¹ Musa sono ngge kalik Woy Wali Iram lo gemang pu, ² "Sedue Israel sono se pen, nemotnang tandali iwot go, Pi-Hahirot suongku no, Migdol ey biap eygo Baal-Zefon go suongku seni no, biap ketang no motnang bala se klik. ³ Ngga ey, Piraun lo mea pu, “Yangga, sedue Israel, nemotnang nan ngge ba no, kaseglok pay lo nemotnang mo tong-sing go, tap mo nega. ⁴ Kua kay: Piraun go dabui, Genam lo demo so mea lemoy. Ngga tang so, motnang, nemot lo mea truik. Nggano, Piraun go plesedue tala naklay sono go, Genam go blong Genam lo mea taling. Sedue Mesir ngga tang so senong genang: seni so, Genam ngge Woy Wali Iram." Ngga ey, ngga kalik so nemotnang lo gemang semu. ⁵ Ku Mesir go deguena no pen-nenawon go, “Seni so, Israel saulatang mo kuek. Piraun go dabui iwotdak go, nggano, nemot go kebali sedue lo pu go, "Sogo kalik go tasam-a, imot mo semu? Seni so, sedue Israel imot go koybutasamu sik so yakua itak go klong." ⁶ Ngga ey, nemot go kebleng tegan dok go. Nggano, nemot go blung ey wawi go. ⁷ Nemot lo kuoy go kebleng 6 ratus ey wawi go. Mesir go kebleng naklay, nemotgo-nemotgo plewengkabui ey. ⁸ Ngga kalik, Piraun Mesir go deguena dabui demu so, Woy Wali Iram lo gemang lemoy. Ngga tang so, sedue Israel nemot lo gemang truik. No, sedue Israel-a kekay so, blo sik sogo ta lo wawi go koklong. ⁹ Yang, sedue Mesir, kuda nggano Piraun go kebleng naklay, kuda logo sedue, nggano plesedue tala, Israel saula so truik go. Nggano, mo pung nemotnang sono. Ku nemotnang biap ketang no bala klik go, Pi-Hahirot go nemuku Baal-Zefon dagu so. ¹⁰ Ku Piraun mo dedagu, sedue Israel iwot go, kekayso ikum go nemotnang sono sedue Mesir mo kekeng. Ngga ey, sedue Israel suali so Woy Wali Iram sono nemotnang lo uusi, ¹¹ ngga ey, Musa sono nemotnang lo pu go, "Sogo kalik so, nan Mesir sogo simu kua goso, kekayso, atnang kebong genang so, mot lo wawi go kaseglok pay no ngge sono weng? Sogo kalik so, mot lo atnang ey wawi go, nan Mesir sik sogo mo pung go weng? ¹² Ngge, nan Mesir sogo no, atnang lo mot no mo pen, “Sedue Mesir nogo koybutasemu so itak go atnang kebali sesemu. Ta logo atnang kua poplong. Sedue Mesir go kebali-a sesemu go ngga suey, kaleglok pay no tebadali kebong go ngga kuaseni.” ¹³ No, saulatang ngga sono, Musa lo pu go, "Suali kua tra, usi so ip go se ikum, Woy Wali Iram sik sogo susuoy, Nemot lo motnang no iti-kunion genang sogo. Seni so, sedue Mesir motnang lo ikum go ngge, senang so meakua ikum-kelo. ¹⁴ Motnan nogo sogo ple, Woy Wali Iram lo mea pung. Motnang-a yakot so mea suisuing."

