Pasal 4
Tasam-tasam semu genang don Musa no iti go
1
Ngga ey, Musa lo pu go, "Nemotnang, genam nogo kua keng go, sogo kalik so ya? Nggano, genam lo pen go nebut kua tup gono, nemotnang lo pu go, "Woy Wali Iram go suong, mot nogo kua taling wa!"
2
Nggano, Musa sono Woy Wali Iram lo pu go, "Mot go ta nogo ngga, sogo mlak?" Musa lo wa go, "Ngge teguoli be!"
3
Woy Wali Iram lo pu go, "Nan blo sono teguoli ngganemot betep-a!" Ngga no, nan blo sono teguoli ngga, Musa lo betep gono, kekay so lema so teguoli ngga gemang lemoy. Ngga tang sogo so, Musa ngga itak go gemang kap.
4
No, Musa sono, Woy Wali Iram lo pu go, "Ta sra go nemot go sat no mlak-a." Musa ta sra go, lema ngga sat no gemang mlak. Nggano, teguoli so tandali gemang lemoy.
5
"Ngga tang so, nemotnang keng genang: ‘seni so, nemotnang go babuasi, Ablaham, Isak nggano Yakob go Woy Wali Iram, yangga, Ki Wali Iram lo saysuk mot no mo taling."
6
Ngga no, tandali Woy Wali Iram lo pu go, "Mot go, mot go ta mot go amka "baju" ba sono kok-a!" Musa go ta amka "baju" ba sono kok go, tandali dia sono sok go, nemot go ta yaulatkuo lo gemang klak. Nemot go suk klaut so gemang lemoy.
7
Nggano, Musa sono Ki Wali Iram lo pu go, "Amka ba sono tandali mot go ta kok-a!" Nggano, amka ba sono Musa lo nemot go ta gemang kok. Ngga ey, dia sono tandali sok go: ‘Musa go ta, tandali mo pali, nemot go saysuk temu dali ey mo kerlam.’
8
Ki Wali Iram lo pu go, "Mot go nebut no suey so kua keng go, nggano, tasam klaya tete sogo nogo kua keng go, tasam namon tete sogo no nemotnang mea keng.
9
Ngga no, tasam namon ngge nogo nemotnang kua keng go. Nggano, mot go nebut no kua tup go, butuo Nil sik so bu mot lo se gluik. Nggano, nan lekuoy go blo no se pi. Ngga no, bu mot lo gluik go ngga, nan lekuoy go ngganemot blo no, kin so mea lemoy."
10
Ngga ey, Musa no, Woy Wali Iram lo gemang pu, "A, Woy Wali Iram! Genam ngge, nebut pepen sedue kua. Banim nogo kua, nggano Mot lo nebut pen go nogo, genam kua mlay dali. Seni so, at go lom ey nebleng eygo nebut pen genang sogo ide ey."
11
No, Musa sono, Woy Wali Iram lo gemang pu, "Sikabung go nebleng nando lo mo semu? Sedue mawo sogo, kama wik go, nando lo mo semu? Sede nemupli-nemupung go, nando lo mo semu? Genam Woy Wali Iram lo kua semu?
12
Ngganemot sogo so, klong-a! Mot go nebleng no, Genam lo mea tebok. Nggano, sogo-sogo mot logo ya pu go ngga, mot nogo Genam lo mea nguok.”
13
No, Musa lo pu go, "A, Woy Wali Iram! Nando-a, mot lo ya mot-ak go nemot-a mot-ak a."
14
Ngga ey, Musa no Woy Wali Iram sagui kong go gemang pu, "Ngga so, Harun ngga go, sedue Lewi ngga, mot go aka. At mo senong: ‘nemot nebut pepen sedue. Mot ey tugu so, nemot mo ip-nawon gemang. Mot, nemot lo ikum go nogo, dabui ba yakay lo mea tram.
