Pasal 8
Namon tete sogo dalu: klingbuyaut
1
Musa sono Woy Wali Iram lo gemang pu, "Klong-a, Piraun go suongku no! Nemot no se pu, Woy Wali Iram go nebut ngge kalik gabe, ‘Genam go blung itak go se klong. Ngga tang so, Genam nogo, nemotnang takong genang.
2
Nemotnang itak go klong genang, mot lo tenguo go, mot go nan naklay blo sono go, dalu: klingbuyaut-a, Genam lo mea iti.
3
Yang, klingbuyaut mea pluep-lak. Butuo Nil ba, nggano mot go ya ba sono klak go, e… degu sip srek ba nogo ey mea degut. Yang, e… mot go sipsrek ba nogo ey mea degut. Mot go kebali sedue go yap ba sono go, nggano mot go blung go yap ba sono go, mot go ten so semu go sip, muk so king go sip, muk so duik go sip ba nogo ey mea degut.
4
Klingbuyaut ngga mot go saysuk blo nogo ey mea klak. Mot go blung ey kebali sedue eygo blo nogo ey mea klak."
5
Nggano, Musa sono Woy Wali Iram lo pu go, "Harun sono se pen, mot go teguoli ey butuo blo sono, butap blo sono, bumu blo sono ta se sra. Nggano, nan Mesir naklay blo sono go klingbuyaut se pupluep-lak."
6
Ngga ey, nan Mesir naklay sogo bu blo sono, Harun lo ta gemang sra-nawon. Nggano, klingbuyaut gemang pluep-lak, nan Mesir naklay klingbuyaut lo gemang kenok.
7
No, sedue Mesir go blue sedue, kunala sedue lo, nemotnang go blue lo, tasam ngga kalik go gemang semu dali. Ngganemot nogo, klingbuyaut pluep-lak golo, nan Mesir yam so se tram.
8
Ngga ey, Musa ey Harun eygo Piraun lo usi gono gemang pu, "Woy Wali Iram sono dewi pu-a! Ngga tang so, genam sik sogo, ket sono klingbuyaut ngge ka genang. Nggano, genam go blong sik sogo ka dali genang. Saula tang ngga, genam lo itak go mea klong-lak. Ngga tang so, Woy Wali Iram sono menay taiti so nemotnang puit go."
9
Piraun no, Musa lo pu go, "Ya, genam no mot lo mo pu go, genam lo dewi pu genang sogo. Mot go blung ey, kebali sedue eygo sik sogo, ngga tang so, mot sik sogo klingbuyaut ngga, mot ey mot go yap-yap eygo sik sogo kua genang. Nggano, butuo Nil seguong nogo-a mea itak."
10
Nemot lo pu go, "Utep." Ngga ey, Musa lo pu go, "Mot go nebut ngganemot kalik so se lemoy. Ngga tang so, tuiam senong genang: Seni so, atanang go Woy Wali Iram ngga, Ki Wali Iram. Nemot eygo ida meno kua kerlam.
11
Ngga ey, klingbuyaut ngga, mot sik sogo mea ka-sing. Mot go yap-yap sik sogo, mot go kebali sedue sik sogo, nggano, mot go blung sik sogo mea ka. Nggano, butuo Nil seguong nogo-a mea itak."
12
Ngga ey, Musa ey Harun ey Piraun itak go gemang klong. Nggano, klingbuyaut ngga tang sogo so, Piraun no pen go kalik so, Woy Wali Iram sono Musa lo usi go,
13
ngga ey, Musa lo pen go kalik, Woy Wali Iram lo gemang pluok. Klingbuyaut ngga kebong-lak go, Yap naklay ba nogo, yap seboy nogo, usu damoy nogo, gemang kebong-lak.
14
Klingbuyaut temoy seduekabung lo muong-sing go. Ngga tang so, nan ngga pegop nemon ey lemoy.
15
No, Piraun lo ikum go: seni so suey so mo tra. Woy Wali Iram lo pen go kalik so, nemot go dabui senang so demu ey ne demu. Nggano, nemotnamon go nebut nogo kua tup.
Nangglik tete sogo dalu: Son
16
Musa sono, Woy Wali Iram lo gemang pu, "Harun sono se pen, ’mot go teguoli iti go, sungkuim sono se but.’ Nansungkim ngge, nan Mesir naklay nogo, son so mea lemoy."
