¹ Ngga ey, Ki Wali Iram lo Musa no pu go, "Genam ngge, Woy Wali Iram. ² At go saysuk Abraham, Isak nggano Yakub no mo taling. Ki Wali Iram, Don Iram dega so mo taling. No, Genam go sui, Woy Wali Iram ey saysuk eygo-a maning kua taling. ³ Nan Kanaan, banim nogo, saula meno go sip no amble kalik nemotnang lo suing go, nemotnang go ta no iti genang tegadi seguong-a nemotnang eygo kua dok. ⁴ No, nggeasui go, sedue Israel, Mesir saula lo kenok goso wak klung go, Genam mo tup dali gabe. Nggano, At go tegadi ngga nogo, Genam tandali mo duing. ⁵ Ngga tang so, ngga sogo, saula Israel no se pen-sing, “Genam ngge Woy Wali Iram. Seduekabung Mesir go ta ba sik sogo, Genam lo motnang tameaitak. Nemotnang go don ba sik sogo mea plet-ak. Nggano, motnang, Genam go ta lo mea susuoy. Idekeba dalu kangok-kangok golo mea taling. ⁶ Genam go blung so, motnang At lo mea iti, nggano, Genam-a, motnang go Ki Wali Iram so mea lemoy. Ngga tang so, motnang senong genang: Seni so, Genam ngge Woy Wali Iram, mot go Ki Wali Iram gabe. Sedue Mesir go ta ba sik so motang so ide eygo sik so, tandali itak go. ⁷ Ngga no, Tegadi so tanat ey dok go nan sono, motang wawi go mea klong. Babu Ablaham, Isak nggano Yakub no tegadi taeynat go sono wawi go mea klong. Nggano, motnang go nan so lemoy genang so, Genam lo mea iti. Genam ngge Woy Wali Iram gabe." ⁸ Ngga ey, sedue Israel no ngga kalik so Musa lo pen go, no, nemotnang Musa go nebut nogo, kua keng-nenawon. Kebali ide dega ey nemotnang tra golo, dabui mo waluk go nogo. ⁹ Ngga ey, Musa sono Woy Wali Iram lo pu go, ¹⁰ "Klong-a! Piraon go suong ku no se ip! Mesir go deguena no se pu, seni so, deguena Mesir lo Nemot go blung Israel itak go, nemot go nan sik sogo se klong-lak." ¹¹ No, Woy Wali Iram go suongku no, Musa lo pu go, "Sedue Israel tang go, at nogo kua tup go, Piraon logo genam nogo ya tup? Nggano, genam ngge, nebutpepen kua senong go sedue!" ¹² Ngga kalik, Musa ey Harun eygo sono Woy Wali Iram lo mo pu. ¹³ Nggano, nemotnamon Woy Wali Iram lo mot-ak go, Blung Israel ey Piraon Mesir go deguena eygo sono gemang klong. Deguo ngge pen genang sogo so, “Nan Mesir sik sogo, Israel saula wawi go se pung go klong.”

Musa ey Harun ey pung go tang

¹⁴ Nemotnang go yaptenglam wengkabui ngge kalik gabe: Israel go danon trang sogo Ruben. Ruben go danonnang: Henokh, Palu, Hezron nggano Karmi. Ngga, Ruben go tang. ¹⁵ Simeon go danonnang: Yemuel, Yamin, Ohad, Yakhin, Zohar, nggano Saul Kanaan kabung logo danon. Ngga, Simeon go tang. ¹⁶ Ngge, Lewi go duo-yap tui go sik so duk go i go sui: Gerson, Kehat nggano Merari. Lewi wali go yagui 137 yam so. ¹⁷ Ngga ey, Gerson go danonnang: Libni nggano Simei. Nemotnang go tang sik sogo. ¹⁸ Kehat go danonnang: Amram, Yizhar, Hebron nggano Uziel. Kehat wali go yagui 133 yam so. ¹⁹ Merari go danonnang: Mahli nggano Musi. Yangga, tang Lewi tui go tang sik so i go. ²⁰ Nggano, Amram lo nglangin go demanon sat Yokhebed gemang iti. Amram ey Yokhebed eygo duo: Harun ey, Musa ey gemang tui. Amram wali go yagui 137 yam no. ²¹ Yizhar go danonnang: Korah, Nefeg nggano Zikhri. ²² Uziel go danonnang: Misael, Elsafan nggano Sitri. ²³ Nggano, Aminadab go denun Nahason go demanon Eliseba-a, Harun lo senun so gemang iti. Nggano, Elisaba lo Harun nogo so tui go: Nadab, Abihu, Eleazar nggano Itamar. ²⁴ Korah go danonnang: Asir, Elkana nggano Abiasaf. Ngga Korah go tang gemang. ²⁵ Eleazar, Harun go danon lo Petuel go denon meno iti go. Duo tui-tun go, danon go sui: Penehas. Penehas ngga, tang Lewi go, yaptenglam wengkabui, nemotnang go trang dega gemang ²⁶ Harun ey Musa eygo ngganemot-a, Woy Wali Iram lo pu go klong go: "Nan Mesir sik sogo seduekabung Israel wawi go klong genang so Woy Wali Iram lo mot-ak go gabe." ²⁷ Nemotnamon lo deguena Mesir no klong go pen go, “Saula Israel taitak go klong genang sogo.”

Musa Piraun no klong go pu go

²⁸ Nan Mesir no, Musa sono Woy Wali Iram lo nebut pen go nogo, ²⁹ Woy Wali Iram lo Musa sono pu go, "Genam ngge Woy Wali Iram. Mot no Genam lo pen go nebut naklay, deguena Mesir Firaun no klong go se pen." ³⁰ No, Woy Wali Iram sono Musa lo pu go, "Genam ngge, nebutpepen suey so kua pepen go sedue. Genam nogo Piraun logo ya tup?"