali ba no, yaguino-yaguino mot lo se pepla.
6
Ku taidisonamon yam ba no, Ragi ey kua bluot go loti se dedam! Nggano, taidisonamon tete nogo ku ngga, Woy Wali Iram nogo, walop ku gemang.
7
Ragi ey kua bluot go loti ngga, taidisonamon ku ngganemot bano se dam. Mot ba nogo, sogo-sogo nogo, ragi eygo ten, mot suisuing go sip naklay nogo, ragi kua ikum seni.
8
Mot go duo sedue denok no, ku ngganemot se pepen, "Walop ngge semu go ngga, Woy Wali Iram lo semu go tasam ngga duiduing genang sogo walop gabe. Ku nan Mesir sik so Genam lo wawi go pung go nogo, Genam nogo duduing genang."
9
Mot go ta temoy nogo ey, suongdon nogo ey tataling genang so, tasam ngge se lemoy. Ngga tang so, Woy Wali Iram go demutrui, mot go lom blo so gigit genang. Seni so, ta don kangok golo, Woy Wali Iram lo wawi go mot Mesir sik so mo pung.
10
Ku mo pu go ngganemot no, waysagi ey demutrui nggenemot yaguino-yaguino mot lo se mlak go koklong.
11
Nagono, mot Woy Wali Iram lo wawi go, sedue Kanaan go nan no pung go, tegadi so Nemot lo mot ey mot go babu eygo no tanat ey dok go tegadi kalik. Nggano, nan ngga, mot no Nemot lo mo iti go.
12
Kuduong so sani ba sik so tui go naklay, Woy Wali Iram nogo taiti so mot lo se iti. Nggano, mot lo popong go menay lo kuduong so tui go ngga, Woy Wali Iram nogo so se iti. Yangga, nok kemsi kuduong so tui go. Ngga, Woy Wali Iram tete sogo gemang.
13
No, keledai nok kuduong so tui go-a, way so domba-a se iti. Kua go, ngga mot lo way so kua iti go, nemot go blindon-a mot lo se pedueng. No, sinok sedue denok trang so tui go way sogo, domba nok lo way so se iti.
14
Ngga no, yansi go nagono, mot sono mot go duo lo usi go, “Ngganemot go seni sogo kalik?” Nemotnang nogo, mot lo se pen, “Nan Mesir koybutasemu yap sik sogo imot, Woy Wali Iram lo Nemot go ta don kangok dega golo wawi go mo pung go ku gabe.
15
Seni so, imot pung go klong genang sogo, Piraun moyso, dabui ide eygo tang so, sedue Mesir go danon trang sogo, Woy Wali Iram lo but-sing go mo leguot. Trang so tui go danonnang sik so e… menay nok kemsi kuduong so tui go naklay ey mo but-sing. Nggatang so, kuduong so tui go naklay, menay go sani ba sik so keduong so tui go kemsi taiti so Woy Wali Iram nogo so gabe itak. Sedue denok trang so tui go sogo-a, way so, menay domba-a way se iti.
16
Tasam ngga lo, mot go ta ey suongdon eygo nogo, tataling genang so gemang lemoy. Seni so, Nan Mesir sik sogo, Woy Wali Iram go tadon kangok golo, Nemot lo wawi go imot mo pung."
Nemot go blung Ki Wali Iram lo wawi go pung go
17
Ngga ey, Piraun sedue Israel itak go klong genang sogo. Nan Filistin nogo sogo tap lo, Ki Wali Iram lo wawi go kua klong. Nemot-a, nan Filistin tap logo dagu dato. Seni so, Ki wali Iram lo pu go, "Nagono, tap no ple pupung go sik so, saula ngge dabuilek go tang so, nan Mesir sono tandali nemotnang teguey genaning."
18
No, saula ngga paygo, kaseglok pay tap biap teberau tap lo, Ki Wali Iram lo wawi go gemang klong. Plesedue, ple pupung genang tala kalik so, sedue Israel taut go, nan Mesir sik sogo gemang klong-lak.
19
Yusuf go don, Musa lo king go nemot ey gemang klong dali. Seni so, Yusuf lo pu goso, Israel go danonnang lo tanat ey tegadi dabui lo mo dok go nogo, "Motnang nogo Ki Wali Iram lo iwat go, mea pung go klong! Nan ngge sik sogo, genam go don ey king go se klong dali."
20
Ngga kalik, ngga sik so nemotnang ip go, Sukot nggano Etam no kaseglok pay ketang no, bala betep go.
21
Nemotnang koklong go nogo, nemotnang go suongku no Woy Wali Iram koklong go, kublong go nogo utkenuim neguon kalik so, nemotnang so wawi go koklong. Nggano, kuklik go nogo, koy nguon kalik so, Nemot blong so, nemotnang wawi go gemang koklong. Ngga tang so, nemotnang kuklik-kublong gemang koklong-lak.
22
Utkenuim neguon ngganemot kua iwot-ak, senang so gemang kublong go, nggano koy neguon wadi kuklik go nogo saula ngga go suongku no gemang koklong.