17
Ngga ey, ngga kalik nemotnang lo gemang pluok. Nemot go teguoli ey Harun ta sra go, nggano, nan sungkuim sono gemang but-siwon. Son ngganemot klong go, sedue kabung ey menay eygo no gemang gualing. Nan sungkuim naklay nan Mesir naklay nogo son so lemoy go.
18
No, ngga kalik go, blue sedue lo nemotnang go blue lo son semu genang sogo. No, nemotnang kua semu-nenawon. Ngga kalik go, son ngga seduekabung ey menay eygo no gemang gualing.
19
Ngga ey, blue eygo sedue ngga lo Piraun sono pu go, "Ngge Ki Wali Iram go ta." No, Woy Wali Iram lo pen go kalik. Piraun go dabui demu ey, nemotnang go nebut keng sogo nemot moy so.
Namon-namon tete sogo dalu: nabuin isuip
20
Ngga ey, Musa sono, Woy Wali Iram lo gemang pu, "Buong-a, wadikua go ip go, butuo no Piraun koklong go woy no, nemot-a se bubung. Nggano, nemot sono se pen, “Woy Wali Iram go nebut ngge kalik gabe, ‘Itak go, Genam go blung se klong! Ngga tang so, Genam nogo nemotnang takong genang.
21
Seni so, Genam go blung itak go kua klong go, mot sono go nabuin isup-a itak go mea weng-lak. Mot go kebali sedue sono go, mot go blung sono go. Nggano, yap-yap naklay sono go. Ngga tang so, sedue Mesir go yap-yap, nan naklay nogo. Nago no, nemotnang ip go susuing go naklay nabui ngganemot lo mea tram.
22
No, ku ngganemot nogo, Genam go blung suisuing go, nan Gosyen nogo-a nabuin mea kua pung. Ngga tang so, mot senong genang, “Seni so, Genam ngge Woy Wali Iram, nan ngge so gabe.
23
Seni so, Genam mea semu, Genam go blung ey mot go blung eygo, kuakerlamasam ngga, utep so mea lemoy."
24
Ngga kalik, Woy ,Wali Iram lo gemang pluok. Nabuin isup mata dega so, Piraun go yap ba no gemang weng-lak. Nggano, nemot go kebalisedue go yap ba sono go, nan Mesir naklay nogo. Nabuin ngga lo glok go tang so nan ngga naklay iseng ey gemang tra.
25
Ngga ey, Musa ey Harun eygo Piraun lo usi gono gemang pu, "Klong-a, mot go Ki Wali Iram no, menay taiti puit sogo, nan ngge no puit-a."
26
No, Musa lo pu go, "Ngga kalik go, atnang logo yakua semu. Seni so, Woy Wali Iram sono, atnang lo taiti go puit genang menay ngga, sedue Mesir nogo ikle ey. Nagono, taiti so menay puit atnang lo pupuit go no, blung Mesir ikle tra go, atnang demu lo mea sruom?
27
Atnang se klong kaseglok pay no, tap masi kunanglik yam so nggano se klong. Woy Wali Iram atnang go Ki Wali Iram nogo taiti ngga no puit genang sogo. Atnang no Nemot lo pu go kalik so."
28
Ngga ey, Piraun lo pu go, "Suey, motnang at lo itak go se klong, Woy Wali Iram nogo menay taiti puit genang sogo, kaseglok pay no. No, ket dega sono motnang kua klong. At nogo dewi se pu dali."
29
Ngga ey, Musa lo pu go, "Ngeasui go, at gabe pung go koklong. Ngano, Woy Wali Iram sono tuiam sogo dewi atnang lo mea pu. Nabuin ngga, Piraun sik sogo klong genang. Nemot go kebali sedue nggano nemot go blung sik sogo. No, Piraun lo wamoy mlue so semu go. Sedue Israel itak go Woy Wali Iram sono taiti so menay puit genang kua itak go klong."
30
Ngga temu ey, Piraun go suongku sik sogo, Musa pung go gemang klong go, Way wali Iram sono dewi gemang pu.
31
Ngga no, Musa lo dewi pu go kalik Woy Wali Iram lo gemang semu. Nabuin ngga, pling go klong go, Piraun gemang itak. Nemot go kebali sedue sik sogo, nggano, nemot go blung sik sogo, klayanang go kua itak.
32
No, ngge nogo Piraun go dabui demu kali dawin ey. Nemotnang nemot logo itak go kua klong.