Pasal 5
Mesir go Deguena sono Musa ey Harun ey klong go
1
Ngga ey, Mesir go deguena sono, Musa ey Harun ey klong go gemang pu, "Nggekalik, sedue Israel go Ki Wali Iram, WOY WALI IRAM lo pu go, “Genam nogo dewi pu genang sogo, kaseglokpay sono At go blung Israel, itak go se klong-lak."
2
Ngga ey, Mesir go deguena lo usi go, "WOY WALI IRAM ngga nando? Sogo temoy no, Nemot go nebut nogo genam ya tup-lu? Israel saula yakua itak go klong-lak. WOY WALI IRAM ngga nando, genam kua senong."
3
Musa ey, Harun eygo lo wa go, "Yang! Sedue Iblani go Ki Wali Iram lo atnamon no, suong mo taling. Kaseglokpay sono, tapmasi ku nangglik yam so klong go, Woy Wali Iram nogo taitipuit go, atnang dewi pu sogo be. Ngga, atnang kua semu go, kudalu ey ple eygo lo Nemot lo atnang mea leguot-sing."
4
No, Musa ey Harun eygo no, deguena lo pu go, "Saula tang ngga, motnamon logo tang so, nemotnang go kebali ey keneng-sing go? Klong go, kebali-a nase semu!
5
Motnang saulatang ngge-a, yam so miam dega so ke go. Blung Mesir-a miam kua ne. Nggeasui go, nemotnang go kebali, motnamon lo keneng-sing so ne.
6
Ku ngganemot sik so, tamot-tamot ey saulatang Israel sik sogo, mandor-mandor eygo no, Mesir go deguena lo "plenta" go,
7
"Demu duik genang padi tang, saulatang ngga nogo dali kua ikak. Itak go, padi tang nemotnang tang so se klong go wet.
8
No, banim go kalik miam ey, nemotnang logo demu se duik. Seguay sogonang miam kua tebuo. Nemotnang, kebali miam ey kua go nogo, nemotnang lo pu go, "Itak go atnang ya klong. Nemotnang go Ki Wali Iram nogo taitipuit go, dewi pu genang sogo!"
9
Saula tang ngganemot nogo, kebali ide ey kangok so talogo ey se poplong! Kangok so kebali so usey go, nebut-nebut wamoy mle sogo nogo, nemotnang go ku meakua iti.
10
Mesir go tamot-tamot ey, saulatang Israel sik sogo mandor-mandor ey pung go, blung Israel no gemang pupu, "Deguena lo pu go, ‘Motnang nogo paditang dali go meakua ta-sing.
11
Paditang mottang-mottang so klong go se wet. Nago sik so, motnang wet go ya iti? No, demu duik go-a, kua tebuo, miam ey banim duik go ey se kerlam.
12
Ngga tang sogo so, nan Mesir naklay sono, blung Israel koklong go paditang so wet go.
13
Kuno-kuno senang so, mandor-mandor lo poplong. Demu duik go, kua tebuo, miam ey banim duik go ey se kerlam dali.
14
No, kebali ngga yay suing genang so, taling go mandor-mandor Israel sik sogo-a, Mesir go tamot-tamot lo demun gemang suey. Nemotnang lo usi go, "Sogo so, demu duik go banim nogo kalik miam ey kua?"
15
Ngga ey, mandur-mandur ngga klong go, deguena no gemang rli-nenawon, "Sogo temoy no, ngge kalik go atnang nogo, aya deguena lo ne taling?
16
Atnang nogo, paditang dali go kua iti ne. No, demuduik genang sogo, atnang no ne poplong. Neasui go, nemot-a aya deguena go tamot-tamot lo kuklue go. No, atnang-a, demun ne suey?"
17
Wayso, deguena lo bebet go, "Sesrok so, motnang kebali kua sesemu go. Ngga tang so, ngge no weng go, motnang lo pu go, "WOY WALI IRAM nogo taitipuit go, dewi pu genang sogo, atnang itak go se klong-lak!"
18
Neasui go, kebali-a klong go se semu. Paditang tandali motnang nogo dali go yakua ta. No, demuduik go-a banim go kalik miam ey se, miam kua tebuo."
19
Ngga sik so, mandor-mandor ngga gemang senong: ‘piam go ku no, imotnang mo pung ba! Nemotnang no deguena lo pu go, "Banim go kalik miam ey se, miam kua tebuo!"
20
Deguena go yap sik so, mandor-mandor ngga pung go klong go, Musa ey Harun ey nemotnang so bubung go ey gemang tegu.
21
Musa ey Harun eygo no, mandur-mandur ngga lo pu go, "Motnamon lo pupluok go ngga, Woy Wali Iram-a mo ikum sang! Motnamon nogo idekeba, Nemot lo mea iti! Yang, motnamon tang sogo so, deguena ey nemot go tamot-tamot eygo, atnang nogo dabuipiam so. Nemot-a, atnang, nemotnang lo but go kebong genang nebut, motnamon lo deguena nogo mo iti ba!"
Woy Wali Iram sono Musa lo segut iti go
22
Ngga ey, Woy Wali Iram go suong ku no, Musa klong go gemang pu-nawon, "Yang, Woy Wali Iram! Sogo temoy no, Mot go blung nogo iseng taling-togoy? Sogo so, ngge sono genam wawi go weng ne?
23
Deguena sono genam klong go, Mot go sui no, genam lo pen go sik so, Mot go blung nogo iseng deguena lo mo tetaling. Nemotnang tebok genang, sogo-sogo Mot logo kua semu ne."Ngga ey, Musa sono Woy Wali Iram lo pu go, "Ngeasui go, mot mea ikum! Sogo-a, deguena Mesir nogo, Genam logo ya semu-lu? Ta don ey At lo poplong go, genam go blung nemot go nan sik sogo, nemot lo yat go itak go pung go mea klong-lak."