Pasal 15
Musa ey Israel saulatang eygo lo iway iti go
1
Ku ngganemot no, Musa ey seduekabung Israel eygo lo kerlam so, Woy Wali Iram sono iway usam, ngge kali so gemang kluo:
"Ngge suey, Woy Wali Iram sono,
At lo usam ba lo iway iti go.
Seni so, Nemot go blong tasam blo dega so.
Kuda ey nomot no klak go sedue eygo,
biap ba sono Nemot lo ikak go mo tega.
2
Woy Wali Iram ngga genam go don,
nggano, genam go usam popong go,
At go susuoy Iram so Nemot lo mo lemoy.
At go Ki Wali Iram, Nemot nogo-a sek se iti!
At go Ki Wali Aya Nemot-a,
Nemot-a blo sono gabe iti.
3
don ey go plesedue ngga Woy Wali Iram;
Woy Wali Iram ngga Nemot go sui gemang.
4
Piraun dikebleng eygo, plesedue tala ey,
biap sono Nemot lo ikak go mo tega;
nemot go ta lo kuoy go plewengkabui,
Biap Teberau ba noso Nemot lo mo kenok-sing.
5
biapbu kangkok golo nemotnang mo saguip;
bu kangok go ba sono demu kalik nemotnang mo degut.
6
Mot go tasemla ngga, Mot go blongdon, Woy Wali Iram,
Mot go tasemla lo plesi mo muep, Woy Wali Iram.
7
Nemot go blong tasam kangok go, blo dega so
Nando buong go Mot no sagui semu go, kekayso Mot lo kesuop;
Mot go dabuipiam koy Mot lo mea sruom-sing,
sagot tang kali so nemotnang mea dam.
8
Mot go nebuemnebit tang so,
bu tegunkoy so puk go mo klak;
bu naklay tema kalik so usi so mo klik;
bukangok go biapbu nesip no mo demu.
9
Plesi lo pu go, “Genam lo mea truik,
Nemotnang mea mlak,
motnang go taut mea wasey;
genam go duduing nemotnang temoy no mea nim,
genam go tenang mea sok nemotnang sono;
at go ta lo nemotnang mea nega-sing!
10
Mot go nebit Mot lo u go,
biap lo nemotnang mo kebet;
timah kalik bu kangok go ba sono
nemotnang mo lek.
11
Seduekabung go ida sik sogo,
nando-a Mot kalik go mo got-to?
Ya Woy Wali Iram,
nando-a Mot kalik go,
teguop go tang so Mot go blong ey seni so.
Mot tasam tang sogo so suali ey,
sui iway dega ey,
Mot lo tasam kangok go sesemu.
12
Mot go ta semlea Mot lo sra go;
kukunan lo nemotnang mo gut.
13
Mot go klum wegeng logo so,
Mot go blung Mot lo mo susuoy go wawi go koklong.
Mot go don dega lo nemot uwawi,
Mot susuing go sip teguop sono.
14
Ngga tup go saula-saula,
teguot bubuong ey nemotnang mo king;
nan Filistin sogo sedue kabung suali ey
bubuong ey nemotnang no mo degut.
15
Edom go trang-trang kangok so wak mo klung,
Moab sogo wengkabui-wengkabui
tawasrang-a kangok so mo glok,
nan Kanaan so susuing go sedue kabung
naklay bubuong ey mo king.
16
Suali kangok so nemotnang ba no mo degut,
Mot go tadon kangok go tang sogo so,
demo so nemotnang mo lemoy,
e… Mot go blung biapbu li go mo klong,
yang Woy Wali Iram,
e… Mot lo tamlak go blung biapbu
ngga idi no mo pung, yang Woy Wali Iram.
17
Nemotnang Mot lo wawi go,
Mot tang go meduim blo no mo tang;
Mot tang so sipsuing blo no,
yang Woy Wali Iram;
Mot go ta lo klik go sip teguop go no,
yang Woy Wali Iram.
18
Woy Wali Iram lo tamlak go-a
senang so mea gigit."
19
Kebleng ey kuda lo Piraun lek gono, nemot go sedue kuda logo ey, biap sono mo degut. Kekayso Woy Wali Iram lo semu go, biapbu teguey go, nemotnang mo kenok. No, biap nesip bu mo pang golo, sedue Israel masi lo mo koklong.
20
Ngga ey, Harun go demanon Miryam lo “rebana” ta no iti go, nggano, kabung-kabung naklay nemot no keng go. Meryam lo rebana kukluing usre ey uwata.
21
Ngga ey, Miryam lo nemotnang gemang uwawi:
"Woy Wali Iram sono usam se kukluo,
seni so Nemot go blong blo dega so;
kuda ey nemot no klak go sedue ey
biap ba sono Nemot lo mo ikak go tega."
Bu Mara ey bu Elim eygo
22
Biyap Teberau sik sogo Musa lo pu go seduekabung Israel ip go, kaseglok pay Syur sono nemotnang gemang koklong. Ku nangglik yam so, kaseglok pay lo nemotnang koklong go nogo, bu kua tegu.
23
Ngga ey, Mara sono nemotnang gemang pung. No, Mara sogo bu ngga bete ey, nemotnang lo drop genang sogo yakua. Nggatang so, sip ngga MaraMara: Iblani nebut sogo: “bete”so gemang temuit.
24
Ngga ey, Musa sono saula tang ngga lo segut gemang iti. Nemotnang lo pu go, "Sogo-a atnang ya druop?"
25
No, Woy Wali Iram sono Musa lo wak klung go. Nggano, di tebot meno-a Woy Wali Iram lo gemang taling. Di tebot ngganemot, bu ba sono Musa lo betep gono, bu ngga bete kua go tom ey gemang lemoy.
Se senong: sip ngga no, demu-demu ey, demutrui eygo Woy Wali Iram lo gemang pen-sing. Ngga ey, sip ngga dali no, nemotnang don ey suing genang sogo yatrang, Woy Wali Iram lo gemang iti.
26
Woy Wali Iram lo pu go, "Seni-seni so, Woy Wali Iram, mot go Ki Wali Iram gabe. Nggano, Nemot go nemuku nogo, senieygo-a motnang lo pupluok go, nggano, Nemot go demu-demu no kama suey so tup go, Nemot logo demutrui no senag so kengduk go, sogo-sogo dalu sedue Mesir nogo so mo taling go ngga, motnang nogo At logo mea kua iti. Yang, Genam ngge, mot so pali go Woy Wali Iram gabe."
27
Sip ngga sik sogo, Elim sono nemotnang gemang pung. Sip ngga sogo, bunemu 12 yam so, nggano, korma di 70 yam so gemang. Bu ngga ketang no nemotnang lo bala gemang klik.