Pasal 7

1 Ngga ey, Musa sono, Woy Wali Iram lo gemang pu, "Ikum-a, mot-a Ki Wali Iram kalik, nggano, mot go aka Harun-a, mot nogo nabi kalik Piraun nogo so, At lo gabe tetaling. 2 Mot no Genam lo pen go naklay, aka Harun no se pen. Nggano, ngga naklay Piraun sono Harun lo se pen. Ngga tang so, nemot go nan sik sogo seduekabung Israel itak go klong genang 3 No, Piraun go dabui demo kalik so, Genam lo mea lemoy. Ngga tang so, nan Mesir nogo tasam-tasam kangok go, don eygo mata so Genam lo taling genang. 4 Nagono, motnang nogo Piraun kua tup go, nan Mesir blo sono Genam go ta mea tui. Idekeba ide eygo tang so, Genam go ple sedue daley, yangga Genam go blung sikabung Israel itak go, nan Mesir sik sogo mea pung go klong. 5 Nggano, seduekabung Mesir ngga mea senong: “Seni so, Genam ngge Woy Wali Iram gabe. Nagono, Mesir blo sono Genam go ta tui gono, nemotnang nesip sik so, sedue Israel wawi go pung go klong go." 6 Ngga kalik so, Musa ey Harun eygo lo gemang semu. Nemotnamon no Woy Wali Iram lo pen go kalik so gemang semu. 7 Piraun ey tegu go, nemotnamon nebut pen go nogo, Musa go yagui 80 yam no. Nggano, Harun go yagui 83 yam no.

Harun go teguoli
8 Ngga no, Musa ey Harun eygo sono, Woy Wali Iram lo pu go, 9 "Nagono motnang no tasam taling so Piraun lo pu go, Harun sono mot lo se pu, “Mot go teguoli iti go Piraun go suongku sono nan blo no betep-a! Ngga ey, teguoli ngga lema so mea lemoy." 10 Musa ey Harun ey klong go Piraun go suongku no gemang ip, nggano, Woy Wali Iram lo pu go kalik gemang pluok. Nemot go teguoli Piraun go suongku sono Harun lo betep go, teguoli ngga lema so gemang lemoy. 11 Ngga ey, nemot go blue sedue, kunala sedue Piraun lo usi-sing gono, Mesir go blue sedue ngga lo, nemotnang go blue lo tasam ngga gemang semu dali. 12 Nemotgo-nemotgo teguoli nan blo sono betep go, lema so teguoli-teguoli ngga gemang lemoy-lak. No, Harun go tete lo nemotnang go-a gemang gut-sing. 13 No, Woy Wali Iram lo pen go kalik, Piraun go dabui demu kalik so. Ngga tang so, nemotnamon go nebut nogo yakua tup.
Kuduong sogo dalu: kin suk so bu lemoy go
14 Ngga ey, Musa sono, Woy Wali Iram lo gemang pu, "Piraun go demu dabui ey. Sedue Israel itak go klong genang sogo, nemot lo mo tenguo. 15 Nggeasui go, wadikua Piraun mit sono klong go, butuo no nemot koklong go woy no. Lema sogo ey lemoy go teguoli ngga, nemot ey mlak gono bu Nil ketang no klong go nemot se bubung. 16 Nggano, nemot no se pen, “Woy Wali Iram, sedue Iblani go Ki Wali Iram lo genam motdak go, mot sono weng go gabe pepen, ‘Itak go Genam go blung nase klong!’ Ngga tang so, kaseglok pay no, Genam sono go nemotnang takong genang. Nemot-a, ngga kalik go, no, mot logo kua tutup ne. 17 Ngga tang sogo so, Woy Wali Iram go nebut pu go ngge kalik so gabe, “Tasam ngge semu go sik so, mot senong genang: ‘Genam ngge Woy Wali Iram gabe.’ Ikum-a! Genam go ta sogo teguoli ngge lo butuo Nil sono but-silu go, kin so bu ngga mea iwot-ak. 18 Ngga ey, bu Nil ba sogo dasi mea leguot. Ngga tang so, pegop nemon ey bu Nil mea pung. Butuo Nil sik sogo bu drop sogo, seduekabung Mesir rlom ey mea." 19 Ngga ey, Musa sono Woy Wali Iram pu go, "Harun sono pu go, "Mot go teguoli iti go Mesir naklay sogo bu, butuo, butap, bumu, nemotnang go bu sre go bayiwok ba, saulakabu ba, sro ba naklay naklay blo sono, se leguit-sing. Ngga tang so, bu naklay kin so mea lemoy. Nggano, nan Mesir naklay nogo kin mea pung." 20 Ngga ey, Woy Wali Iram lo pu go kalik Musa ey Harun eygo lo gemang pluok. Nil butuo no Piraun go nemuku no, teguoli iti go butuo Nil blo sono gemang but. Nemot go kebali sedue eygo nemu damoy so. Butuo Nil sogo bu naklay kin so se lemoy-anatun. 21 Ngga tang so, butuo Nil sogo dasi naklay gemang leguot go, butuo Nil ngga pegop nemon ey pung. Ngganemot nogo, budrop genang butuo Nil sik sogo, sedue Mesir yakua gluik. Ngga lo, nan Mesir naklay nogo, kin ey gemang pung. 22 No, ngga kalik dali go, nemotnang go blue lo, Mesir sogo blue sedue lo gemang semu dali. Ngga tang so, Woy Wali Iram lo pen go kalik, Piraun go dabui demu ey, nemotnamon go nebut nogo yakua tup. 23 Ngga ey, Piraun iwut-ak go, nemot go yap sono degut go, tasam ngga kua ikum-srenawon. 24 No, sedue Mesir naklay, bu drop gluik genang so, butuo Nil ketang lo bumu tutuet. Seni so, butuo Nil sik sogo bu nemotnang yakua gluik. 25 Ku taidisonamon yam so, butuo nil Woy Wali Iram lo ngga kalik waluk go.