15
Ngga ey, mot-a nemot no nebut se pen. Nggano, nemot go lom ba no nebut ngga se tui-nalo. Mot go nebleng ey, nemot go nebleng eygo ta Genam lo mea mlak. Nggano, motnang lo pupluok genang sogo, Motnamon nogo Genam lo mea ngunguok.
16
Saula tang ngga nogo, mot go nebut nemot lo mea pepen. Ngga kalik go, nemot-a mot go nebut pepen genang so mea, nggano, mot-a nemot nogo wengkabui so mea lemoy.
17
Ngga no, mot go teguoli ngge ta no se mlak. Tasam-tasam pupluok genang so se iti."
Tandali Mesir sono Musa weng go
18
Ngga ey, siomasi Yitro sono tandali Musa klong gono, nemot no, gemang usi, "Genam tandali at go saula tang sono klong genang sogo ya klong? Nan Mesir sogo, nemotnang ikum genang sogo. Nemotnang maning wali-wali so?" Musa sono Yitro lo pu go, "Suey so se klong."
19
Yang, Nan Midian no, Musa sono Woy Wali Iram lo mo pu, "Mesir no, tandali nase klong! Mot but genang so uwet go sedue mo kebong."
20
Ngga ey, senun ey danon eygo Musa lo wawi go. Ngga no, klak go klong genang menay blo no gemang ta. Ngga ey, nan Mesir sono nemot tandali gemang klong. Nggano, Ki Wali Iram go teguoli ngga, nemot ey ta no gemang mlak.
21
Musa sono Woy Wali Iram lo pu go, "Nan Mesir sono tandali koklong sogo nogo, teguoli ngga kua kay. Ngga tang so, Genam lo taling go tasam naklay, mot go ta sono gabe iti. Firaun go suongku nogo se taling-nalo. No, nemot go dabui at lo demu so mea lemoy. Ngga tang so, nemot lo motnang meakua itak go klong.
22
Ngga ey, mot Firaun no nase pen, “Woy Wali Iram go nebut ngge kalik so gabe: ‘Israel ngga Genam go duo trang sogo.”
23
Mot nogo gabe pepen, “Itak go Genam go Duo ngga nase klong. Ngga tang so, nemot Genam nogo ta kong genang. No, nemot itak go klong genang sogo, mot lo tenguo goso mot go duo trang sogo sedue denok At lo but go mea leguot."
24
No, tap nesip no, sip meno lo srek gono, Woy Wali Iram ey Musa gemang tegu. Nggano, Musa but genang so gemang pu.
25
No, Zipora lo tenang biso demu logo iti gono, danon go saduisuk gemang tong. Nggablo idi lo suk ngga iti go Musa go masi no, ngganemot lo kling gono gemang pupu, "Ngge genam go sedue kin genam nogo gabe."
26
Ngga ey, Musa wali so Woy Wali Iram lo gemang itak, "Kin sedue", so Zipora lo pu go ngga, saduisuk tong go ngga sono duing go.
27
Harun sono Woy Wali Iram lo gemang pu-kunuon, "Neguen pay sono klong-a, Musa ey tegu sogo." Nemot klong go, Ki Wali Iram go meduim no, Musa ey gemang tegu. Ngga no, teguot go mla gemang semu-klenawon.
28
Ngga ey, Harun sono, Musa no Woy Wali Iram lo pen go naklay gemang pen. Nggano, Harun no gemang pu-nawon, “Ki Wali Iram logo nebut ey tasam naklay ey pu go, Nemot lo pen go pluok genang sogo.
29
Ngga ey, Musa ey Harun ey klong go, sedue-sedue Israel yaluim go.
30
Musa no, Woy Wali Iram lo pen go nebut naklay pen gono, Woy Wali Iram lo Musa no taling go tasang ngga nemotnang nogo gemang taling dali
31
Ngga ey, saula tang ngga, gemang keng-nenawon. Yang!Nemotnang tup go: ‘seni so sedue Israel go ide, Woy Wali Iram mo ikum, nggano, Nemot go dabui mo iwat. Ngga ey, nemotnang segabuem unuik go, Woy Wali Iram sono ta gemang kong.