Biap Teberau li go klong go

¹⁵ Musa sono Woy Wali Iram lo gemang pu, "Sogo so, ngga kalik Genam sono motnang wak kuklung? Seduekabung Israel sono pu go, motnang ip go se koklong-lak! ¹⁶ Nggano, mot go teguoli-a, biap blo sono iti go leguit gono, biapbu se tegek. Seduekabung Israel biap nesip lo, nan lekuoy go blo lo koklong genang. ¹⁷ No, seni so, sedue Mesir go dabui Genam lo mea demu. Nggatang so, nemotnang sedue Israel no keng go truik sogo. Ngga lo, Piraun ey nemot go plesedue tala, kuda lo lek go kebleng naklay eygo, nggano nemot go sedue kuda logo naklay sono go, Genam go blong Genam lo mea taling. ¹⁸ Ngga ey, sedue Mesir mea senong: seni so Genam ngge Woy Wali Iram gabe. Nagono, Genam go blong, Piraun sono, kuda lo lek go kebleng ey nemot go sedue kuda eygo sono Genam lo taling go." ¹⁹ Ngga ey, Ki Wali Iram go Ki wali tamot, Israel go suongku temu lo banimkoklong go. Way so taton sono pay go gemang klong. Gum di kalik go ngga pay go taton sono mesip so, nemotnang no gemang keng. ²⁰ Ngga kalik so, gum di ngga plesedue Mesir ey plesedue Israel eygo nesip no gemang kong. Gum ngga lo luep go tang so kuklik go, Mesir go plesedue lo Israel go plesedue no keng genang sogo yakua. Wadi go ngga, nemotnang gemang koklong-lak. ²¹ Ngga ey, biapbu blo sono Musa lo tasra go, ngganemot wadi go, woyklak idi sik sogo nebit iti golo, biapbu Woy Wali Iram lo tegek go, biapbu pang go, lekuoy golo nemotnang li go gemang koklong. ²² Ngga tang so, seduekabung Israel biap nesip lo bu kua go sip lo li go gemang koklong. No, tasemla takalik idi-a biapbu lo nemotnang nogo tema so klik go gigit ²³ Sedue Mesir lo keng go tutruik go, -Piraun go kuda naklay, kuda lo lelek go kebleng, nggano, nemot go kuda logo sedue- e… biap nesip sono se pupung. ²⁴ Ngga no, wadikua go, gumdi ey koy eygo ba sogo Woy Wali Iram lo, Mesir go plesedue sono nemu gemang iwot. Ngga ey, Mesir go plesedue ngga gemang suep-lak. ²⁵ Nemotnang go, kuda lo lek go kebleng long-long so koklong, nggano, ide dega ey tetra. Nggano, sedue Mesir lo pu go, “"Weng-a imot sedue Israel itak go ya kuek go. Seni so, nemotnang nogo sogo ple, Woy Wali Iram lo gabe pupung, imot sedue Mesir eygo." ²⁶ Ngga ey, Musa sono Woy Wali Iram lo gemang pu, "Biap blo sono, mot go ta leguit-a! Ngga tang so, biapbu tandali iwot genang. Sedue Mesir go kebleng ey kuda logo ey kenok genang." ²⁷ Biap blo sono Musa lo ta sra go, wadikua no se pupung, biap kekayso tandali iwot go, nemot go sip sono gemang pi. Sedue Mesir iwot go biap ba sono kuek go gemang degut. Ngga kalik so, sedue Mesir biap nesip sono Woy Wali Iram lo ikak go gemang tega. ²⁸ Biapbu ngga naklay tandali teguey golo, Piraun go plesedue daley kebleng blo logo, kuda logo naklay, sedue Israel sono biap ba sono mo keng go naklay, nemotnang sik sogo klayanang go kua itak go susuoy. ²⁹ No, sedue Israel-a, bu kua go sip lo biap nesip lo koklong. Idi-a idi, biap bu lo nemotnang nogo tema kalik so klik go, nemotnang-a susuoy so koklong. ³⁰ Ku ngganemot nogo, sedue Mesir go ta sik sogo, sedue Israel Woy Wali Iram lo, ngga kalik so gemang susuoy. Ngga no, sedue Mesir kebong temoy biap ketang lo tega go, sedue Israel lo , gemang ikum. ³¹ Nggaku no, tasam kangok dega go sedue Israel lo ikum go: sedue Mesir nogo so, Woy Wali Iram lo pluok go seni so. Ngga ey, Israel saula tang ngga, Woy Wali Iram nogo suali kangok so tra go, Woy Wali Iram sono nemotnang dabui iti go gemang keng. Ngga ey, Woy Wali Iram go tamot Musa nogo gemang keng dali